സ്വന്തം ലേഖകന്‍

കൊച്ചി: വാല്‍ക്കണ്ണെഴുതി വനപുഷ്പം ചൂടിയ പാര്‍വതി മന്ദിരത്തില്‍ കസ്തൂരി മണക്കുന്നു, കാലം തൊഴുതുനില്‍ക്കുമ്പോള്‍, അത്തറിന്‍ മണം പൂശി മലയാള സംഗീതത്തിന്റെ മാസ്റ്റര്‍ ചക്രക്കസേരയില്‍ പൂമുഖത്തേക്കെത്തി. മാനത്തിന്‍ മുറ്റത്തെ, പാടാത്ത വീണയെ പാടിപ്പിച്ച, മുത്തിലും മുത്തായ മണിമുത്തെന്ന് മലയാളം വാഴ്ത്തുന്ന അര്‍ജുനന്‍ മാസ്റ്റര്‍ ശതാഭിഷിക്തനായ മുഹൂര്‍ത്തം മാഷിന്റെ സംഗീതത്തെ പ്രണയിക്കുന്നവര്‍ ആഘോഷമാക്കി. ആയിരം പൂര്‍ണചന്ദ്രന്‍മാരെ ദര്‍ശിച്ച സംഗീത സാഗരമായ എം.കെ അര്‍ജുനന്‍ മാസ്റ്റര്‍ തന്റെ 84ാം പിറന്നാള്‍ ആഘോഷിച്ചത് കൊച്ചിയിലെ സ്വവസതിയായ പാര്‍വതി മന്ദിരത്തില്‍ വച്ചാണ്. പിറന്നാള്‍ അനുമോദനങ്ങളുമായി സാംസ്‌കാരിക നായകര്‍ക്കൊപ്പം ആരാധകരും എത്തിയതോടെ ഉത്സവപ്രതീതി. 1969ല്‍ താന്‍ ഈണം നല്‍കിയ റസ്റ്റ് ഹൗസ് എന്ന സിനിമയിലെ 'പൗര്‍ണമി ചന്ദ്രിക തൊട്ടുവിളിച്ചു' എന്ന ഗാനം മാസ്റ്റര്‍ ഓര്‍മയില്‍ നിന്ന് ഓര്‍ത്തെടുത്ത് വിറയാര്‍ന്ന സ്വരത്തില്‍ ആരാധകര്‍ക്കായി പാടി. തുടര്‍ന്ന് പുതുതലമുറയിലെ കുഞ്ഞു ഗായകരുടെ സംഗീതാര്‍ച്ചന നടന്നു.

1946 മാര്‍ച്ച് ഒന്നാം തീയതി ഫോര്‍ട്ടുകൊച്ചിയില്‍ ചിരട്ടപ്പാലത്ത് കൊച്ചു കുഞ്ഞിന്റെയും പാര്‍വതിയുടെയും മകനായാണ് അര്‍ജുനന്‍ മാഷിന്റെ ജനനം. നാടകഗാനങ്ങളിലൂടെയാണ് ചലച്ചിത്ര സംഗീത ലോകത്ത് നിറഞ്ഞുനിന്നത്. മഹാകവി കാളിദാസ സാംസ്‌കാരിക വേദിയുടെ ആഭിമുഖ്യത്തിലായിരുന്നു ശതാഭിഷേക ചടങ്ങുകള്‍ സംഘടിപ്പിച്ചത്. ഡോ. കെ.എസ് രാധാകൃഷ്ണന്റെ നേതൃത്വത്തില്‍ മാസ്റ്ററെ പൊന്നാട അണിയിച്ച് ഫലമൂലാധികള്‍ സമര്‍പ്പിച്ചാണ് ആരാധകവൃന്ദം ആദരിച്ചത്.