കോഴിക്കോട്: ജില്ലയില്‍ ആന എഴുന്നള്ളിപ്പിന് വിലക്ക്. ഈ മാസം 21 വരെയാണ് വിലക്ക്. മണക്കുളങ്ങര ക്ഷേത്രത്തില്‍ ആന ഇടഞ്ഞതിന് പിന്നാലെ ചേര്‍ന്ന മോണിറ്ററിങ് കമ്മിറ്റി യോഗത്തിലാണ് തീരുമാനം. നിലവില്‍ ജില്ല മോണിറ്ററിങ് കമ്മിറ്റിക്ക് കീഴില്‍ രജിസ്‌ട്രേഷന്‍ ഇല്ലാത്ത  ക്ഷേത്രങ്ങള്‍ ആന എഴുന്നള്ളിപ്പ് നടത്തരുതെന്നാണ് നിര്‍ദേശം.

വിലക്ക് മറികടന്ന് ആനയെ എഴുന്നള്ളിച്ചാല്‍ ക്ഷേത്രത്തില്‍ നിന്ന് ആനയെ നിരോധിക്കാനാണ് തീരുമാനം. നിലവില്‍ മണക്കുളങ്ങര ക്ഷേത്രത്തിന് ജില്ല മോണിറ്ററിങ് കമ്മിറ്റിയുടെ രജിസ്‌ട്രേഷന്‍ ഉണ്ട്. ഇത് റദ്ദാക്കാനും എഡിഎമ്മിന്റെ നേതൃത്വത്തില്‍ ചേര്‍ന്ന യോഗത്തില്‍ തീരുമാനമായി. ആന ഇടഞ്ഞ സംഭവത്തില്‍ നാട്ടാന പരിപാലന ചട്ടത്തിന്റെ ലംഘനം ഉണ്ടായിട്ടുണ്ടെന്ന് വനം വകുപ്പ് റിപ്പോര്‍ട്ട് നല്‍കിയ പശ്ചാത്തലത്തിലാണ് നടപടി. തുടര്‍ച്ചയായ വെടിക്കെട്ടിന്റെ ആഘാതത്തിലാണ് ആന ഇടഞ്ഞതെന്നാണ് കണ്ടെത്തല്‍. 

അതേസമയം സംഭവത്തില്‍ വനം വകുപ്പിനോട് വിശദീകരണം നല്‍കാന്‍ ഹൈക്കോടതി ആവശ്യപ്പെട്ടു. പുറമെ ഗുരുവായൂര്‍ ദേവസ്വം ലൈവ് സ്റ്റോക്ക് ഡെപ്യൂട്ടി അഡ്മിനിസ്‌ട്രേറ്റര്‍ നേരിട്ട് ഹാജരാകാനും നിര്‍ദേശമുണ്ട്. ആനയുടെ ഭക്ഷണം, യാത്ര, രജിസ്റ്ററടക്കമുള്ള രേഖകള്‍ ഹാജരാക്കണമെന്നാണ് നിര്‍ദേശം.

നേരത്തെ റവന്യു, വനം വകുപ്പുകള്‍ നടത്തിയ പരിശോധനയില്‍ ഗുരുതരമായ ചട്ടലംഘനം നടന്നതായി കണ്ടെത്തിയിരുന്നു. ഇതുമായി ബന്ധപ്പെട്ട വിശദ റിപ്പോര്‍ട്ട് വനം മന്ത്രി എകെ ശശീന്ദ്രന് സമര്‍പ്പിക്കുകയും ചെയ്തിട്ടുണ്ട്. പടക്കം പൊട്ടിച്ച ശബ്ദം കേട്ടാണ് ആന വിരണ്ടതെന്ന് സ്ഥലം സന്ദര്‍ശിച്ച മന്ത്രി വ്യക്തമാക്കിയിരുന്നു.

elephant procession banned till February 21 in Kozhikode district