മലപ്പുറം: അറബ് രാജ്യങ്ങളുമായുള്ള വാണിജ്യ, സാംസ്‌കാരിക ബന്ധങ്ങളും തൊഴില്‍ മേഖലകളിലെ അനന്ത സാധ്യതകളും പരിഗണിക്കുമ്പോള്‍ സി.എച്ച് അറബിക് അക്കാദമി കാലഘട്ടത്തിന്റെ ആവശ്യമെന്ന് പി.കെ കുഞ്ഞാലിക്കുട്ടി. കേരള അറബിക് ടീച്ചേഴ്‌സ് ഫെഡറേഷന്‍ സംസ്ഥാന കമ്മിറ്റി തിരുവനന്തപുരം ചെമ്പക നഗറില്‍ സ്ഥാപിക്കുന്ന സി.എച്ച് മുഹമ്മദ് കോയ അറബിക് അക്കാദമിയുടെ പ്രഖ്യാപനം നിര്‍വഹിച്ച് സംസാരിക്കുകയായിരുന്നു അദ്ദേഹം.
ലാംഗ്വേജ് കോച്ചിങ് സെന്റര്‍, ലാംഗ്വേജ് ലാബ്, അറബിക് എംപവര്‍മെന്റ് പ്രോഗ്രാം, മൈനോറിറ്റി കോച്ചിങ് ഇന്‍സ്റ്റിറ്റ്യൂട്ട് , ഗള്‍ഫ് കാരിയര്‍ ഗൈഡന്‍സ് സെന്റര്‍, റിസര്‍ച്ച് വിങ് തുടങ്ങിയ പദ്ധതികളുമായി സ്ഥാപിക്കുന്ന അറബിക് അക്കാദമി അനന്തമായ തൊഴില്‍ സാധ്യതകള്‍ക്ക് വഴിയൊരുക്കും. കേരളത്തില്‍ വിദ്യാഭ്യാസ വിപ്ലവത്തിന് നാന്ദികുറിച്ച സി.എച്ചിന്റെ നാമധേയത്തില്‍ അക്കാദമി തുടങ്ങുന്നതിനുള്ള കെ.എ.ടി.എഫിന്റെ തീരുമാനം പ്രശംസനീയമാണെന്നും അദ്ദേഹം പറഞ്ഞു.
എ. മുഹമ്മദ് അധ്യക്ഷനായി. കരുവള്ളി മുഹമ്മദ് മൗലവി, പി.കെ കുഞ്ഞാലിക്കുട്ടിക്ക് ഉപഹാരം നല്‍കി. എം.വി അലിക്കുട്ടി, ഇബ്രാഹിം മുതൂര്‍, കെ.കെ അബ്ദുല്‍ ജബ്ബാര്‍, ടി.പി അബ്ദുല്‍ ഹഖ്, പി. സൈനുല്‍ ആബിദീന്‍, സി.എച്ച് ഹംസ മാസ്റ്റര്‍, പി.കെ ഷാഹുല്‍ ഹമീദ്, എസ്.എ റസാഖ് സംസാരിച്ചു.
സംസ്ഥാന സെക്രട്ടറി സി. അബ്ദുല്‍ അസീസ് സ്വാഗതവും പി.പി അബ്ദുല്‍ ഖാദര്‍ നന്ദിയും പറഞ്ഞു.