മസ്കറ്റ് : മസ്കത്ത് കെഎംസിസി കോട്ടയം ജില്ലാ കമ്മിറ്റിയുടെ ആഭിമുഖ്യത്തിൽ,  അന്തരിച്ച മുസ്‌ലിം ലീഗ് നേതാവും വൈക്കം ബാറിലെ അഭിഭാഷകനുമായ അഡ്വക്കേറ്റ് പി എം ജമാൽ സാഹിബ്  അനുസ്മരണം സംഘടിപ്പിച്ചു.  മത്ര കോർണിക്ഷിൽ നടന്ന അനുസ്മരണ യോഗത്തിൽ അദ്ദേഹത്തിന്ന്ന് വേണ്ടി പ്രത്യേക പ്രാർത്ഥനയും നടത്തി. മുസ്‌ലിം ലീഗ് കോട്ടയം ജില്ലാ കമ്മറ്റി അംഗവും ജമാൽ സാഹിബിന്റെ സമകാലികനുമായ കെ യു മുഹമ്മദ് ഇസ്മായിൽ കങ്ങഴ അനുസ്മരണ പ്രഭാഷണം നടത്തി. എംഎസ്എഫിന്റെ സംസ്ഥാന സെക്രട്ടറി വൈസ് പ്രസിഡണ്ട്, മുസ്ലിം യൂത്ത് ലീഗിന്റെ ജില്ലാ പ്രസിഡന്റ്, ജില്ല മുസ്‌ലിം ലീഗിന്റെ വൈസ് പ്രസിഡണ്ട് എന്നീ നിലകളിൽ പ്രവർത്തിച്ച ജമാൽ സാഹിബ് കോട്ടയം ജില്ലയിലെ ഹരിത രാഷ്ട്രീയ പ്രസ്ഥാനത്തിനെ ശക്തമാക്കിയ  നേതാവായിരുന്നുവെന്ന് അദ്ദേഹം അനുസ്മരിച്ചു. സൗമ്യനും ശാന്തശീലനുമായ അദ്ദേഹം മികച്ച വ്യക്തിത്വത്തിന് ഉടമയായിരുന്നു. ജില്ലയിൽ ഗ്രാമ ഗ്രാമാന്തരങ്ങളിൽ പാർട്ടിയെ വളർത്താൻ ദീർഘ ദൂരം കാൽനടയായി പോലും സഞ്ചരിച്ചു പ്രവർത്തിച്ച അദ്ദേഹം മികച്ച സംഘടകനും നിരവധിയായ കാരുണ്യ പ്രവർത്തനത്തിലൂടെ  മികച്ച മനുഷ്യസ്നേഹിയും ആയിരുന്നുവെന്നും അദ്ദേഹം അനുസ്മരിച്ചു. മസ്കത്ത് കെഎംസിസി കേന്ദ്ര കമ്മറ്റി വൈസ് പ്രസിഡന്റ് ഷമീർ പാറയിൽ, മസ്കത്ത് കെഎംസിസി കോട്ടയം ജില്ലാ പ്രസിഡന്റ് ഷാ റസാഖ് എരുമേലി,  ജനറൽ സെക്രട്ടറി നൈസാം ഹനീഫ്, ട്രഷറർ ഫൈസൽ മുഹമ്മദ്‌ വൈക്കം ഭാരവാഹികളായ മുഹമ്മദ്‌ കാബൂസ്, അജ്മൽ കബീർ ഇടക്കുന്നം, അജ്മൽ കാരുവേലിൽ, അഷ്‌റഫ്‌ ഈരാറ്റുപേട്ട, നൗഫൽ കങ്ങഴ, ആദിൽ ഷാ,തുടങ്ങിയവർ സംസാരിച്ചു.