ഇന്ന് നമുക്ക് ചുറ്റും ഏറ്റവും കൂടുതലായി കണ്ടുവരുന്ന രോഗങ്ങളില്‍ ഒന്നാണ് അര്‍‍ബുദം. അനാരോഗ്യകരമായ ഭക്ഷണശൈലി, പുകവലി, മദ്യപാനം തുടങ്ങിയ രോഗങ്ങളെ വിളിച്ചുവരുത്തുന്ന ശീലങ്ങള്‍ ക്യാന്‍സറിന് കാരണങ്ങളായിത്തീര്‍ന്നേക്കാം. അര്‍‍ബുദങ്ങളില്‍ വിശേഷിച്ച്, ഉദരാര്‍‍ബുദം ഇന്ന് ഒട്ടേറെപ്പേരില്‍ കണ്ടുവരുന്നുണ്ട്. നേരത്തേ കണ്ടെത്തിയാല്‍ ചികിത്സയും രോഗമുക്ത സാധ്യതയും എളുപ്പമാകും. അതിനാല്‍ത്തന്നെ നമ്മുടെ ശരീരത്തില്‍ എന്തെങ്കിലും തരത്തിലുള്ള ചെറിയ ലക്ഷണങ്ങള്‍ പോലും പ്രാധാന്യത്തോടെ പരിഗണിച്ച് അരോഗ്യ വിദഗ്ധരുടെ അഭിപ്രായം തേടേണ്ടതും ആവശ്യമെങ്കില്‍ ചികിത്സ ഉറപ്പാക്കുകയും ചെയ്യേണ്ടതുണ്ട്. 

ഉദരാര്‍ബുദം ഇത്ര അപകടകാരിയാണോ?

●ഉദരാര്‍‍ബുദത്തിന്റെ ആദ്യഘട്ട ലക്ഷണങ്ങള്‍ പലപ്പോഴും മറ്റു ചെറിയ അസുഖങ്ങളുമായി തെറ്റിദ്ധരിക്കപ്പെടാറുണ്ട്. ശരിയായ ചികിത്സ തേടാന്‍ വൈകുന്നതിന് ഇതൊരു കാരണമായേക്കാം.

●     ഉദരാര്‍‍ബുദം ശരീരത്തിന്റെ മറ്റു ഭാഗങ്ങളിലേക്ക് വളരെ വേഗത്തില്‍ വ്യാപിക്കും.

●     രോഗം അവസാന ഘട്ടത്തിലെത്തിയാല്‍ ചികിത്സ ഏറെ പ്രയാസകരമാകും.

ഉദരാര്‍‍ബുദ കേസുകളുടെ എണ്ണവും ഈ രോഗത്താലുണ്ടാകുന്ന മരണങ്ങളും ലോകത്താകമാനം കൂടി വരുന്നതായി കഴിഞ്ഞ കുറച്ചു വര്‍ഷങ്ങളിലെ കണക്കുകള്‍ വ്യക്തമാക്കുന്നു. ആഗോളതലത്തിലെ റിപ്പോര്‍‍ട്ടുകള്‍ പരിശോധിക്കുമ്പോള്‍ അര്‍‍ബുദത്താലുണ്ടായ മരണങ്ങളില്‍ 35 ശതമാനവും ദഹനനാള അര്‍ബുദങ്ങള്‍ കാരണമാണ്. അന്നനാളം, ആമാശയം, ലിവര്‍‍, പിത്തസഞ്ചി-പിത്തക്കുഴല്‍, പാന്‍ക്രിയാസ്, ചെറുകുടല്‍, വന്‍കുടല്‍, മലാശയം തുടങ്ങിയ അവയവങ്ങളില്‍ ഉണ്ടാകുന്ന അര്‍‍ബുദമാണിത്. പുകവലി, മദ്യപാന ശീലങ്ങളും അര്‍‍ബുദ സാധ്യത ഉയര്‍‍ത്തുന്നവയാണ്. 

ഉദരാര്‍‍ബുദ വകഭേദങ്ങള്‍ 

●     ഈസോഫാഗല്‍ ക്യാന്‍സര്‍ (അന്നനാളത്തിലെ അര്‍‍ബുദം)

●     ആമാശയ അര്‍‍ബുദം

●     ലിവര്‍‍ ക്യാന്‍സര്‍‍ (കരളിലെ അര്‍‍ബുദം), ഫാറ്റി ലിവര്‍

●     പാന്‍ക്രിയാറ്റിക് ക്യാന്‍സര്‍‍

●     കോളന്‍ ക്യാന്‍സര്‍‍ (വന്‍കുടലിലെ അര്‍ബുദം)

●     റെക്ടല്‍ ക്യാന്‍സര്‍ (മലാശയ അര്‍ബുദം)

ഉദരാര്‍ബുദം തടയാന്‍ എന്ത് ചെയ്യാം?

●ആരോഗ്യകരമായ ഭക്ഷണശീലം: പഴങ്ങള്‍, പച്ചക്കറികള്‍, ധാന്യങ്ങള്‍ എന്നിവ ധാരാളം അടങ്ങിയ ആഹാരം കഴിക്കുക.

●     ദിവസവും വ്യായാമം ശീലമാക്കുക.

●     പുകവലിയും മദ്യപാനവും ഒഴിവാക്കുക

●     കൃത്യമായ ഇടവേളകളില്‍ ആരോഗ്യ പരിശോധന നടത്തുന്നതിലൂടെ ഏതെങ്കിലും അസുഖം ഉണ്ടെങ്കില്‍ അത് നേരത്തെ കണ്ടെത്താന്‍ സഹായിക്കും.

ഡോക്ടര്‍ നിര്‍‍ദ്ദേശിക്കുന്ന ചികിത്സാ രീതികളുമായി മുന്നോട്ടുപോകുന്നതിലൂടെ രോഗിയ്ക്ക് സാധാരണ ജീവിതത്തിലേക്ക് മടങ്ങി വരാനുള്ള സാധ്യതകളുണ്ട്. മെഡിക്കല്‍ സയന്‍സ് മേഖലയിലെ പുരോഗതി, താക്കോല്‍ദ്വാരം, റോബോട്ടിക് സര്‍ജറി തുടങ്ങിയ നവീന ചികിത്സാരീതികള്‍ ക്യന്‍സര്‍ ചികിത്സയെ വളരെയധികം മുന്നോട്ട് കൊണ്ടുപോയിട്ടുണ്ട്. നേരത്തേ തന്നെ രോഗനിര്‍ണയം നടത്തുകയും ആവശ്യമായ ചികിത്സ ലഭ്യമാക്കുകയും ചെയ്യുന്ന രോഗികളില്‍ അതിജീവന നിരക്ക് കൂടുതലാണ്.

വളരെ ഗുരുതരമായ ഒരു രോഗം തന്നെയാണ് ഉദരാര്‍ബുദം. എന്നാല്‍ നമുക്ക് നേരത്തെ കണ്ടെത്തി മികച്ച ചികിത്സ ഉറപ്പാക്കുന്നതിലൂടെ അപകട സാധ്യത ഒഴിവാക്കുവാനും രോഗിയെ സാധാരണ ജീവിതത്തിലേക്ക് കൊണ്ടുവരാനും സാധിക്കും