ന്യൂഡല്‍ഹി:ഡല്‍ഹിയില്‍ നടക്കുന്ന നീതി ആയോഗ് യോഗത്തില്‍ സംസാരിക്കാന്‍ അനുവദിക്കാത്തതിനെ തുടര്‍ന്ന് പശ്ചിമ ബംഗാള്‍ മുഖ്യമന്ത്രി മമതാ ബാനര്‍ജി ഇറങ്ങിപ്പോയി. താന്‍ സംസാരിക്കുന്നതിനിടെ മൈക്ക് ഓഫ് ചെയ്‌തെന്നാണ് മമത ആരോപിക്കുന്നത്.തന്നെ അഞ്ച് മിനിറ്റ് മാത്രമേ സംസാരിക്കാന്‍ അനുവദിച്ചുള്ളൂവെന്നും ഇത് രാഷ്ട്രീയ വിവേചനമാണെന്നും മമത ആരോപിച്ചു. 

പ്രധാനമന്ത്രി നരേന്ദ്ര മോദിയുടെ അധ്യക്ഷതയില്‍ ഡല്‍ഹിയില്‍ ആണ് ഒന്‍പതാമത് നിതി ആയോഗ് ഗവേര്‍ണിങ് കൗണ്‍സിലിന്റെ യോഗം നടന്നത്. 

'നിങ്ങള്‍ (കേന്ദ്രം) സംസ്ഥാന സര്‍ക്കാരുകളോട് വിവേചനം കാണിക്കരുതെന്ന് ഞാന്‍ പറഞ്ഞു. എനിക്ക് സംസാരിക്കാന്‍ ആഗ്രഹമുണ്ടായിരുന്നു, പക്ഷേ എന്റെ മൈക്ക് ഓഫ് ചെയ്തു. എന്നെ 5 മിനിറ്റ് മാത്രമേ സംസാരിക്കാന്‍ അനുവദിച്ചുള്ളൂ, എന്റെ മുമ്പിലുള്ള ആളുകള്‍ 10 മുതല്‍ 20 മിനിറ്റ് വരെ സംസാരിച്ചു, ഞാന്‍ മാത്രമാണ് പ്രതിപക്ഷത്ത് നിന്ന് പങ്കെടുത്തത്. എന്നിട്ടും എന്നെ സംസാരിക്കാന്‍ അനുവദിച്ചില്ല. ഇത് അപമാനകരമാണ്' - മമത പറഞ്ഞു. 

കോണ്‍ഗ്രസ് ഭരിക്കുന്ന സംസ്ഥാനങ്ങളായ കര്‍ണാടക ,തെലങ്കാന , ഹിമാചല്‍ പ്രദേശ് മുഖ്യമന്ത്രിമാര്‍ യോഗത്തില്‍ പങ്കെടുക്കില്ലെന്ന് നേരത്തെ അറിയിച്ചിരുന്നു. ബജറ്റില്‍ വിവേചനം കാട്ടിയതെന്നു ചൂണ്ടിക്കാട്ടി ആദ്യം ബഹിഷ്‌കരണം പ്രഖ്യാപിച്ചത് തമിഴ് നാട് മുഖ്യമന്ത്രി എം.കെ സ്റ്റാലിന്‍ ആയിരുന്നു. പിന്നാലെ ചേര്‍ന്ന ഇന്‍ഡ്യ സഖ്യ യോഗത്തില്‍ എഐസിസി ജനറല്‍ സെക്രട്ടറി ജയറാം രമേശാണ് സമ്പൂര്‍ണ ബഹിഷ്‌കരണം എന്ന ആശയം അവതരിപ്പിച്ചത്. എന്നാല്‍ മമതയും ജാര്‍ഖണ്ഡ് മുഖ്യമന്ത്രി ഹേമന്ത് സോറനു യോഗത്തില്‍ പങ്കെടുക്കുമെന്ന് വ്യക്തമാക്കിയിരുന്നു.