ബെംഗളൂരുവിൽ അടുത്ത മാസം നടക്കാനിരിക്കുന്ന എൻസി ക്ലാസിക് ജാവലിൻ ത്രോ മത്സരത്തിനായി പാകിസ്ഥാൻ താരം അർഷാദ് നദീമിനെ ക്ഷണിച്ചതിനെത്തുടർന്ന്, ഒളിമ്പ്യൻ നീരജ് ചോപ്രക്കെതിരെ സൈബർ ആക്രമണങ്ങൾ ശക്തമാകുകയാണ്. മത്സരത്തിൽ ലോകോത്തര താരങ്ങളെ പങ്കെടുപ്പിക്കാനാണ് നീരജിന്റെ ശ്രമം, എന്നാൽ പഹൽഗാം ഭീകരാക്രമണത്തിന്റെ പശ്ചാത്തലത്തിൽ പാകിസ്ഥാൻ താരത്തെ ക്ഷണിച്ചതിൽ സാമൂഹ്യമാധ്യമങ്ങളിൽ വ്യാപകമായ പ്രതിഷേധമുയരുകയാണ്.

നീരജ് ചോപ്രയുടെ മാത്രമല്ല, അദ്ദേഹത്തിന്റെ കുടുംബത്തെയും അപമാനിക്കുന്ന തരത്തിലുള്ള ഭാഷയിലാണ് ചിലർ പ്രതികരിച്ചത്. ഇതിനെതിരെ നിലപാട് വ്യക്തമാക്കുകയായിരുന്നു നീരജ്. തന്റെ ഔദ്യോഗിക സോഷ്യൽ മീഡിയ അക്കൗണ്ടിലൂടെയാണ് നീരജ് കടുത്ത വേദനയോടെ പ്രതികരണം പങ്കുവെച്ചത്.

"ഞാൻ വളരെ കുറച്ച് സംസാരിക്കുന്നയാളാണ്. അതുകൊണ്ട് തെറ്റാണെന്ന് തോന്നുന്ന കാര്യങ്ങൾക്കെതിരെ പ്രതികരിക്കില്ലെന്നു കരുതരുത്, പ്രത്യേകിച്ച് എന്റെ രാജ്യസ്നേഹത്തേയും കുടുംബത്തിന്റെ അഭിമാനത്തേയും ചോദ്യം ചെയ്യുമ്പോൾ," നീരജ് തന്റെ കുറിപ്പിൽ വ്യക്തമാക്കി.

അർഷാദിനെ മത്സരത്തിലേക്ക് ക്ഷണിച്ചതുമായി ബന്ധപ്പെട്ട് വ്യക്തിപരമായ അധിക്ഷേപങ്ങൾ നിറഞ്ഞ പ്രചാരണങ്ങൾ നടക്കുന്നുണ്ടെന്നും, ഒരു അത്ലറ്റിനെ മറ്റൊരു അത്ലറ്റ് ക്ഷണിച്ചതാണ് ഇതിന്റെ കാരണമായതെന്നും അദ്ദേഹം വ്യക്തമാക്കി. “NC ക്ലാസിക്കിന്റെ ലക്ഷ്യം ലോകത്തിലെ മികച്ച താരങ്ങളെ ഇന്ത്യയിലെത്തിച്ച് മത്സരം നടത്തുകയാണ്. പഹൽഗാം ആക്രമണത്തിന് രണ്ട് ദിവസം മുൻപേ അത്ലറ്റുകൾക്ക് ക്ഷണം നൽകിയിരുന്നു," നീരജ് വ്യക്തമാക്കി.

രാജ്യത്തോടുള്ള തന്റെ പ്രതിബദ്ധതയെ ആരും സംശയിക്കേണ്ടതില്ലെന്നും, കഠിനാധ്വാനത്തിലൂടെയാണ് രാജ്യത്തെ പ്രതിനിധീകരിച്ച് യശ്വസ് ഉയർത്തിപ്പിടിക്കുന്നതെന്നും അദ്ദേഹം കൂട്ടിച്ചേർത്തു. "പ്രിയപ്പെട്ടവരെ നഷ്ടപ്പെട്ടവർക്കൊപ്പം എന്റെ പ്രാർത്ഥനകൾ ഉണ്ടാകും. നീതി നടപ്പാകും എന്നതിൽ ഉറപ്പുണ്ട്," നീരജ് എഴുതി.

അദ്ദേഹം സങ്കടം പ്രകടിപ്പിച്ചത് മാധ്യമങ്ങൾ തെറ്റായ വിവരങ്ങൾ പ്രചരിപ്പിക്കുന്നതിനെതിരെയും. "ഞങ്ങൾ സാധാരണക്കാരാണ്, ഞങ്ങളെ മറ്റൊന്നായി ചിത്രീകരിക്കരുത്. ഞാൻ പ്രതികരിക്കാത്തതിന്റെ പേരിൽ തെറ്റായ പ്രചാരണങ്ങൾ സത്യമല്ല. ഒരു വർഷം മുൻപ് അമ്മയെ പുകഴ്ത്തിയവരാണ് ഇന്ന് അമ്മയെ അധിക്ഷേപിക്കുന്നത്," എന്നും നീരജ് കുറിച്ചു.പാരിസ് ഒളിമ്പിക്സിൽ നീരജ് വെള്ളിയും അർഷാദ് സ്വർണ്ണവും നേടിയിരുന്നു. അപ്പോൾ നീരജിന്റെ അമ്മ അർഷാദിനെ മകനെ പോലെ കാണുന്നുവെന്ന് പറഞ്ഞിരുന്നു. അതേ രീതിയിലാണ് അർഷാദിന്റെ അമ്മയും പ്രതികരിച്ചത്.

Indian Olympic javelin champion Neeraj Chopra responded to criticism after inviting Pakistani athlete Arshad Nadeem to the upcoming Neeraj Chopra Classic in Bengaluru. Chopra clarified that the invitation was extended prior to the recent Pahalgam terror attack and was a gesture from one athlete to another, devoid of political intent. Following the attack, Nadeem's participation became untenable, and he also cited scheduling conflicts with the Asian Athletics Championships in South Korea. Chopra expressed hurt over the online abuse directed at him and his family, emphasizing his unwavering patriotism and commitment to representing India with pride. ​