കൽപ്പറ്റ: മുണ്ടക്കൈ, ചൂരൽമല ഉരുൾ ദുരന്തബാധിതരുടെ പുനരധിവാസത്തിന് സാമ്പത്തികസഹായം പ്രഖ്യാപിക്കാതെ വായ്പ അനുവദിച്ചെങ്കിലും പദ്ധതികൾ ഈ മാർച്ച് 31നകം പൂർത്തിയാക്കണമെന്ന കേന്ദ്ര നിർദേശം സംസ്ഥാന സർക്കാരിന് കനത്ത വെല്ലുവിളി. സർക്കാർ ഇനി എന്ത് തീരുമാനമെടുക്കുമെ ന്നതാണ് നിർണായകം. 

പലിശയില്ലാതെ 50 വർഷ കാലയളവിൽ 529.50 കോടിയാണ് കേന്ദ്രം അനുവദിച്ചത്. എന്നാൽ, ഈ പണം കേന്ദ്രം നിർദേശിച്ച കാലയളവിൽ ഉപയോഗപ്പെടുത്താൻ കഴിയില്ലെന്ന് വ്യക്തമാണ്. ഈ സാമ്പത്തികവർഷം തന്നെ പൂർണമായും ചെലവഴിക്കണമെന്ന നിബന്ധനയോടെയാണ് പണം അനുവദിച്ചിരിക്കുന്നത്. പ്രത്യേക സാമ്പത്തിക സഹായവും വായ്പയും അനുവദിക്കണമെന്നായിരുന്നു സംസ്ഥാന സർക്കാർ ആവശ്യപ്പെട്ടിരുന്നത്. 

ഇതിൽ വായ്പയാണ് അനുവദിച്ചിരിക്കുന്നത്. മുണ്ടക്കൈ, ചൂരൽമല ഉരുൾ ദുരന്തബാധിതരുടെ പുനരധിവസിപ്പിക്കുന്നതിന് നിർമിക്കുന്ന ടൗൺഷിപ്പിൽ പൊതുകെട്ടിടങ്ങൾ, റോഡുകൾ, സ്‌കൂളുകൾ, ദുരന്തമേഖലയിലെ പുഴയുടെ ഒഴുക്ക് ക്രമീകരിക്കൽ, ദുരന്തമേഖലയിലെ റോഡുകൾ, പാലങ്ങൾ എന്നിവയ്ക്കാണ് തുക അനുവദിച്ചിരിക്കുന്നത്. ഉരുൾ ദുരന്തവുമായി നേരിട്ട് ബന്ധപ്പെട്ട ഒമ്പതും വയനാട്ടിലെ ദുരന്തനിവാരണവുമായി ബന്ധപ്പെട്ടതും അടക്കം 16 പദ്ധതികളാണ് സംസ്ഥാനം സമർപ്പിച്ചത്.  മേപ്പാടിയിലും സമീപപഞ്ചായത്തുകളിലുമായി നിർമിക്കുന്ന അപ്രോച്ച് റോഡ് ഉൾപ്പെടെ ആറ് ഹെലിപാഡുകളും സംസ്ഥാനം സമർപ്പിച്ച പദ്ധതികളിലുണ്ട്. 

പൂർത്തിയാക്കണം 31ന് മുമ്പ് (പദ്ധതികളും തുകയും)

നെടുമ്പാല, എൽസ്റ്റോൺ എസ്റ്റേറ്റുകളിലെ ടൗൺഷിപ്പിലെ പൊതുകെട്ടിടങ്ങളുടെ നിർമാണം-  111.32 കോടി

ടൗൺഷിപ്പിലെ റോഡ് നിർമാണം-  87.24 കോടി

പുന്നപ്പുഴ നദിയിൽ എട്ടു കി.മീ ഭാഗത്ത് ഒഴുക്ക് ക്രമീകരിക്കൽ-  65 കോടി

ഫയർ ആൻഡ് റെസ്‌ക്യൂ സ്റ്റേഷൻ-  21 കോടി

മുട്ടിൽ മേപ്പാടി റോഡ് നവീകരണം-  60 കോടി

ചൂരൽമല പാലം 38 കോടി

വെള്ളാർമല, മുണ്ടക്കൈ സ്‌കൂളുകളുടെ പുനർനിർമാണം-  12 കോടി

രോഗബാധിതർക്കുള്ള കെട്ടിട നിർമാണം-  15 കോടി

എൽസ്റ്റോൺ ടൗൺഷിപ്പിൽ 110 കെ.വി സബ് സ്റ്റേഷൻ നിർമാണം-  13.50 കോടി

കാരപ്പുഴ ജലശുദ്ധീകരണ പ്ലാന്റ്-  22.50 കോടി

അപ്രോച്ച് റോഡുകൾ ഉൾപ്പെടെ ആറ് ഹെലിപ്പാഡുകളുടെ നിർമാണം-  9 കോടി

കൽപ്പറ്റ സിവിൽ സ്റ്റേഷനിൽ ഡി ബ്ലോക്ക് നിർമാണം-  30 കോടി

ജില്ലയിൽ വിവിധോദ്ദേശ്യ ഷെൽട്ടറുകളുടെ നിർമാണം - 28 കോടി

ചൂരൽമല, അട്ടമല റോഡ്-  9 കോടി

പുഞ്ചിരിമറ്റം  വനറാണി പാലം, അപ്രോച്ച് റോഡ് -  7 കോടി

ജി.എൽ.പി.എസ് എട്ടാം നമ്പർ പാലം, അപ്രോച്ച് റോഡ്-  7 കോടി