ന്യൂഡല്‍ഹി: രാജ്യത്തെ ബുള്‍ഡോസര്‍ നീതിക്കെതിരെ ഒരിക്കല്‍ കൂടി രൂക്ഷ വിമര്‍ശനവുമായി സുപ്രിം കോടതി. നിയമം രമോന്നതമായ ഒരു രാജ്യത്ത് ഇത്തരം പൊളിക്കല്‍ ഭീഷണികള്‍ ഒരിക്കലും പാടില്ലാത്തതാണെന്ന് ചൂണ്ടിക്കാട്ടിയായിരുന്നു സുപ്രിം കോടതിയുടെ വിമര്‍ശനം.  ജസ്റ്റിസുമാരായ ഋഷികേശ് റോയ്, സുധാന്‍ഷു ദൂലിയ, എസ്.വി.എന്‍ ഭാട്ടി എന്നിവരുള്‍പ്പെട്ട ബെഞ്ചിന്റേതാണ് സുപ്രധാന നിരീക്ഷണം. രാജ്യത്തിന്റെ നിയമങ്ങള്‍ക്ക് മേലാണ് ബുള്‍ഡോസര്‍ ഓടിക്കുന്നതെന്ന്  സുപ്രിം കോടതി ചൂണ്ടിക്കാട്ടി. 

പൗരാണികമായ വീട് പൊളിക്കാനുള്ള ശ്രമത്തിനെതിരായ നല്‍കിയ ഹരജി പരിഗണിക്കുന്നതിനിടെയായിരുന്നുകോടതിയുടെ നിരീക്ഷണം. ഗുജറാത്തിലെ ഖേദ ജില്ലയിലാണ് വീട് പൊളിക്കാനുള്ള ശ്രമമുണ്ടായത്.
കുടുംബാംഗങ്ങളില്‍ ഒരാള്‍ കുറ്റകൃത്യത്തില്‍ ഏര്‍പ്പെട്ടതിന്റെ പേരിലാണ് വീട് ബുള്‍ഡോസര്‍ ഉപയോഗിച്ച് തകര്‍ക്കാനുള്ള ശ്രമം നടത്തിയത്. 

ജാവേദാലി മഹേബുബമിയ സിയാദ് എന്നയാളാണ് ഹരജി നല്‍കിയത്. സെപ്റ്റംബര്‍ ആറിനാണ് വീട് പൊളിക്കാനായി നോട്ടീസ് നല്‍കിയത്. ലൈംഗികാതിക്രമ പരാതിയില്‍ കേസെടുത്തതിന് പിന്നാലെയാണ് ഇത്തരത്തില്‍ വീട് പൊളിക്കാന്‍ നോട്ടിസ് നല്‍കിയത്.

ഒരു കുടുംബാംഗത്തിന് നേരെ രജിസ്റ്റര്‍ ചെയ്ത കേസിന്റെ പേരില്‍ മൊത്തം കുടുംബാംഗങ്ങളെയും എന്തിനാണ് ശിക്ഷിക്കുന്നതെന്നായിരുന്നു ഹരജിയിലെ പ്രധാന ചോദ്യം. വ്യാഴാഴ്ച കേസ് പരിഗണിക്കുന്നതിനിടെ ഒരാള്‍ കുറ്റകൃത്യത്തില്‍ ഏര്‍പ്പെട്ടത് വീട് പൊളിക്കാനുള്ള കാരണമല്ലെന്ന് സുപ്രിം കോടതി നിരീക്ഷിച്ചു.

നിയമം അനുസരിച്ച് വേണം രാജ്യത്ത് സംസ്ഥാനങ്ങള്‍ നടപടികള്‍ സ്വീകരിക്കാന്‍. കുടുംബത്തിലെ ഒരാള്‍ കുറ്റം ചെയ്താല്‍ എല്ലാവര്‍ക്കുമെതിരെ നടപടിയെടുക്കാനാവില്ല. നിയമപരമായി നിര്‍മിച്ച കെട്ടിടം പൊളിക്കാനാവില്ലെന്നും സുപ്രിം കോടതി നിരീക്ഷിച്ചു.