ന്യൂഡല്‍ഹി: വാഹനാപകടത്തില്‍ മരിച്ച മകളുടെ ആദ്യ ആണ്ടിന്റെ ഭാഗമായുള്ള ചടങ്ങുകളില്‍ പങ്കെടുക്കാനായി രണ്ടാഴ്ചത്തെ പരോള്‍ തേടി മുന്‍ പോപുലര്‍ ഫ്രണ്ട് ചെയര്‍മാന്‍ മഞ്ചേരി സ്വദേശി ഒ.എം.എ സലാം. ഹരജിയില്‍ പ്രാഥമികവാദംകേട്ട ഡല്‍ഹി ഹൈക്കോടതിയിലെ ജസ്റ്റിസ് രവീന്ദ്ര ദുഡേജയുടെ ബെഞ്ച്, ഇക്കാര്യത്തില്‍ നിലപാട് അറിയിക്കാനായി എന്‍.ഐ.എക്ക് നോട്ടീസയച്ചു. ഈ മാസം 25ന് മുമ്പ് പ്രതികരണം അറിയിക്കാനാണ് നോട്ടീസിലെ ആവശ്യം. ഈ മാസം 18ന് തുടങ്ങി മെയ് രണ്ട് വരെയുള്ള ദിവസങ്ങള്‍ക്കുള്ളില്‍ നടക്കുന്ന മകള്‍ക്കായുള്ള ചടങ്ങുകളില്‍ പങ്കെടുക്കാന്‍ കസ്റ്റഡി പരോള്‍ അനുവദിക്കണമെന്നാണ് അബ്ദുല്‍ ശുക്കൂര്‍ മുണ്ടമ്പ്ര മുഖേന സമര്‍പ്പിച്ച ഹരജിയില്‍ ആവശ്യപ്പെട്ടത്. 

കോഴിക്കോട് മെഡിക്കല്‍ കോളജിലെ എംബിബിഎസ് വിദ്യാര്‍ഥിനിയായിരുന്ന മഞ്ചേരി പാലക്കുളം സ്വദേശിനി ഫാത്തിമ തസ്‌കിയ(24) കഴിഞ്ഞവര്‍ഷം ഏപ്രിലില്‍ കല്‍പ്പറ്റയിലുണ്ടായ വാഹനാപകടത്തിലാണ് മരിച്ചത്. മെഡിക്കല്‍ ഹെല്‍ത്ത് ക്ലബ് മീറ്റിങ്ങുമായി ബന്ധപ്പെട്ട് കല്‍പ്പറ്റയില്‍ പോയി തിരിച്ചുവരുന്നതിനിടെ തസ്‌കിയയും കൂട്ടുകാരിയും സഞ്ചരിച്ച സ്‌കൂട്ടര്‍ റോഡില്‍നിന്ന് താഴ്ചയിലേക്ക് മറിയുകയായിരുന്നു. മകളുടെ സംസ്‌കാരച്ചടങ്ങിനായി സലാമിന് മുമ്പ് പരോള്‍ ലഭിച്ചിരുന്നു.

പോപുലര്‍ ഫ്രണ്ട് ഓഫ് ഇന്ത്യയെ കേന്ദ്രസര്‍ക്കാര്‍ നിരോധിക്കുന്നതിനു മുന്നോടിയായി നടത്തിയ റെയ്ഡിന്റെ ഭാഗമായാണ് നിരോധനസമയത്ത് സംഘടനയുടെ ചെയര്‍മാന്‍ കൂടിയായ സലാമിനെ എന്‍ഐഎ അറസ്റ്റ് ചെയ്ത് തിഹാര്‍ ജയിലില്‍ അടച്ചത്. ഇതിനു ശേഷം രണ്ടരവര്‍ഷത്തിലേറെയായി ഒഎംഎ സലാം ജയിലില്‍ കഴിയുകയാണ്.

Daughter's death anniversary; O.M.A. Salam seeks two-week parole in Delhi High Court