ന്യൂഡൽഹി: പഹൽഗാം ഭീകരാക്രമണത്തെ തുടർന്ന് പാകിസ്ഥാനെതിരെ കടുത്ത നിലപാട് സ്വീകരിച്ച ഇന്ത്യ, ഇപ്പോൾ പാകിസ്ഥാനിലെ ഏറ്റവും വലിയ ടി20 ടൂർണമെന്റായ പാകിസ്ഥാൻ സൂപ്പർ ലീഗ് (PSL) ക്രിക്കറ്റ് മത്സരങ്ങളുടെ സംപ്രേഷണം നിർത്തിയതായി റിപ്പോർട്ടുകൾ. സ്ട്രീമിംഗ് പ്ലാറ്റ്ഫോമായ ഫാൻകോഡിൽ ഇനി പാകിസ്ഥാൻ സൂപ്പർ ലീഗ് മത്സരങ്ങൾ കാണാൻ കഴിയില്ല. ഔദ്യോഗിക സ്ഥിരീകരണമില്ലെങ്കിലും, ടൂർണമെന്റുമായി ബന്ധപ്പെട്ട എല്ലാ ഉള്ളടക്കങ്ങളും ഫാൻകോഡിൽ നിന്നു നീക്കം ചെയ്തതായും റിപ്പോർട്ടുകളുണ്ട്.

ഇത് വരെയായി പാകിസ്ഥാൻ സൂപ്പർ ലീഗ് ടൂർണമെന്റിന്റെ 13 മത്സരങ്ങൾ ഫാൻകോഡിൽ സംപ്രേഷണം ചെയ്തിരുന്നു. ഏപ്രിൽ 11ന് തുടങ്ങിയ ടൂർണമെന്റ് മെയ് 18നാണ് അവസാനിക്കുക. എന്നാൽ ഇനി നടക്കാനിരിക്കുന്ന മത്സരങ്ങൾ കാണിക്കാൻ ഇന്ത്യയിൽ നിന്നുള്ള അനുമതിയില്ലെന്ന് സൂചനയുണ്ട്.

ഇതോടെ ഇന്ത്യ-പാക്ക് ക്രിക്കറ്റ് ബന്ധം വൻ പ്രതിസന്ധിയിലായി. നിലവിൽ ഇരുടീമുകളും ഐസിസി ടൂർണമെന്റുകളിൽ മാത്രമാണ് ഏറ്റുമുട്ടുന്നത്. എന്നാൽ പുതിയ സാഹചര്യത്തിൽ ഈ ക്രമീകരണവും പുനപരിശോധിക്കപ്പെടുമെന്ന വിലയിരുത്തലാണ് കായികരംഗത്ത് ഉയരുന്നത്.

ഇന്ത്യ, പാക്ക് മണ്ണിൽ ക്രിക്കറ്റ് കളിക്കുന്നത് കഴിഞ്ഞ കുറേ വർഷങ്ങളായി ഒഴിവാക്കിയിരുന്നു. ഇപ്പോഴത്തെ നടപടിയോടെ കായിക രം​ഗത്തും പാകിസ്ഥാനെ അകറ്റാനുള്ള ശ്രമം ശക്തമായിരിക്കുകയാണ്.

Following the recent terror attack in Pahalgam, India has reportedly halted the telecast of the Pakistan Super League (PSL). Streaming platform FanCode, which held broadcasting rights, has removed all PSL-related content. Though an official statement is yet to be issued, sources confirm that no further matches of the ongoing tournament will be aired in India. The move reflects growing tensions and India's strong diplomatic and cultural stance against Pakistan.