അജ്മാന്‍: റോഡ് സുരക്ഷ ശക്തമാക്കാന്‍ ലക്ഷ്യമിട്ടുകൊണ്ട് പുതിയ പദ്ധതി അവതരിപ്പിച്ചിരിക്കുകയാണ് അജ്മാന്‍.  ഇതിന്റെ ഭാഗമായി ട്രാഫിക് നിയമലംഘനങ്ങള്‍ റിപ്പോര്‍ട്ട് ചെയ്യുന്ന താമസക്കാരെ ഇനിമുതല്‍ അജ്മാന്‍ പൊലിസ് ആദരിക്കും. ഇത്തരത്തില്‍ താമസക്കാരെ പ്രോത്സാഹിപ്പിക്കുകയും മാറ്റം വരുത്തുന്നവരെ ആദരിക്കുകയും ചെയ്യുന്നതിലൂടെ ഗതാഗതം കൂടുതല്‍ കാര്യക്ഷമമാകുമെന്നാണ് കരുതുന്നത്.

ഗതാഗത നിയമലംഘനങ്ങള്‍ റിപ്പോര്‍ട്ട് ചെയ്യുന്നതിലൂടെ റോഡ് സുരക്ഷ വര്‍ധിപ്പിക്കുന്നതില്‍ അജ്മാന്‍ പൊലിസുമായി ഫലപ്രദമായി സഹകരിച്ചതിന് നിരവധി താമസക്കാരെ അജ്മാന്‍ പൊലിസ് ഡെപ്യൂട്ടി കമാന്‍ഡര്‍ഇന്‍ചീഫ് ബ്രിഗേഡിയര്‍ ജനറല്‍ ഖാലിദ് മുഹമ്മദ് അല്‍ നുഐമി ആദരിച്ചു.

റോഡ് സുരക്ഷയും വര്‍ധിപ്പിക്കുന്നതില്‍ പ്രധാന പങ്കുവഹിച്ച നിരവധി സഹകാരികള്‍ക്ക് അദ്ദേഹം സര്‍ട്ടിഫിക്കറ്റുകള്‍ സമ്മാനിച്ചു. നിയമലംഘനങ്ങള്‍ റിപ്പോര്‍ട്ട് ചെയ്യുന്നതിനായി അജ്മാന്‍ പൊലിസിന്റെ മൊബൈല്‍ ആപ്പ് വഴി റോഡിലെ ഡ്രൈവര്‍മാര്‍ നടത്തുന്ന ഗതാഗത നിയമലംഘനങ്ങള്‍ റിപ്പോര്‍ട്ട് ചെയ്തതിനാണ് ഇവര്‍ക്ക് സര്‍ട്ടിഫിക്കറ്റ് സമ്മാനിച്ചിട്ടുള്ളത്. അജ്മാന്‍ പൊലിസുമായുള്ള സഹകരണത്തിനും നിയമലംഘകരെ റിപ്പോര്‍ട്ട് ചെയ്തുകൊണ്ട് പൊലിസിനെ പിന്തുണച്ചതിനും ബഹുമതി ലഭിച്ചവരെ ബ്രിഗേഡിയര്‍ ജനറല്‍ അല്‍ നുഐമി പ്രശംസിച്ചു.

അവരുടെ സേവനത്തോടുള്ള വിലമതിപ്പ്, സമൂഹത്തിനും മറ്റ് അംഗങ്ങള്‍ക്കും ഉയര്‍ന്ന തലത്തിലുള്ള സുരക്ഷയും ഭദ്രതയും കൈവരിക്കുന്നതിന് സംഭാവന നല്‍കാന്‍ അവരെയും മറ്റുള്ളവരെയും പ്രേരിപ്പിക്കുമെന്ന് അദ്ദേഹം പ്രത്യാശിച്ചു. അവാര്‍ഡ് ജേതാക്കള്‍ അജ്മാന്‍ പൊലിസിന് ആത്മാര്‍ത്ഥമായ നന്ദിയും അഭിനന്ദനവും അറിയിക്കുകയും സുരക്ഷ നിലനിര്‍ത്തുന്നതിന് അധികാരികള്‍ക്ക് തുടര്‍ച്ചയായ പിന്തുണ നല്‍കുമെന്ന് ഉറപ്പ് നല്‍കുകയും ചെയ്തു.

Respect to residents who commit traffic violations in this emirate