മാങ്ങാക്കാലമാണല്ലോ ഇത്. മൂപ്പെത്തി തുടങ്ങി പലയിടത്തും മാങ്ങകള്‍. മാങ്ങകള്‍ പലതരമാണ്. പഴുപ്പിക്കാന്‍ പറ്റുന്നത്. പഴുക്കുമ്പോഴേക്കും പുഴു വരുന്നത്. കടുത്ത പുളിയുള്ളത്. അങ്ങിനെ പലവിധം. ഏത് തരം മാങ്ങയായാലും ഉലുവ മാങ്ങക്ക് ഉപയോഗിക്കാം.

പേര് പോലെ തന്നെ ഉലുവയുടെ രുചിയും എണ്ണയുടെ കൊതിപ്പിക്കുന്ന മണവും ചേര്‍ന്ന ഒരു ഗംഭീരന്‍ വിഭവമാണ് ഉലുവ മാങ്ങ. അച്ചാര്‍ വംശത്തില്‍ പൂര്‍ണമായും ഉള്‍പെടുത്താനാവില്ലെങ്കിലും ഇവനെ കൂട്ടി ചോറുണ്ണാന്‍ ബഹുരസമാണ്.

ഉലുവ മാങ്ങ തയ്യാറാക്കിയാലോ

ആവശ്യമുള്ള സാധനങ്ങള്‍ (ഏകദേശ കണക്കാണ്. മാങ്ങയുടെപുളയനുസരിച്ച് ഉപ്പിന്റെയും മറ്റും അളവില്‍ മാറ്റം വരും)
മാങ്ങ 3 kg
ഉപ്പ് 300-350 g (കല്ലുപ്പ് ഉപയോഗിക്കുന്നതാണ് നല്ലത്)
കശ്മീരി മുളകും നാടന്‍ മുളകും പകുതി പകുതിയളവില്‍ 300-350 g
ഉലുവപ്പൊടി 150-200g(ഉലുവ വറുത്ത് പൊടിച്ചത്)
എള്ളെണ്ണ ഒരുക്കപ്പ് (ചൂടാക്കി തണുപ്പിച്ചത്)

മാങ്ങ രണ്ടു ഭാഗവും നെടുകെ കീറുക. (പള്ളക്കഷ്ണം). 

ഒരു പാത്രത്തില്‍ മുളക് പൊടി , ഉലുവപ്പൊടി, ഉപ്പ് ചേര്‍ത്ത് നന്നായി ഇളക്കി യോജിപ്പിക്കുക. അത്യാവശ്യം വീതി വിസ്താരമുള്ള പാത്രം എടുക്കുക. പിന്നെ മാങ്ങ ഓരോന്നായി ഇട് പൊടിയില്‍ കുടഞ്ഞെടുക്കുക. മാങ്ങയില്‍ ഏതാണ്ട് നന്നായി പുരളുന്ന വിധത്തില്‍. മീതെ ചൂടാക്കി(തിളക്കേണ്ട. ഒന്ന് പുക വന്നാല്‍ മതി) തണുപ്പിച്ച നല്ലെണ്ണ (എള്ളെണ്ണ) അരക്കപ്പ് മാങ്ങയില്‍ ഒഴിക്കുക. പതിയെ ഒരു കുപ്പിയിലേക്ക് മാറ്റുക. മുകളില്‍ വീണ്ടും ശേഷിക്കുന്ന എണ്ണ ഒഴിക്കുക.

 കൂടുതല്‍ കാലം സൂക്ഷിച്ചു വെക്കേണ്ടവര്‍ മുകളില്‍ എണ്ണത്തുണി(എണ്ണയില്‍ വൃത്തിയുള്ള വെള്ളത്തുണിക്കഷ്ണം മുക്കിയത്) അല്ലെങ്കില്‍ വാഴയിലച്ചീന്ത് വാട്ടി എണ്ണയില്‍ മുക്കി മുകളില്‍ ഇടുക. തുണി കൊണ്ടോ പ്ലാസ്റ്റിക് ഷീറ്റ് കൊണ്ടോ വായ മൂടിക്കെട്ടി വെക്കുക. മൂന്നോ നാലോ മാസം കഴിഞ്ഞ് ഉപയോഗിച്ച് തുടങ്ങാം. 

കായത്തിന്റെ പൊടിയും ചേര്‍ക്കാവുന്നതാണ്.