ഫുട്ബോളിലെ എക്കാലത്തെയും മികച്ച താരമാരാണെന്ന് തുറന്നു പറഞ്ഞിരിക്കുകയാണ് ഫ്രഞ്ച് താരം ഉസ്മാൻ ഡെമ്പലെ. അർജന്റൈൻ ഇതിഹാസം ലയണൽ മെസിയെയാണ് ഫ്രഞ്ച് താരം ഏറ്റവും മികച്ച താരമായി തെരഞ്ഞെടുത്തത്. താൻ ഇതുവരെ കളിച്ചിട്ടുള്ളതിൽ ഏറ്റവും മികച്ച ടീം പിഎസ്ജി ആണോയെന്ന് തനിക്ക് അറിയില്ലെന്നും ഡെമ്പലെ പറഞ്ഞു. മുണ്ടോ ഡിപ്പൊർട്ടീവോക്ക് നൽകിയ അഭിമുഖത്തിലാണ് ഡെമ്പലെ ഇക്കാര്യം പറഞ്ഞത്.  

''ഇത് മികച്ചതാണോ എനിക്ക് അറിയില്ല. ഞാൻ മെസിയുടെ ബാഴ്‌സലോണയിൽ കളിച്ചിട്ടുണ്ട്. എന്റെ അഭിപ്രായത്തിൽ അദ്ദേഹമാണ് എക്കാലത്തെയും മികച്ച താരം. എന്നാൽ എനിക്ക് ഏറ്റവും നന്നായി ആസ്വദിക്കാൻ കഴിയുന്ന ടീം പിഎസ്ജിയാണ്'' ഉസ്മാൻ ഡെമ്പലെ പറഞ്ഞു. 

നിലവിൽ മേജർ ലീഗ് സോക്കർ ക്ലബായ ഇന്റർ മയാമിയുടെ താരമാണ് മെസി. കോൺകാഫ് ചാമ്പ്യൻസ് കപ്പിന്റെ സെമി ഫൈനലിലേക്ക് ഇന്റർ മയാമി മുന്നേറിയിരുന്നു. ക്വാർട്ടർ ഫൈനലിലെ രണ്ടാം പാദ മത്സരത്തിൽ ലോസ് എയ്ഞ്ചൽസ് എഫ്സിയെ ഒന്നിനെതിരെ മൂന്നു ഗോളുകൾക്ക് വീഴ്ത്തിയാണ് ഇന്റർ മയാമി സെമിഫൈനൽ യോഗ്യത നേടിയത്.

ഇരു പാദങ്ങളിലുമായി 3-2 എന്ന അഗ്രഗേറ്റ് സ്കോറിലാണ് ഇന്റർ മയാമി സെമിയിലേക്ക് മുന്നേറിയത്. മത്സരത്തിൽ ഇരട്ട ഗോൾ നെടിയായിരുന്നു മെസി തിളങ്ങിയിരുന്നത്. ഈ സീസണിൽ ഇന്റർ മയമിക്കായി ഒമ്പത് മത്സരങ്ങളിൽ നിന്നും എട്ട് ഗോളുകളും മൂന്ന് അസിസ്റ്റുകളും ആണ് മെസി സ്വന്തമാക്കിയിട്ടുള്ളത്. 

നിലവിൽ മേജർ ലീഗ് സോക്കറിൽ നാലാം സ്ഥാനത്താണ് ഇന്റർ മയാമി. ഏഴ് മത്സരങ്ങളിൽ നിന്നും നാല് വിജയവും മൂന്ന് സമനിലയും അടക്കം 15 പോയിന്റ് ആണ് മെസിയുടെയും സംഘത്തിന്റെയും കൈവശമുള്ളത്. 15 പോയിന്റുമായി കൊളംബസ് ആണ് ഒന്നാം സ്ഥാനത്തുള്ളത്. 

French player Ousmane Dembele has named Argentine legend Lionel Messi as the greatest player in football of all time