കൊച്ചി: ഇന്ത്യന്‍ സൂപ്പര്‍ ലീഗില്‍ കേരള ബ്ലാസ്റ്റേഴ്‌സ് പരിശീലകന്‍ മിഖായേല്‍ സ്റ്റാറെ പുറത്ത്. സീസണില്‍ ടീമിന്റെ തുടരെ തുടരെയുള്ള പരാജയത്തിന്റെ പശ്ചാത്തലത്തിലാണ് നടപടി. ഇത്തവണ ഐഎസ്എലില്‍ 12 കളികളില്‍നിന്ന് മൂന്നു ജയവും രണ്ടു സമനിലയും ഏഴു തോല്‍വിയും സഹിതം 11 പോയിന്റുമായി 10–ാം സ്ഥാനത്താണ് ബ്ലാസ്റ്റേഴ്‌സ്.അതേസമയം സ്റ്റാറെയ്ക്ക് പുറമേ ടീമിലെ സഹ പരിശീലതകരേയും പുറത്താക്കിയിട്ടുണ്ട്.

ഇന്നലെ മോഹന്‍ ബഗാന്‍ സൂപ്പര്‍ ജയന്റിനെതിരെ അവരുടെ തട്ടകമായ കൊല്‍ക്കത്ത സാള്‍ട്ട്‌ലേക്ക് സ്‌റ്റേഡിയത്തില്‍ നടന്ന മത്സരത്തിലും ബ്ലാസ്‌റ്റേഴ്‌സ് തോല്‍ക്കുകയായിരുന്നു. പൊരുതി നോക്കിയെങ്കിലും അവസാന മിനുറ്റിലാണ് ബ്ലാസ്‌റ്റേഴ്‌സ് രണ്ടിനെതിരേ മൂന്ന് ഗോളുകള്‍ക്ക് പരാജയപ്പെട്ടത്.

ലീഗില്‍ ടീമിന്റെ തുടര്‍ച്ചയായ മൂന്നാമത്തെ തോല്‍വിയായിരുന്നു ഇത്. പരാജയത്തോടെ പോയിന്റ് പട്ടികയില്‍ പത്താം സ്ഥാനത്ത് തുടരുകയാണ് കേരള ബ്ലാസ്റ്റേഴ്‌സ്. നിലവില്‍ 12 മത്സരങ്ങളില്‍നിന്ന് 11 പോയിന്റ് മാത്രമാണ് മഞ്ഞപ്പടയ്ക്കുള്ളത്. 12 കളിയില്‍ മൂന്ന് ജയം, രണ്ട് സമനില, ഏഴ് തോല്‍വി എന്നിങ്ങനെയാണ് മത്സരഫലം. ഈസ്റ്റ് ബംഗാളും ഹൈദരാബാദും മുഹമ്മദന്‍സും മാത്രമാണ് ബ്ലാസ്റ്റേഴ്‌സിന് പിന്നിലുള്ളത്.

മോഹന്‍ ബഗാന്‍ സൂപ്പര്‍ ജയന്റാണ് നിലവില്‍ ഐ.എസ്.എല്‍ പോയിന്റ് പട്ടികയില്‍ ഒന്നാമത്. 11 കളികളില്‍ 26 പോയിന്റാണ് അവരുടെ സമ്പാദ്യം. 12 കളികളില്‍ 24 പോയിന്റുള്ള ബംഗളൂരു എഫ്.സി രണ്ടാമതും അത്രയും കളികളില്‍ 19 പോയിന്റുമായി ഒഡിഷ എഫ്.സി മൂന്നാമതുമുണ്ട്.