തിരുവനന്തപുരം: തിരുവനന്തപുരം മേയർ ആര്യ രാജേന്ദ്രനെതിരെ സ്ത്രീത്വത്തെ അപമാനിക്കുന്ന തരത്തിൽ സമൂഹമാധ്യമങ്ങളിൽ പരാമർശം നടത്തിയ സംഭവത്തിൽ ചാണക്യ ന്യൂസ് ടിവി ഓൺലൈൻ ചാനൽ ഉടമ അറസ്റ്റിൽ. നിലമ്പൂർ സ്വദേശിയായ വി കെ ബൈജുവിനെ ആണ് പൊലീസ് പിടികൂടിയത്. മേയർ ആര്യ രാജേന്ദ്രൻ നൽകിയ പരാതിയിന്റെ അടിസ്ഥാനത്തിലായിരുന്നു നടപടി.

തിരുവനന്തപുരം സൈബർ ക്രൈം പൊലീസ് അറസ്റ്റ് ചെയ്ത പ്രതിയെ കോടതി റിമാൻഡ് ചെയ്തു. ചാണക്യ ന്യൂസ് ടിവി എന്ന ഓൺലൈൻ ചാനലും ബന്ധപ്പെട്ട ഫേസ്ബുക്ക് പേജും പ്രവർത്തിപ്പിക്കുന്ന ബൈജു, നിരന്തരം സ്ത്രീകളെ അപമാനിക്കുന്ന തരത്തിലുള്ള പരാമർശങ്ങൾ പ്രചരിപ്പിച്ചതായി പൊലീസ് റിപ്പോർട്ട്. അമരമ്പലം, പെരിന്തൽമണ്ണ, മഞ്ചേരി എന്നിവിടങ്ങളിലെ വിവിധ പൊലീസ് സ്റ്റേഷനുകളിൽ ഇയാൾക്കെതിരെ സമാനമായ നിരവധി കേസുകൾ നിലവിലുണ്ടെന്ന് അധികൃതർ വ്യക്തമാക്കി.