മലപ്പുറം: സംസ്ഥാനത്ത് തൊഴിൽ വകുപ്പ് ഏർപ്പെടുത്തിയ അതിഥി പോർട്ടലിൽ കഴിഞ്ഞ അഞ്ചുമാസത്തിനിടെ രജിസ്റ്റർ ചെയ്തത് 3.72 ലക്ഷം ഇതരസംസ്ഥാന തൊഴിലാളികൾ. കഴിഞ്ഞ ഒക്ടോബർ മുതൽ ഈമാസം 14 വരെയായി പോർട്ടലിൽ രജിസ്റ്റർ ചെയ്തത് 3,72,088 അതിഥി തൊഴിലാളികളാണ്. ഇവരിൽ സ്ത്രീകളും ഉൾപ്പെടും.

അതിഥി തൊഴിലാളികളുടെ തൊഴിലിട പ്രശ്‌നങ്ങൾ പരിഹരിക്കുന്നതിനും അക്രമസ്വഭാവങ്ങളും ലഹരി വിൽപ്പനയും അധികരിച്ചതും വിവിധ ക്രിമിനൽ കേസുകളിൽപ്പെട്ടവർ കേരളത്തിലേക്ക് വരുന്നത് കണ്ടെത്തുന്നതിനുമാണ് അതിഥി പോർട്ടൽ രജിസ്‌ട്രേഷൻ നിർബന്ധമാക്കിയത്. മൊബൈൽ ആപ്ലിക്കേഷൻ വഴിയാണ് പോർട്ടൽ പ്രവർത്തിക്കുന്നത്. അതിഥി തൊഴിലാളികളുടെ പേര്, മൊബൈൽ നമ്പർ, വയസ്, ലിംഗം, ജോലി, മാതൃഭാഷ, മേൽവിലാസം, സംസ്ഥാാനം, ജില്ലാ, പൊലിസ് സ്റ്റേഷൻ, കേരളത്തിൽ എവിടെ താമസിക്കുന്നു തുടങ്ങിയവ വിവരങ്ങളാണ് പോർട്ടലിൽ രേഖപ്പെടുത്തുന്നത്. തൊഴിൽ ഇടങ്ങളിലെ പ്രശ്‌നങ്ങളും രേഖപ്പെടുത്താനാകും.

രജിസ്റ്റർ ചെയ്തവരിൽ കൂടുതൽ പശ്ചിമ ബംഗാളിൽ നിന്നുള്ളവരാണ് ( 1,23,755). അസം  (65,313), ബിഹാർ (51,063), ഒഡിഷ (45,212), ജാർഖണ്ഡ് (30,392), ഉത്തർപ്രദേശ് (18,354), തമിഴ്‌നാട് (15,763), മധ്യപ്രദേശ് (6,286), രാജസ്ഥാൻ (1,589) എന്നിങ്ങനെയാണ് രജിസ്റ്റർ ചെയ്തത്. സംസ്ഥാനത്ത് അതിഥി തൊഴിലാഴിലാളികളുടെ പരസ്പരമുള്ള ഏറ്റുമുട്ടലിൽ കൊലപാതകങ്ങളടക്കം നിത്യസംഭവങ്ങളാണ്. അതിഥി തൊഴിലാളികളെ എളുപ്പത്തിൽ തിരിച്ചറിയുന്നതിനായി ആധാർ ലിങ്ക്ഡ് ബയോമെട്രിക് തിരിച്ചറിയൽ രേഖ നൽകാനാണ് സർക്കാർ പദ്ധതി.