തിരുവനന്തപുരം: സംസ്ഥാനത്ത് പൊതുമരാമത്ത് കരാറുകാര്‍ക്ക് നൽകാനുള്ളത് 1166 കോടി. കരാറുകാര്‍ക്ക് കൃത്യമായി ബില്ലുകള്‍ മാറി നല്‍കുന്നില്ല. 2024 ഫെബ്രുവരി മുതല്‍ ജൂലൈ വരെയുള്ള ആറു മാസത്തെ കണക്കാണിത്. റോഡ്, പാലം എന്നിവയുടെ നിര്‍മാണം, പരിപാലനം എന്നിവയില്‍ 857.41 കോടിയുടെ കുടിശ്ശികയാണുള്ളത്.

കെട്ടിട നിര്‍മാണത്തിന്റെ 258.07 കോടിയുടെ ബില്ലുകളും കുടിശ്ശികയാണ്. ദേശീയപാത നിര്‍മാണവുമായി ബന്ധപ്പെട്ട് 50.83 കോടിയും കുടിശ്ശികയായുണ്ട്. ബില്ലുകള്‍ മാറിനൽകാത്തതിനാൽ സംസ്ഥാനത്തെ നിര്‍മാണ പ്രവൃത്തികള്‍ മന്ദഗതിയിലാണ്. പണം ലഭിക്കാത്തതിനാല്‍ പണി നിര്‍ത്തിയ കാറുകാരുമുണ്ട്. കുടിശ്ശികയുണ്ടെങ്കിലും പ്രവൃത്തികള്‍ക്ക് കാലാതാമസം നേരിടുന്നില്ലെന്ന വിചിത്ര നിലപാടാണ് മന്ത്രി നിയമസഭയില്‍ സ്വീകരിച്ചത്. 

പല റോഡ് പണികളും ഇഴയുന്ന അവസ്ഥയാണ്. പല കരാറുകാരും ഇപ്പോള്‍ സര്‍ക്കാരിന്റെ വലിയ പ്രവൃത്തികൾ ഏറ്റെടുക്കാൻ മടിക്കുകയാണ്. അതുമൂലം ഇവയെല്ലാം ചെന്നെത്തുന്നത് ഊരാളുങ്കല്‍ സൊസൈറ്റിയിലേക്കാണ്. സൊസൈറ്റി കരാര്‍ ഏറ്റെടുക്കുന്നത് സര്‍ക്കാരിനും ആശ്വാസമാണ്.