ന്യൂയോർക്ക്: ChatGPT-യോട് ഉപയോക്താക്കൾ 'ദയവായി', 'നന്ദി' തുടങ്ങിയ മാന്യമായ വാക്കുകൾ ഉപയോഗിക്കുന്നത് കമ്പനിയുടെ പ്രവർത്തന ചെലവിൽ ദശലക്ഷക്കണക്കിന് ഡോളറിന്റെ വർദ്ധനവിന് കാരണമാകുന്നുവെന്ന് OpenAI സിഇഒ സാം ആൾട്ട്മാൻ വെളിപ്പെടുത്തി. സോഷ്യൽ മീഡിയ പ്ലാറ്റ്‌ഫോമായ എക്സിൽ ഉപയോക്താവ് എഐ മോഡലുകളോടുള്ള മര്യാദയുടെ ചെലവിനെക്കുറിച്ച്  സംസാരിച്ചതിന് പിന്നാലെയാണ് ആൾട്ട്മാൻ ഞെട്ടിക്കുന്ന വിവരം പുറത്തുവിട്ടത്.

ആളുകൾ ChatGPT-യോട് 'ദയവായി 'നന്ദി' എന്നിവ പറയുന്നതിലൂടെ OpenAI-ക്ക് വൈദ്യുതി ചെലവിൽ എത്ര നഷ്ടമുണ്ടായി?" എന്ന ഉപയോക്താവിന്റെ ചോദ്യമാണ് ഈ വിഷയത്തിന് തുടക്കമിട്ടത്. പോസ്റ്റ് വൈറലായതോടെ, ആൾട്ട്മാൻ മറുപടി നൽകി: "ദശലക്ഷക്കണക്കിന് ഡോളർ ഇതിനോടകം ചെലവഴിച്ചു. സം​ഗതി തമാശയായി തോന്നുമെങ്കിലും, ഇതിന് പിന്നിൽ ഗൗരവമായ വിശദീകരണമുണ്ട്.

ChatGPT-യുമായുള്ള ഓരോ ഇടപെടലും, ചെറുതോ മാന്യമോ ആയ സന്ദേശങ്ങൾ പോലും, എഐ മോഡലിൽ നിന്ന് പൂർണ്ണമായ പ്രതികരണം ആവശ്യമാക്കുന്നു. ഇതിന് ഗണ്യമായ കമ്പ്യൂട്ടേഷണൽ ശേഷിയും ഊർജ്ജവും ആവശ്യമാണ്. ഗോൾഡ്മാൻ സാക്സ് റിസർച്ച് അനുസരിച്ച്, ജനറേറ്റീവ് എഐ, വലിയ ഭാഷാ മോഡലുകൾ തുടങ്ങിയവയുടെ സങ്കീർണ്ണമായ കണക്കുകൂട്ടലുകൾ വൈദ്യുതി ഉപഭോഗം വർദ്ധിപ്പിക്കുന്നു. ഇതിന് വൻതോതിൽ ഡാറ്റ പ്രോസസ്സിംഗ്, സംഭരണം, കമ്പ്യൂട്ടേഷൻ എന്നിവ ആവശ്യമാണ്, ഇത് ഊർജ്ജ ചെലവിൽ ഗണ്യമായ വർദ്ധനവിന് കാരണമാകുന്നു.

2028-ഓടെ ഡാറ്റാ സെന്ററുകളുടെ വൈദ്യുതി ആവശ്യകതയുടെ 19 ശതമാനം എഐ-യുമായി ബന്ധപ്പെട്ടതായിരിക്കുമെന്നാണ് ഗവേഷണങ്ങൾ സൂചിപ്പിക്കുന്നത്. ChatGPT-യുടെ ജനപ്രീതി, ഗിബ്ലി-സ്റ്റൈൽ AI ആർട്ട് പോലുള്ള ട്രെൻഡുകൾ കാരണം കുതിച്ചുയരുന്ന സാഹചര്യത്തിൽ, ഈ ചെലവുകൾ കമ്പനികൾക്ക് വലിയ വെല്ലുവിളിയാണ്.