ഭോപ്പാല്‍: മധ്യപ്രദേശില്‍ മിശ്രവിവാഹം രജിസ്റ്റര്‍ ചെയ്യാന്‍ കോടതിയിലെത്തിയ ദമ്പതികള്‍ക്ക് ക്രൂരമര്‍ദ്ദനം. ഭോപ്പാലിലെ ജില്ലാ കോടതിയില്‍വെച്ചാണ് നര്‍സിങ്പുര്‍ സ്വദേശിയായ യുവാവിന് ക്രൂരമര്‍ദനമേറ്റത്. 

ഇതര മതത്തില്‍പെട്ട യുവതിയെ വിവാഹം കഴിക്കാനെത്തിയ യുവാവിനെ ലൗ ജിഹാദെന്നാരോപിച്ചാണ് സംസ്‌കൃതി ബച്ചാവോ മഞ്ച്, വിശ്വ ഹിന്ദു പരിഷത്ത് പ്രവര്‍ത്തകര്‍ മര്‍ദ്ദിച്ചത്. പിപാരിയ സ്വദേശിയായ യുവതിയെ സ്പെഷ്യല്‍ മാരേജ് ആക്ട് പ്രകാരം വിവാഹം കഴിക്കാന്‍ ഭോപ്പാലിലെത്തിയതായിരുന്നു യുവാവ്. രേഖകള്‍ സാക്ഷ്യപ്പെടുത്താനായി അഭിഭാഷകനെ കാണാനെത്തിയപ്പോഴാണ് രണ്ട് പേര്‍ ചേര്‍ന്ന് മര്‍ദിച്ചത്. ഇതിന്റെ വീഡിയോ സോഷ്യല്‍ മീഡിയയില്‍ പ്രചരിക്കുകയും ചെയ്തു.

യുവതിയെ നിര്‍ബന്ധിച്ചാണ് യുവാവ് കോടതിയില്‍ കൊണ്ടുവന്നതെന്നും ലൗ ജിഹാദാണ് ഇതിന് പിന്നിലെന്നും ആരോപിച്ചായിരുന്നു മര്‍ദനം. അക്രമികള്‍ യുവാവിന്റെ മുഖത്ത് ചവിട്ടുന്നതും നിലത്തിട്ട് അടിക്കുന്നതും വീഡിയോ ദൃശ്യങ്ങളിലുണ്ട്. 

യുവതിയെ മതം മാറാന്‍ നിര്‍ബന്ധിച്ചുവെന്ന കുറ്റം ചുമത്തി യുവാവിനെ പൊലിസ് അറസ്റ്റ് ചെയ്തുവെന്ന് ഇന്ത്യന്‍ എക്സ്പ്രസിന്റെ റിപ്പോര്‍ട്ടില്‍ പറയുന്നു. അതേസമയം, മര്‍ദിച്ചവര്‍ക്കെതിരെ പൊലിസ് എഫ്.ഐ.ആര്‍ രജിസ്റ്റര്‍ ചെയ്യുകയോ കേസെടുക്കുകയോ ചെയ്തിട്ടില്ല. 

'യുവാവിന്റെയും യുവതിയുടേയും മൊഴി രേഖപ്പെടുത്തിയിട്ടുണ്ടെന്നും ഇതിന്റെ അടിസ്ഥാനത്തില്‍ തുടര്‍നടപടികള്‍ സ്വീകരിക്കുമെന്നും എം.പി  നഗര്‍ സോണിലെ എ.സി.പി അക്ഷയ് ചൗധരി വ്യക്തമാക്കി.