കേപ് ടൗൺ: വരാനിരിക്കുന്ന ഐസിസി ചാമ്പ്യൻസ് ട്രോഫിയിൽ നിന്നും സൗത്ത് ആഫ്രിക്കൻ പേസർ ആൻറിച്ച് നോർക്യാ പുറത്തായി. നട്ടെല്ലിന് പരുക്കേറ്റ താരം സകാനിങ്ങിന് വിധേയനാവുകയാണ്. അതുകൊണ്ട് തന്നെ താരത്തിന് ചാമ്പ്യൻസ് ട്രോഫി നഷ്ടമാവും. മാത്രമല്ല ഇപ്പോൾ നടന്നുകൊണ്ടിരിക്കുന്ന എസ്എ ട്വന്റി ട്വന്റിയുടെ ബാക്കി മത്സരങ്ങളിലും നോർക്യക്ക് കളിക്കാൻ സാധിക്കില്ല. ഇതാദ്യമായല്ല താരത്തിന് സൗത്ത് ആഫ്രിക്കയ്ക്കൊപ്പമുള്ള മേജർ ടൂർണമെന്റുകൾ നഷ്ടമാവബുന്നത്. 2019 ലോകകപ്പും 2023 ലോകകപ്പും നോർക്യക്ക് പരുക്ക് മൂലം നഷ്ടമായിരുന്നു. 

ചാമ്പ്യൻസ് ട്രോഫിക്കുള്ള ടീമിനെ സൗത്ത് ആഫ്രിക്ക നേരത്തെ തന്നെ പ്രഖ്യാപിച്ചിരുന്നു. എന്നാൽ നോർക്യയുടെ ഈ അഭാവം വലിയ തിരിച്ചടിയായിരിക്കും പ്രോട്ടിയാസിന് നൽകുക. ഫെബ്രുവരി 19 മുതൽ മാർച്ച് ഒമ്പത് വരെയാണ് ചാമ്പ്യൻസ് ട്രോഫി നടക്കുന്നത്.ചാമ്പ്യൻസ് ട്രോഫിയിൽ ഗ്രൂപ്പ് ബിയിൽ ആണ് സൗത്ത് ആഫ്രിക്ക കളിക്കുക. സൗത്ത് ആഫ്രിക്കക്കൊപ്പം ഇംഗ്ലണ്ട്, ഓസ്ട്രേലിയ, അഫ്ഗാനിസ്ഥാൻ എന്നീ ടീമുകളാണ് ഉള്ളത്. ഫെബ്രുവരി 21ന് കറാച്ചിയിൽ നടക്കുന്ന മത്സരത്തിൽ അഫ്ഗാനിസ്ഥാനെതിരെയാണ് സൗത്ത് ആഫ്രിക്കയുടെ ആദ്യ മത്സരം. 

ഐസിസി ചാമ്പ്യൻസ് ട്രോഫിക്കുള്ള സൗത്ത് ആഫ്രിക്ക ടീം

ടെംബ ബാവുമ (ക്യാപ്റ്റൻ), ടോണി ഡി സോർസി, മാർക്കോ ജാൻസെൻ, ഹെൻറിച്ച് ക്ലാസൻ, കേശവ് മഹാരാജ്, എയ്ഡൻ മർക്രം, ഡേവിഡ് മില്ലർ, വിയാൻ മൾഡർ, ലുങ്കി എൻഗിഡി, ആൻറിച്ച് നോർക്യാ, കാഗിസോ റബാഡ, റയാൻ റിക്കൽടൺ, തബ്രൈസ് ഷംസി, ട്രിസ്റ്റൻ സ്റ്റബ്സ്, വാൻ ഡെർ ഡസ്സെൻ.