സലാല: ഒമാന്‍ പര്യടനത്തിലെ രണ്ടാം ഏകദിനത്തില്‍ കേരളത്തിന് തോല്‍വി. ഒമാന്‍ ചെയര്‍മാന്‍സ് ഇലവന്‍ 32 റണ്‍സിനാണ് കേരളത്തെ തോല്‍പിച്ചത്. ആദ്യം ബാറ്റ് ചെയ്ത ഒമാന്‍ ചെയര്‍മാന്‍സ് ഇലവന്‍ 50 ഓവറില്‍ ഏഴ് വിക്കറ്റിന് 294 റണ്‍സെടുത്തു. മറുപടി ബാറ്റിങ്ങിന് ഇറങ്ങിയ കേരളം 49ാം ഓവറില്‍ 262 റണ്‍സിന് ഓള്‍ ഔട്ടാവുകയായിരുന്നു. ടോസ് നേടി ബാറ്റിങ് തെരഞ്ഞെടുത്ത ഒമാന്‍ ചെയര്‍മാന്‍സ് ഇലവന് ഓപ്പണര്‍ പൃഥ്വി മാച്ചിയുടെ ഉജ്ജ്വല ഇന്നിങ്‌സാണ് കരുത്ത് പകര്‍ന്നത്. തുടക്കത്തില്‍ തന്നെ രണ്ട് വിക്കറ്റ് നഷ്ടമായെങ്കിലും ഒരറ്റത്ത് ഉറച്ച് നിന്ന് ഹമദ് മിര്‍സയ്ക്കും മുഹമ്മദ് നദീമിനുമൊപ്പം പൃഥ്വി ഉയര്‍ത്തിയ കൂട്ടുകെട്ടുകളാണ് ഒമാന്റെ സ്‌കോര്‍ 294ല്‍ എത്തിച്ചത്.

 പൃഥ്വി 105 റണ്‍സെടുത്തപ്പോള്‍ മുഹമ്മദ് നദീം 80ഉം ഹമദ് മിര്‍സ 33ഉം റണ്‍സെടുത്തു. കേരളത്തിന് വേണ്ടി എം.ഡി നിധീഷ് രണ്ടും ബേസില്‍ എന്‍.പി, ശ്രീഹരി, അബ്ദുല്‍ ബാസിദ്, ഷോണ്‍ റോജര്‍ എന്നിവര്‍ ഓരോ വിക്കറ്റ് വീതവും വീഴ്ത്തി. മറുപടി ബാറ്റിങ്ങിന് ഇറങ്ങിയ കേരത്തിന് സ്‌കോര്‍ ബോര്‍ഡ് മുന്‍പെ തന്നെ ഓപ്പണര്‍ അഭിഷേക് നായരുടെ വിക്കറ്റ് നഷ്ടമായി. എന്നാല്‍ മുഹമ്മദ് അസറുദ്ദീനും ഗോവിന്ദ് ദേവ് പൈയും ചേര്‍ന്നുള്ള രണ്ടാം വിക്കറ്റ് കൂട്ടുകെട്ടില്‍ 111 റണ്‍സ് പിറന്നു. അസറുദ്ദീന്‍ 63ഉം ഗോവിന്ദ് പൈ 62ഉം റണ്‍സെടുത്തു. ഇരുവരും പുറത്തായ ശേഷമെത്തിയ മൂന്ന് ബാറ്റര്‍മാര്‍ തിളങ്ങാതെ പോയത് കേരളത്തിന് തിരിച്ചടിയായി. ഷോണ്‍ റോജര്‍ റണ്ണെടുക്കാതെ പുറത്തായപ്പോള്‍ അക്ഷയ് മനോഹര്‍ 13ഉം രോഹന്‍ കുന്നുമ്മല്‍ 12ഉം റണ്‍സെടുത്ത് പുറത്തായി. അവസാന ഓവറുകളില്‍ സല്‍മാന്‍ നിസാറിന്റെ ഉജ്ജ്വല ഇന്നിങ്‌സ് കേരളത്തിന് പ്രതീക്ഷ നല്‍കി.

എന്നാല്‍ 34 പന്തുകളില്‍ നിന്ന് 58 റണ്‍സെടുത്ത സല്‍മാന്റെ വിക്കറ്റ് നഷ്ടമായതോടെ കേരളത്തിന്റെ വിജയപ്രതീക്ഷകള്‍ അവസാനിച്ചു. നിധീഷ് 37 റണ്‍സെടുത്തു. ഒമാന് വേണ്ടി മുജിബുര്‍ അലി മൂന്നും മൊഹമ്മ് ഇമ്രാനും, ഷക്കീല്‍ അഹ്മദും, സമയ് ശ്രീവാസ്തവയും രണ്ട് വിക്കറ്റ് വീതവും വീഴ്ത്തി.

Kerala lost by 32 runs against Oman Chairman's XI