2022ലാണ് ക്രിസ്റ്റ്യാനോ റൊണാൾഡോ മാഞ്ചസ്റ്റർ യുണൈറ്റഡിൽ നിന്നും സഊദി പ്രൊ ലീഗ് ക്ലബായ അൽ നസറിലെത്തുന്നത്. ഇപ്പോൾ ഈ സമയങ്ങളിൽ റൊണാൾഡോ അൽ നസറിന് പകരം ആഴ്സണലിലേക്ക് പോയിരുന്നെങ്കിൽ മൂന്ന് ഇപിഎൽ കിരീടങ്ങൾ നേടാൻ സാധിക്കുമായിരുന്നുവെന്ന് പറഞ്ഞിരിക്കുകയാണ് ഇംഗ്ലീഷ് പോഡ്‌കാസ്റ്റർ പിയേഴ്സ് മോർഗൻ. 

''ക്രിസ്റ്റ്യാനോ റൊണാൾഡോ യുണൈറ്റഡ് വിട്ട് അൽ നസറിലേക്ക് പോവാൻ ആഗ്രഹിച്ച സമയങ്ങളിൽ എന്റെ ഉപദേശം സ്വീകരിച്ചുകൊണ്ട് ആഴ്‌സണൽ അദ്ദേഹത്തെ ടീമിലെത്തിച്ചിരുന്നെങ്കിൽ എന്ന് ഞാൻ ആഗ്രഹിക്കുന്നു. അദ്ദേഹം ആഴ്‌സണൽ ടീമിൽ ഉണ്ടായിരുന്നെങ്കിൽ ഒരുപക്ഷെ മൂന്ന് ലീഗ് കിരീടങ്ങൾ നേടുമായിരുന്നു. അദ്ദേഹം ഇപ്പോഴും ലോകത്തിലെ ഏറ്റവു മികച്ച ഫിനിഷർമാരിൽ ഒരാളാണ്'' പിയേഴ്സ് മോർഗൻ എക്‌സിൽ അക്കൗണ്ടിൽ കുറിച്ചു. 

റൊണാൾഡോയുടെ വരവോടെ സഊദി ലീഗിൽ വലിയ മാറ്റങ്ങളാണ് സംഭവിച്ചിട്ടുള്ളത്. റൊണാൾഡോയുടെ കടന്നുവരവോടെ സഊദി ഫുട്ബോളിന് ലോക ഫുട്ബോളിൽ കൃത്യമായ ഒരു മേൽവിലാസം സൃഷ്ടിച്ചെടുക്കാൻ സാധിച്ചിരുന്നു. റൊണാൾഡോക്ക് പിന്നാലെ യൂറോപ്പിലെ വിവിധ ക്ലബ്ബുകളിലെ പ്രധാന താരങ്ങൾ ചേക്കേറിയിരുന്നു. കരിം ബെൻസിമ, നെയ്മർ, സാദിയോ മാനെ, റിയാദ് മെഹറസ്, റോബർട്ടോ ഫിർമീഞ്ഞോ തുടങ്ങിയ പ്രധാന താരങ്ങളും സഊദിയിലേക്ക് മാറിയിരുന്നു. 

റൊണാൾഡോ അൽ നസറിനായി പ്രായത്തെ പോലും വെല്ലുന്ന പോരാട്ടവീര്യങ്ങളാണ് നടത്തിക്കൊണ്ടിരിക്കുന്നത്. അൽ നസറിനായി സഊദി ലീഗിൽ ഈ സീസണിൽ 23 ഗോളുകളാണ് റൊണാൾഡോ അടിച്ചുകൂട്ടിയിരിക്കുന്നത്. നിലവിലെ ലീഗിലെ ഗോൾ വേട്ടക്കാരുടെ പട്ടികയിൽ ഒന്നാമതുള്ളതും റൊണാൾഡോ തന്നെയാണ്. സഊദി ക്ലബ്ബിനൊപ്പമുള്ള റൊണാൾഡോയുടെ കരാർ 2026ലാണ് അവസാനിക്കുന്നത്. അടുത്തിടെയാണ് റൊണാൾഡോ ടീമിനൊപ്പമുള്ള കരാർ പുതുക്കിയത്. 

Piers Morgan talks If Ronaldo had joined Arsenal instead of Al Nasr he would have won three trophies