തൊടുപുഴ: സംസ്ഥാനത്തെ പ്രാഥമിക കാർഷിക വായ്പാ സഹകരണ സംഘങ്ങളിലെ സോഫ്റ്റ്‌വെയർ ക്രമക്കേട് കണ്ടെത്താൻ ഐ.ടി സ്‌പെഷൽ ഡ്രൈവുമായി സഹകരണ വകുപ്പ്.  സോഫ്റ്റ്‌വെയറിലെ ക്രമക്കേടും അഴിമതിയും സംബന്ധിച്ച് നിരവധി പരാതികൾ സഹകരണ ഓഡിറ്റ് ഡയരക്ടറേറ്റിൽ ദിനേന ലഭിക്കുന്ന സാഹചര്യത്തിലാണ് സ്‌പെഷൽ ഡ്രൈവ് നടത്താൻ സർക്കാർ തീരുമാനിച്ചത്.

ഇതുസംബന്ധിച്ച ഉത്തരവ് സഹകരണ ഓഡിറ്റ് ഡയരക്ടർ എം.എസ് ഷെറിൻ പുറപ്പെടുവിച്ചു. ജില്ലകളിൽ ജോയിന്റ് ഡയരക്ടർ ഓഫിസിലെ അസിസ്റ്റന്റ് ഡയരക്ടറായിരിക്കും പദ്ധതിയുടെ നോഡൽ ഓഫിസർ. സ്‌പെഷൽ ഡ്രൈവുമായി ബന്ധപ്പെട്ട് ഓഡിറ്റർമാർക്ക് സംശയ ദുരീകരണം നടത്തുന്നതിന് എല്ലാ ജില്ലകളിലും ഐ.ടി ഓഡിറ്റ് സപ്പോർട്ട് സെല്ലും രൂപീകരിച്ചിട്ടുണ്ട്. റെഗുലർ ഓഡിറ്റിന്റെ ഭാഗമായി അതാത് സംഘങ്ങളിലെ ഓഡിറ്റ് ടീം തന്നെയാണ് സ്‌പെഷൽ ഡ്രൈവ് നിർവഹിക്കേണ്ടത്. കണക്കുകൾ പരിശോധിക്കുന്നതിനൊപ്പം ക്രമക്കേടുകൾക്കായി  സോഫ്റ്റ് വെയറിൽ എന്തെങ്കിലും തിരിമറി നടത്തിയിട്ടുണ്ടോ എന്നതും പരിശോധനയ്ക്ക് വിധേയമാക്കും. 

ഒരു വസ്തുവിൻ്റെ ഇൗടിൽ ഒരു വായ്പ മാത്രമേ അനുവദിക്കാവൂ എന്നാണ് ചട്ടമെങ്കിലും സോഫ്റ്റ് വെയറിലും മറ്റും മാറ്റങ്ങൾ വരുത്തി ഒന്നിലധികം വായ്പകൾ അനുവദിക്കുന്നത് സംബന്ധിച്ച പരാതികളും സഹകരണ സംഘങ്ങൾക്കെതിരേ പലപ്പോഴും ഉയർന്നിട്ടുണ്ട്. ഏകീകൃത സോഫ്റ്റ് വെയർ നിലവില്ലാത്തതിനാൽ തട്ടിപ്പു നടത്താൻ സഹായകമായ ചില പ്രത്യേക സോഫ്റ്റ് വെയർ സംഘങ്ങൾ ഉപയോഗിക്കുന്നതായും കണ്ടെത്തിയിട്ടുണ്ട്.ഇതെല്ലാം ഐ.ടി സ്‌പെഷൽ ഡ്രൈവിൽ പുറത്തുവരുമെന്നാണ് പ്രതീക്ഷ.   ധനാപഹരണമോ മറ്റ് സാമ്പത്തിക ക്രമക്കേടുകളോ സ്‌പെഷൽ ഡ്രൈവിൽ കണ്ടെത്തിയാൽ പ്രത്യേക റിപ്പോർട്ട് തയാറാക്കി തുടർനടപടി സ്വീകരിക്കാനും നിർദേശമുണ്ട്. 

പ്രഹസനമെന്ന് ആരോപണം
അതിനിടെ സംഘങ്ങളിലെ സോഫ്റ്റ്‌വെയർ ക്രമക്കേട് കണ്ടെത്താൻ പ്രഖ്യാപിച്ച ഐ.ടി സ്‌പെഷൽ ഡ്രൈവ് പ്രഹസനമെന്ന് ഇൻസ്‌പെക്ടേഴ്‌സ് ആന്റ് ഓഡിറ്റേഴ്‌സ് അസോസിയേഷൻ. അതിവിദഗ്ധമായി നടത്തിയിരിക്കുന്ന ക്രമക്കേടുകൾ കണ്ടെത്താൻ ചുമതലപ്പെടുത്തിയവർ  നാമമാത്ര  സാങ്കേതിക പരിജ്ഞാനം ഉള്ളവരാണെന്നതാണ് പ്രശ്‌നം. 

ഓരോ ജില്ലയിൽ നിന്നും മൂന്നു മുതൽ അഞ്ച് വരെ ഇൻസ്‌പെക്ടർമാരെ തെരഞ്ഞെടുത്ത് തിരുവനന്തപുരത്തെ അഗ്രികൾച്ചർ കോ ഓപ്പറേറ്റീവ് സ്റ്റാഫ് ട്രെയ്‌നിങ് ഇൻസ്റ്റിറ്റ്യൂട്ടിൽ കഴിഞ്ഞ് ഒക്ടോബർ 23 മുതൽ 26 വരെ നാല് ദിവസത്തെ പരിശീലനം നൽകിയിരുന്നു. സഹകരണ വകുപ്പിലെ അസി. ഡയരക്ടറും ജൂനിയർ ഓഡിറ്ററുമാണ് ക്ലാസ് നയിച്ചത്. പരിശീലനം നേടിയവർ മറ്റ് ഓഡിറ്റർമാരെ പരിശീലിപ്പിക്കണമെന്നാണ് നിർദേശം. 

റഗുലർ ഓഡിറ്റിനൊപ്പം സ്‌പെഷ്യൽ ഡ്രൈവ് നടത്തണമെന്നതും പ്രായോഗികമല്ലെന്ന് ഇവർ പറയുന്നു. ഇത് സംബന്ധിച്ച് സംഘടന ഓഡിറ്റ് ഡയരക്ടർക്ക് പരാതി നൽകിയിട്ടുണ്ട്.