കൊല്ലം: ഓണ്‍ലൈനിലൂടെ യുവാവിനെ കബളിപ്പിച്ച് ലക്ഷങ്ങള്‍ തട്ടിയെടുത്ത പ്രതികള്‍ അറസ്റ്റില്‍. ഓണ്‍ലൈന്‍ വ്യാപാരത്തിലൂടെ പണം സമ്പാദിക്കാമെന്ന് പറഞ്ഞ് വിശ്വസിപ്പിച്ച് കൊല്ലം അഞ്ചല്‍ സ്വദേശിയെ കബളിപ്പിച്ച പ്രതികളാണ് പിടിയിലായത്. മലപ്പുറം സ്വദേശി ഷംനാസ്, ഇടുക്കി സ്വദേശി ലിജോ എന്നിവരാണ് പ്രതികള്‍. തട്ടിപ്പ് സംഘത്തില്‍ കൂടുതല്‍ പേര്‍ ഉണ്ടാവാമെന്ന സംശയത്തിലാണ് പൊലിസ്. 

സമൂഹ മാധ്യമത്തിലൂടെ ഹെല്‍സ്ബര്‍ഗ് ഡയമണ്ട് എന്ന സ്ഥാപനത്തിലെ തൊഴില്‍ പരസ്യം കണ്ടാണ് അഞ്ചല്‍ സ്വദേശി പ്രതികളെ ബന്ധപ്പെട്ടത്. തുടര്‍ന്ന് വാട്‌സ് ആപ്പ് ചാറ്റുകളിലൂടെ പ്രതികള്‍ യുവാവുമായി അടുപ്പം സ്ഥാപിക്കുകയും, ഓണ്‍ലൈന്‍ ബിസിനസിലൂടെ പണം സമ്പാദിക്കാമെന്ന് പറഞ്ഞ് വിശ്വസിപ്പിക്കുകയും ചെയ്തു. തുടക്കത്തില്‍ ചെറിയ തുകകള്‍ യുവാവിന്റെ അക്കൗണ്ടിലേക്ക് അയച്ച് നല്‍കിയിരുന്നു. 

പിന്നാലെ യുവാവിനെ കൊണ്ട് ഡയമണ്ടിന്റെ വിവിധ മോഡലുകള്‍ ഓര്‍ഡര്‍ ചെയ്യിപ്പിച്ചു. ഡയമണ്ട് മറ്റൊരാള്‍ക്ക് മറിച്ച് വിറ്റാല്‍ വന്‍ ലാഭം കിട്ടുമെന്ന് യുവാവിനെ തെറ്റിദ്ധരിപ്പിച്ചു. പല തവണയായി ബാങ്കിലൂടെ പതിനാലര ലക്ഷത്തോളം രൂപയാണ് യുവാവില്‍ നിന്ന് പ്രതികള്‍ വാങ്ങിയത്. ഉറപ്പ് നല്‍കിയതോടെ വ്യാപാരം നടക്കാതായതോടെ തട്ടിപ്പ് മനസിലാവുകയും, യുവാവ് പൊലിസില്‍ പരാതിപ്പെടുകയും ചെയ്തു. 

തട്ടിയെടുത്ത പണം പ്രതികളായി ഷംനാസിന്റെയും, ലിജോയുടെയും അക്കൗണ്ടുകളിലേക്ക് എത്തിയതായി പൊലിസ് കണ്ടെത്തി. ഷംനാസ് സിനിമ മേഖലയുമായി ബന്ധപ്പെട്ട് പ്രവര്‍ത്തിക്കുന്നയാളാണ്. തട്ടിപ്പ് സംഘത്തെ കുറിച്ച് വിശദമായ അന്വേഷണം നടക്കുകയാണെന്നും, കൂടുതല്‍ പേര്‍ ഇവരുടെ വലയില്‍ വീണിട്ടുണ്ടോ എന്നും പൊലിസ് അന്വേഷിക്കുന്നുണ്ട്. 

kerala police arrest two youth over online money scam kollam