ശ്രീനഗര്‍: കൈകളിലെ മൈലാഞ്ചിത്തുടുപ്പ് മങ്ങിയില്ല. അതിനുമുമ്പ് അവളുടെ നെറുകയിലെ സിന്ദൂരച്ചോപ്പ് മാഞ്ഞു. കഴിഞ്ഞ ദിവസമുണ്ടായ ജമ്മുകശ്മീരിലെ പെഹല്‍ഗാം ഭീകരാക്രമണത്തില്‍ കൊലപ്പെട്ട നാവിക സേന ഉദ്യോഗസ്ഥന്‍ വിനയ് നര്‍വാളിന്റെ (26) വിവാഹം കഴിഞ്ഞിട്ട് ഒരാഴ്ച പോലുമായിട്ടുണ്ടായിരുന്നില്ല. ഈ മാസം 19നായിരുന്നു കൊച്ചിയില്‍ നിന്നുള്ള നാവിക സേന ഉദ്യോഗസ്ഥനായ വിനയുടെ വിവാഹം. ഭാര്യക്കൊപ്പം ഹണിമൂണ്‍ ആഘോഷിക്കാനാണ് ഈ ഹരിയാന സ്വദേശി കശ്മീരിലെത്തിയത്. ഭാര്യ സുരക്ഷിതയാണെന്നാണ് പുറത്തുവരുന്ന റിപ്പോര്‍ട്ട്.

രണ്ടു വര്‍ഷം മുമ്പാണ് വിനയ് നേവിയില്‍ ചേരുന്നത്. ഉടന്‍ തന്നെ കൊച്ചിയില്‍ പോസ്റ്റിങ്ങുമായി. വിനയിന്റെ മരണം ഒരുപോലെ ഞെട്ടലായിരിക്കുകയാണ്  കുടുംബത്തിനും അയല്‍ക്കാര്‍ക്കും. മിടുക്കനായിരുന്ന വിനയിനെ അവര്‍ ഓര്‍ത്തെടുക്കുന്നു.
'നാലു ദിവസമായിട്ടേ ഉള്ളൂ അവന്റെ വിവാഹം കഴിഞ്ഞിട്ട്. എല്ലാവരും നല്ല സന്തോഷത്തിലായിരുന്നു' അയല്‍ക്കാരനായ നരേഷം ബന്‍സാല്‍ ഓര്‍ക്കുന്നു.

ചൊവ്വാഴ്ച ഉച്ചയോടെയാണ് ജമ്മു കശ്മീരിലെ പഹല്‍ഗാമില്‍ വിനോദസഞ്ചാരികള്‍ക്ക് നേരെ ഭീകരര്‍ ആക്രമണം നടത്തിയത്. പഹല്‍ഗാം ഹില്‍ സ്റ്റേഷനില്‍ നിന്ന് അഞ്ചു കിലോമീറ്റര്‍ അകലെ ബൈസാരന്‍ പുല്‍മേടില്‍ ഭീകരര്‍ വെടിവെപ്പ് നടത്തുകയായിരുന്നു. സൈനിക വേഷത്തിലെത്തിയ ആയുധധാരികളായ ഭീകരര്‍ കുതിരസവാരി നടത്തുകയായിരുന്ന സഞ്ചാരികള്‍ക്ക് നേരെയാണ് വെടിയുതിര്‍ത്തത്. 
 
ആക്രമണത്തില്‍ കൊല്ലപ്പെട്ടവരുടെ എണ്ണം 27ആയെന്നാണ് റിപ്പോര്‍ട്ട്. 20 പേര്‍ക്ക് ഗുരുതരമായി പരിക്കേറ്റിട്ടുണ്ട്. മരിച്ചവരില്‍ ഒരു മലയാളിയുമുണ്ട്. എറണാകുളം ഇടപ്പള്ളി മങ്ങാട് നിരഞ്ജനയില്‍ എന്‍. രാമചന്ദ്രന്‍ (65) ആണ് മരിച്ചത്. മരണം സ്ഥിരീകരിച്ച് കൊച്ചി പൊലിസിന് ഔദ്യോഗിക വിവരം ലഭിച്ചിട്ടുണ്ട്. മുന്‍ പ്രവാസിയായ രാമചന്ദ്രന്‍ ഇന്നലെയാണ് കുടുംബത്തോടൊപ്പം ഹൈദരാബാദ് വഴി കശ്മീരിലേക്ക് പോയത്. രാമചന്ദ്രന്റെ ഭാര്യ ഷീലയും മകളും മകളുടെ രണ്ട് കുട്ടികളും സുരക്ഷിതരാണെന്ന് ബന്ധുക്കള്‍ അറിയിച്ചു. മകന്‍ ബംഗളൂരുവില്‍ നിന്ന് കശ്മീരിലേക്ക് തിരിച്ചിട്ടുണ്ട്.

ALSO READ: പഹല്‍ഗാം: ഭീകരര്‍ക്കായി തിരച്ചില്‍, ചോരക്കളമായി മിനി സ്വിറ്റ്‌സര്‍ലന്‍ഡ്, സഊദി സന്ദര്‍ശനം വെട്ടിച്ചുരുക്കി പ്രധാനമന്ത്രി | Pahalgam Terror Attack

നോര്‍ക്ക ഹെല്‍പ്പ് ഡെസ്‌ക്
ഭീകരാക്രമണത്തിന്റെ പശ്ചാത്തലത്തില്‍ കശ്മീരിലുള്ള കേരളീയര്‍ക്ക് സഹായവും സേവനങ്ങളും വിവരങ്ങളും ലഭ്യമാക്കുന്നതിനായി നോര്‍ക്ക ഹെല്‍പ്പ് ഡെസ്‌ക് തുടങ്ങി. സേവനം ലഭിക്കാന്‍ നോര്‍ക്ക ഗ്ലോബല്‍ കോണ്ടാക്ട് സെന്ററിന്റെ 18004253939 (ടോള്‍ ഫ്രീ നമ്പര്‍), 00918802012345 (മിസ്ഡ് കോള്‍) എന്നീ നമ്പറുകളില്‍ ബന്ധപ്പെടാം.

കശ്മീരില്‍ കൂടുങ്ങി പോയവര്‍ക്കും സഹായം ആവശ്യമായവര്‍ക്കും ബന്ധുക്കളെ സംബന്ധിച്ച വിവരം തേടുന്നവര്‍ക്കും ഹെല്‍പ്പ് ഡെസ്‌ക് നമ്പറില്‍ വിളിച്ച് വിവരങ്ങള്‍ നല്‍കുകയും പേര് റജിസ്റ്റര്‍ ചെയ്യുകയും ചെയ്യാമെന്ന് നോര്‍ക്ക സി.ഇ.ഒ അജിത് കോളശേരി മാധ്യമങ്ങളെ അറിയിച്ചു.

Indian Navy officer Vinay Narwal, who got married only a week ago, was killed in a terror attack in Pahalgam, Jammu and Kashmir. The tragic incident left 27 dead, including a Malayali tourist. NORCA sets up helpline for stranded Keralites.