ആശാവർക്കർമാർക്കെതിരേ മന്ത്രി ആർ. ബിന്ദു. കേന്ദ്രത്തോട് ആവശ്യങ്ങൾ പറയാൻ നട്ടെല്ല് വേണമെന്നും കേന്ദ്രമന്ത്രി വരുമ്പോൾ 'മണിമുറ്റത്താവണിപ്പന്തൽ' പാട്ട് പാടുകയല്ല വേണ്ടതെന്നും മന്ത്രി പറഞ്ഞു. ആശാവർക്കർമാർക്ക് അനുകൂലമായിട്ടുള്ള നിലപാടെടുത്തിട്ടുള്ള പ്രസ്ഥാനമാണ് ഇടതുസർക്കാർ. അവരുടെ ആവശ്യങ്ങൾ നന്നായി കേട്ടിട്ടുള്ളവരും ഇടത് സർക്കാർ തന്നെയാണ്. നേരത്തെ എസ്.യു.സിയുടെ നേതൃത്വത്തിലുള്ള ഏതാനും ആശാപ്രവർത്തകരാണ് സമരം നടത്തിയിരുന്നത്. എന്നാൽ, ഇപ്പോൾ ബി.ജെ.പിയുടെ ബി.എം.എസാണ് സമര നോട്ടിസ് കൊടുത്തിരിക്കുന്നത്. കേന്ദ്രസർക്കാർ മുമ്പാകെ ഒരു ആവശ്യവും ഉന്നയിക്കുന്നില്ല. പ്രതിപക്ഷ അംഗങ്ങളും ഒന്നായി പോയി അവർക്ക് പിന്തുണ പ്രഖ്യാപിച്ചു. ഇടതുവിരുദ്ധ സംഘടനകളെല്ലാം ആ പാവപ്പെട്ട സ്ത്രീകളെ ഉപയോഗിക്കുകയാണെന്നും മന്ത്രി പറഞ്ഞു.

വൈകാതെ മന്ത്രി ആർ. ബിന്ദുവിന് മറുപടിയുമായി സമരം ചെയ്യുന്ന ആശമാർ രംഗത്തെത്തി. നട്ടെല്ല് ഉള്ളതുകൊണ്ടാണ് 41 ദിവസം സമരം കിടന്നതെന്ന് ആശാവർക്കർമാരുടെ സമരസമിതി നേതാവ് കെ.പി റോസമ്മ പറഞ്ഞു. ആവശ്യങ്ങൾ കേന്ദ്രസർക്കാരിനോട് പറയാൻ നട്ടെല്ല് വേണമെന്ന  മന്ത്രി ബിന്ദുവിൻ്റെ  പ്രസ്താവനയ്ക്ക് പിന്നാലെയാണ് പ്രതികരണം. അപഹസിച്ചു പറയാനേ മന്ത്രിക്ക് അറിയൂ. മുഖ്യമന്ത്രി വന്നിരുന്നെങ്കിലും പാട്ടുപാടുമായിരുന്നു. എന്തുകൊണ്ടാണ് മുഖ്യമന്ത്രിയെ വിടാതിരുന്നതെന്നും ആശമാർ ചോദിച്ചു. 
കേന്ദ്രമന്ത്രി സുരേഷ് ഗോപി സമരപ്പന്തലിലെത്തിയപ്പോൾ പാട്ടുപാടി എന്നായിരുന്നു മന്ത്രി ബിന്ദുവിന്റെ പരാമർശം.