ബെംഗളൂരു: കര്‍ണാടകയിലെ ദാവണഗറെയിൽ ഉണ്ടായ അതിക്രൂരമായ കൂട്ടബലാത്സംഗ കേസിൽ മൂന്ന് പേരെ പൊലീസ് അറസ്റ്റ് ചെയ്തു. സ്വകാര്യ ബസിൽ രണ്ട് ആണ്‍കുഞ്ഞുങ്ങളുടെ മുന്നിലിട്ട് അമ്മയെ ബലാത്സംഗം ചെയ്ത സംഭവത്തിൽ ബസിലെ ഡ്രൈവർ പ്രകാശ് മഡിവാലറ, കണ്ടക്ടർ സുരേഷ്, സഹായി രാജശേഖർ എന്നിവരാണ് അറസ്റ്റിലായത്. പ്രതികളിൽ ഒരാള്‍ക്കെതിരെ മുമ്പ് ഏഴ് ക്രിമിനൽ കേസുകൾ ഉണ്ടെന്ന് അന്വേഷണത്തിൽ വ്യക്തമായി.

സ്ത്രീ ദാവണഗരെയിലെ പ്രശസ്തമായ ഉച്ചാങ്കി ദുർഗാ ക്ഷേത്രം സന്ദർശിച്ചതിന് ശേഷം കുട്ടികളോടൊപ്പം വീട്ടിലേക്ക് മടങ്ങുകയായിരു ന്നു. രാത്രി സമയത്തെ അവസാന ബസ്സിൽ അവർ യാത്ര ചെയ്‌തു. ബസിൽ ഏഴോ എട്ടോ യാത്രക്കാർ മാത്രമായിരുന്നു. മറ്റ് യാത്രക്കാർ ഇറങ്ങിയതിന് പിന്നാലെയാണ് മൂന്ന് പ്രതികളും ചേർന്ന് ക്രൂരത കാണിച്ചത്.

കുട്ടികളുടെ വായിൽ തുണി തിരുകി മൂടിക്കെട്ടിയശേഷമാണ് അമ്മയെ ബലാത്സംഗം ചെയ്തത്. ബസ് നിര്‍ത്തിയിട്ട് പ്രതികൾ അക്രമം തുടരുമ്പോള്‍, വഴിയാത്രക്കാരും സമീപവാസികളും ഓടിയെത്തിയാണ് സ്ത്രീയെ രക്ഷപ്പെടുത്തിയത്.

ഇതേക്കുറിച്ച് പരാതിപ്പെടാനെത്തിയപ്പോൾ ആദ്യം പൊലീസ് കേസ് എടുക്കാൻ മടികാട്ടിയതായി പരാതി ഉയർന്നിട്ടുണ്ട്. സ്ത്രീയുടെ ഒപ്പ് വെളള കടലാസിൽ എഴുതി വാങ്ങിയെന്നും, പൊലീസ് 2000 രൂപ നൽകുകയും കീറിയ വസ്ത്രങ്ങൾക്ക് പകരം പുതിയത് വാങ്ങാൻ പറഞ്ഞുവെന്നും പരാതിയുണ്ട്. “സംഭവം പുറത്തറിഞ്ഞാൽ പ്രശ്‌നമാകാം, മുന്നോട്ട് ജീവിക്കാൻ പ്രയാസമാകും” എന്നുമായിരുന്നു പൊലീസിന്റെ പ്രതികരണം എന്നും സ്ത്രീ പറഞ്ഞു.

 കുട്ടികളോടൊപ്പം ക്ഷേത്ര പരിസരത്ത് ദിവസങ്ങളോളം കഴിയുന്ന സ്ത്രീയെ പ്രാദേശിക ദളിത് നേതാക്കൾ ശ്രദ്ധിക്കുകയായിരുന്നു. അവരാണ് വിജയനഗര എസ്‌പിയെ നേരിട്ട് സമീപിച്ച് വിവരം അറിയിച്ചത്. ഇതിന് പിന്നാലെ പൊലീസ് എഫ്ഐആർ രജിസ്റ്റർ ചെയ്ത് പ്രതികളെ അറസ്റ്റ് ചെയ്തു.

സംഭവം സംസ്ഥാനത്താകെ നടുക്കം സൃഷ്ടിച്ചിരിക്കുകയാണ്. പീഡനത്തിനിരയായ സ്ത്രീക്കും കുട്ടികൾക്കും താത്കാലിക സംരക്ഷണവും കൗൺസിലിങും നൽകാനുള്ള നടപടികൾ ആരംഭിച്ചതായി അധികൃതർ അറിയിച്ചു.