തിരുവനന്തപുരം: പാലക്കാട്, ചേലക്കര നിയമസഭാ മണ്ഡലങ്ങളിലും വയനാട് ലോക്‌സഭാ മണ്ഡലത്തിലും ബി.ജെ.പിയെ മുഖ്യശത്രുവായി ചൂണ്ടിക്കാട്ടി പ്രചാരണം നടത്താൻ എൽ.ഡി.എഫ് യോഗത്തിൽ തീരുമാനം. കേന്ദ്രസർക്കാരിന്റെ കേരളവിരുദ്ധ മനോഭാവം ഉയർത്തിക്കാട്ടി പ്രചാരണം നടത്താനാണ് നീക്കം.  സംസ്ഥാനത്തിനുമേൽ അനൗദ്യോഗിക സാമ്പത്തിക ഉപരോധം ഏർപ്പെടുത്താനുള്ള കേന്ദ്രസർക്കാരിന്റെ ശ്രമം ജനങ്ങളോട് വിശദീകരിക്കും. 

കൂടാതെ വയനാട്ടിലെ പുനരധിവാസ പദ്ധതികൾക്ക് ധനസഹായം പ്രഖ്യാപിക്കുന്നതിൽ കേന്ദ്ര സർക്കാരിന്റെ അലംഭാവവും എടുത്തുകാട്ടും. ബി.ജെ.പിയെ മുഖ്യശത്രുവാക്കി പ്രചാരണം നടത്തിയാൽ മതേതര- ന്യൂനപക്ഷ വോട്ടുകൾ നേടിയെടുക്കാനാകുമെന്നാണ് എൽ.ഡി.എഫ് കണക്കുകൂട്ടൽ.   പ്രതിപക്ഷ നേതാവ് വി.ഡി സതീശനെതിരേ  ഇടതുപക്ഷ സ്വതന്ത്ര സ്ഥാനാർഥിയും കോൺഗ്രസിൽ നിന്ന് മറുകണ്ടം ചാടിയ നേതാവുമായ പി. സരിന്റെ ബി.ജെ.പി ബാന്ധവ ആരോപണം പ്രചാരണത്തിന് കരുത്തുപകരുമെന്നാണ് എൽ.ഡി.എഫ് വിലയിരുത്തൽ.

ചേലക്കരയിൽ മുൻ കോൺഗ്രസ് നേതാവ് എൻ.കെ സുധീർ മത്സരത്തിനിറങ്ങിയതോടെ ചേലക്കര നിലനിർത്താനുള്ള സാധ്യത തെളിഞ്ഞുവെന്നാണ് എൽ.ഡി.എഫിന്റെ വാദം. പാലക്കാട് സരിനിലൂടെ തിരിച്ചുപിടിക്കാൻ കഴിയുമെന്നാണ് എൽ.ഡി.എഫ് യോഗത്തിന്റെ വിലയിരുത്തൽ. കഴിഞ്ഞതവണ ബി.ജെ.പിയിലേക്ക് ഒഴുകിയ വോട്ടുകളും കോൺഗ്രസിലെ ഒരുവിഭാഗത്തിന്റെ വോട്ടുകളും സരിനിലൂടെ തങ്ങളിലേക്ക് എത്തുമെന്നാണ് ഇടതുമുന്നണിയുടെ വിലയിരുത്തൽ.

 ഒരുകാലത്ത് ചെങ്കോട്ടയായിരുന്ന പാലക്കാട് കഴിഞ്ഞ 10 വർഷമായി ഇടതുപക്ഷ വോട്ടുകളുടെ ചോർച്ചയ്ക്ക് സാക്ഷ്യം വഹിക്കുകയാണ്. പ്രധാന സമുദായങ്ങൾക്കിടയിൽ ബി.ജെ.പിക്കും കോൺഗ്രസിനുമുള്ള സ്വാധീനം മണ്ഡലത്തിൽ ഇടതുപക്ഷത്തിനില്ല.