തൊടുപുഴ: വൈദ്യുതി ബോർഡ് പദ്ധതികളുടെ നിർമാണച്ചുമതല വീണ്ടും സിവിൽ വിഭാഗത്തിന് കൈമാറി. സിവിൽ വൈദഗ്ധ്യം അനിവാര്യമായ പദ്ധതികളുടെ ചുമതല ഇലക്ട്രിക്കൽ വിഭാഗത്തിന് കൈമാറി നടത്തിയ പരീക്ഷണം വിജയകരമല്ലെന്ന തിരിച്ചറിവാണ് വീണ്ടും ചുമതല സിവിൽ വിഭാഗത്തിന്റെ കൈകളിൽ എത്തിച്ചത്. ഇതുസംബന്ധിച്ച ഉത്തരവ് 11ന് പുറത്തിറക്കി.  2030ൽ 10000 മെഗാവാട്ട് എന്ന ടാർജറ്റ് പൂർത്തീകരിക്കണമെങ്കിൽ പുനക്രമീകരണം അത്യന്താപേക്ഷിതമാണെന്ന കെ.എസ്.ഇ.ബി ഡയരക്ടർ ബോർഡ് യോഗത്തിന്റെ വിലയിരുത്തലിന്റെ അടിസ്ഥാനത്തിലാണ് ചുമതല തിരികെ നൽകിയത്.

സിവിൽ വിഭാഗത്തിൽ ചീഫ് എൻജിനീയർ (പ്രോജക്ട്‌സ് പ്ലാനിങ്), ചീഫ് എൻജിനീയർ (പ്രോജക്ട്‌സ്), ചീഫ് എൻജിനീയർ (ബിൽഡിങ്‌സ്), ചീഫ് എൻജിനീയർ (ഡാംസ് ആന്റ് സേഫ്റ്റി) എന്നീ തസ്തികകൾ സൃഷ്ടിച്ചാണ് നിർമാണ പ്രവർത്തനങ്ങളുടെ ചുമതല കൈമാറിയത്. 
പുതിയ പദ്ധതികളുടെ ഇൻവെസ്റ്റിഗേഷൻ, സാധ്യതാ പഠനം, ഭൂമി സംബന്ധമായ പ്രശ്‌നങ്ങൾ, വനം വകുപ്പുമായി ബന്ധപ്പെട്ട പ്രശ്‌നങ്ങൾ  എന്നിവ കൈകാര്യം ചെയ്യേണ്ടത് പ്രോജക്ട്‌സ് പ്ലാനിങ് സി.ഇ ആണ്. പദ്ധതികളുടെ ടെൻഡർ, ഡിസൈൻ ഉൾപ്പടെ തയാറാക്കേണ്ട ചുമതല പ്രോജക്ട്‌സ് സി.ഇക്കാണ്. കെട്ടിട നിർമാണം, ക്വാർട്ടേഴ്‌സുകളുടെ മേൽനോട്ടം, വരുമാന വർധനവിനുള്ള പദ്ധതികൾ രൂപപ്പെടുത്തുക എന്നീ ചുമതലകൾ നിർവഹിക്കേണ്ടത് ബിൽഡിങ്‌സ് സി.ഇ യാണ്. 

എല്ലാ ഡാമുകളുടേയും മേൽനോട്ടവും ചീഫ് സേഫ്റ്റി കമ്മിഷണറുടെ ചുമതല വഹിക്കേണ്ടതും ഡാം ആന്റ് സേഫ്റ്റി സി.ഇയാണ്. പൊതുമരാമത്ത് വകുപ്പ്, വാട്ടർ അതോറിറ്റി എന്നിവയുടെ മാതൃകയിൽ ആറ് മാസം ഡെപ്യൂട്ടി ചീഫ് എൻജിനീയർ തസ്തികയിൽ പൂർത്തിയാക്കിയവരെ ചീഫ് എൻജിനീയർമാരായി പ്രമോട്ട് ചെയ്യാനും തീരുമാനിച്ചിട്ടുണ്ട്. അതേസമയം സിവിൽ വിഭാഗത്തിന് അവകാശപ്പെട്ട സിവിൽ ഡയരക്ടർ സ്ഥാനം തിരികെ ലഭിച്ചിട്ടില്ല. ഇലക്ട്രിക്കൽ വിഭാഗത്തിൽ നിന്നുള്ള ജനറേഷൻ ഡയരക്ടർക്കാണ് സിവിൽ ഡയരക്ടറുടെ ചുമതല.