കറാച്ചി: ടി-20 ക്രിക്കറ്റിൽ പുതുയ നാഴികക്കല്ല് സ്വന്തമാക്കി ഓസ്‌ട്രേലിയൻ ഇതിഹാസ താരം ഡേവിഡ് വാർണർ. കുട്ടിക്രിക്കറ്റിൽ 13000 റൺസ് എന്ന പുതിയ നേട്ടത്തിലേക്കാണ് വാർണർ കാലെടുത്തുവെച്ചത്. പാകിസ്താൻ സൂപ്പർ ലീഗിൽ കറാച്ചി കിങ്സിന് വേണ്ടി അർദ്ധ സെഞ്ച്വറി നേടിയതോടെയാണ് വാർണർ ഈ നേട്ടം സ്വന്തമാക്കിയത്. പെഷവാർ സാൽമിക്കെതിരെ 47 പന്തിൽ 60 റൺസാണ് വാർണർ അടിച്ചെടുത്തത്. എട്ട് ഫോറുകളാണ് താരം നേടിയത്.

ടി20 ക്രിക്കറ്റിൽ 13,000 റൺസ് സ്വന്തമാക്കുന്ന ആറാമത്തെ താരമാണ് വാർണർ. ക്രിസ് ഗെയ്ൽ, അലക്സ് ഹെയ്ൽസ്, ഷോയിബ് മാലിക്, കീറോൺ പൊള്ളാർഡ്, വിരാട് കോഹ്‌ലി എന്നിവരാണ് ഇതിനു മുമ്പ് ഈ നേട്ടം കൈവരിച്ചിട്ടുള്ളത്. ഈ നാഴികക്കല്ല് സ്വന്തമാക്കുന്ന ആദ്യ ഓസ്‌ട്രേലിയൻ താരം കൂടിയാണ് വാർണർ. 

തന്റെ ക്രിക്കറ്റ് കരിയറിൽ ടി-20യിൽ 14 ടീമുകൾക്ക് വേണ്ടിയാണ് വാർണർ കളിച്ചിട്ടുള്ളത്. ഐപിഎല്ലിൽ സൺറൈസേഴ്‌സ് ഹൈദരാബാദിന് വേണ്ടിയാണ് താരം ഏറ്റവും കൂടുതൽ മത്സരങ്ങൾ കളിച്ചിട്ടുള്ളത്. ഓറഞ്ച് ആർമിക്ക് വേണ്ടി 49.56 ശരാശരിയിൽ 4,014 റൺസാണ് വാർണർ സ്വന്തമാക്കിയിട്ടുള്ളത്. ഹൈദരാബാദിനെ 2016ൽ ഐപിഎൽ കിരീടത്തിലേക്ക് നയിച്ചതും വാർണർ തന്നെയാണ്.  

ഐ‌പി‌എൽ മെഗാ ലേലത്തിൽ വാർണറിനെ ഒരു ടീമും വാങ്ങിയിരുന്നില്ല. എന്നാൽ പിഎസിഎല്ലിൽ കറാച്ചി കിങ്സിനായി കളിക്കാൻ വാർണറിന് അവസരം ലഭിക്കുകയായിരുന്നു. എന്നാൽ ടീമിനൊപ്പം ആദ്യ നാല് മത്സരങ്ങളിൽ മികച്ച പ്രകടനം നടത്താൻ മുൻ ഓസ്‌ട്രേലിയൻ താരത്തിന് സാധിച്ചിരുന്നില്ല. 12, 0, 31, 3 എന്നിങ്ങനെയാണ് വാർണർ ആദ്യ നാല് മത്സരങ്ങളിൽ നിന്നും നേടിയ സ്‌കോറുകൾ. എന്നാൽ അഞ്ചാം മത്സരത്തിൽ അർദ്ധ സെഞ്ച്വറിയും പുത്തൻ റെക്കോർഡും സ്വന്തമാക്കി ശക്തമായി തിരിച്ചുവന്നിരിക്കുകയാണ് വാർണർ. 

നിലവിൽ അഞ്ച് മത്സരങ്ങളിൽ നിന്ന് ആറ് പോയിന്റുമായി കറാച്ചി കിങ്‌സ് പോയിന്റ് പട്ടികയിൽ രണ്ടാം സ്ഥാനത്താണ് ഉള്ളത്. ഏപ്രിൽ 25ന് ക്വറ്റ ഗ്ലാഡിയേറ്റേഴ്‌സിനെതിരെയാണ് കറാച്ചി കിങ്സിന്റെ അടുത്ത മത്സരം. 

David Warner create a historical record in t20 cricket