ചെന്നെെ: തമിഴ്‌നാട്ടില്‍ വീണ്ടും ഗവര്‍ണര്‍- സര്‍ക്കാര്‍ പോര് മുറുകുന്നു. സ്റ്റാലിന്‍ സര്‍ക്കാര്‍ ദളിത് വിഭാഗത്തോട് അനുഭാവം കാണിക്കുന്നില്ലെന്നും, സംസ്ഥാനത്ത് ദളിതരോടുള്ള ആക്രമണങ്ങള്‍ വര്‍ധിക്കുകയാണെന്നും ഗവര്‍ണര്‍ ആര്‍എന്‍ രവി കുറ്റപ്പെടുത്തി. അംബേദ്കര്‍ ജയന്തി ആഘോഷ പരിപാടിയിലാണ് ഗവര്‍ണറുടെ പരാമര്‍ശം. 

സാമൂഹിക നീതിയില്‍ മുന്‍പന്തിയില്‍ നില്‍ക്കുന്നുവെന്ന് അവകാശപ്പെടുന്ന തമിഴ്‌നാട്ടില്‍ നിന്നും കേള്‍ക്കുന്ന കഥകള്‍ ഹൃദയഭേദകമാണ്. അംബേദ്കറുടെ സ്വപ്‌നങ്ങള്‍ എത്രത്തോളം നാട്ടില്‍ നടപ്പായിട്ടുണ്ടെന്ന് ചര്‍ച്ച ചെയ്യപ്പെടേണ്ടതാണ്. തെരുവില്‍ ചെരുപ്പിട്ട് നടന്നതിന്റെ പേരിലും, ബൈക്കില്‍ സഞ്ചരിച്ചതിന്റെ പേരിലുമെല്ലാം ദളിതര്‍ ആക്രമിക്കപ്പെടുകയാണ്. 

കള്ളക്കുറിച്ചിയിലെ വിഷമദ്യ ദുരന്തത്തില്‍ ഇരയായവരില്‍ ഭൂരിഭാഗവും ദളിതരായിരുന്നു. കഴിഞ്ഞ കുറച്ച് വര്‍ഷങ്ങളില്‍ ദളിതര്‍ക്കെതിരെയുള്ള ആക്രമണങ്ങള്‍ ഗണ്യമായി വര്‍ധിച്ചിട്ടുണ്ട്. ഇത്തരം കേസുകളില്‍ ശിക്ഷിക്കപ്പെടുന്നവരുടെ എണ്ണത്തില്‍ ദേശീയ ശരാശരിയെക്കാളും താഴെയാണ് തമിഴ്‌നാടിന്റെ സ്ഥാനം. ഗവര്‍ണര്‍ പറഞ്ഞു. 

മാത്രമല്ല വസ്തുത നിരത്തിയാണ് താന്‍ സംസാരിക്കുന്നതെന്നും, ഇവ രാഷ്ട്രീയ ആരോപണങ്ങളായി കാണേണ്ട കാര്യമില്ലെന്നും ഗവര്‍ണര്‍ കൂട്ടിച്ചേര്‍ത്തു. 

അതേസമയം ഗവര്‍ണറുടെ പ്രസ്താവനക്കെതിരെ ഡിഎംകെ നേതാവും, തമിഴ്‌നാട് വിദ്യാഭ്യാസ മന്ത്രിയുമായ ഗോവി ചേഴിയാന്‍ രംഗത്തെത്തി. സര്‍ക്കാരിനെ ലക്ഷ്യം വെച്ച് കള്ളങ്ങള്‍ പ്രചരിപ്പിക്കാനാണ് ഗവര്‍ണര്‍ ലക്ഷ്യമിടുന്നതെന്ന് അദ്ദേഹം പറഞ്ഞു. മാത്രമല്ല ബിജെപി ഭരിക്കുന്ന ബിഹാറിലും, ഉത്തര്‍പ്രദേശിലുമാണ് ദളിത് ആക്രമണങ്ങള്‍ പെരുകുന്നതെന്നും മന്ത്രി കൂട്ടിച്ചേര്‍ത്തു. അംബേദ്കറെ ഇകഴ്ത്തി കൊണ്ട് കേന്ദ്ര ആഭ്യന്തര മന്ത്രി അമിത് ഷാ പാര്‍ലമെന്റില്‍ സംസാരിച്ചപ്പോള്‍ ഗവര്‍ണര്‍ എന്തുകൊണ്ട് പ്രതികരിച്ചില്ലെന്നും മന്ത്രി ചോദിച്ചു.