കയ്പമംഗലം: കേന്ദ്ര പുകയില നിയന്ത്രണ നിയമം ശക്തിപ്പെടുത്തുന്നതിന്റെ ഭാഗമായി ജില്ലാ മെഡിക്കല്‍ ഓഫിസറുടെ നിര്‍ദേശപ്രകാരം കയ്പമംഗലം പ്രാഥമികാരോഗ്യ കേന്ദ്രവും ഗ്രാമപഞ്ചായത്തും സംയുക്തമായി പഞ്ചായത്തിലെ വിവിധ പ്രദേശങ്ങളായ കാളമുറി, ചളിങ്ങാട് എന്നിവിടങ്ങളിലെ സ്ഥാപനങ്ങളില്‍ പരിശോധന നടത്തി.
പരിശോധനയില്‍ നിയമാല്‍സൃതമായ മുന്നറിയിപ്പ് ലേബലുകള്‍ ഇല്ലാത്ത പുകയില ഉല്‍പ്പന്നങ്ങള്‍ വില്‍ക്കുന്നതായും സ്‌കൂള്‍ പരിസരത്ത് പുകയില ഉല്‍പ്പന്നങ്ങള്‍ വില്‍ക്കുന്നതായും കണ്ടെത്തി. രണ്ടു സ്ഥാപനങ്ങളില്‍ നിന്നായി 13,183 രൂപയുടെ 324 പാക്കറ്റ് പുകയില ഉല്‍പ്പന്നങ്ങള്‍ പിടിച്ചെടുത്തു. പിടിച്ചെടുത്ത പുകയില ഉല്‍പ്പന്നങ്ങള്‍ നടപടി പൂര്‍ത്തിയാക്കിയതിന് ശേഷം കോടതിയില്‍ ഹാജറാക്കുമെന്നും സ്ഥാപനങ്ങള്‍ക്കെതിരേ കേസ് രജിസ്റ്റര്‍ ചെയ്യുമെന്നും ഹെല്‍ത്ത് ഇന്‍സ്‌പെക്ടര്‍ അറിയിച്ചു. കേന്ദ്ര പുകയില നിയന്ത്രണ നിയമവകുപ്പ് 7 ഉം അനുബന്ധചട്ടങ്ങളും പ്രകാരം ഈ വര്‍ഷം ഏപ്രില്‍ മാസം മുതല്‍ പുകയില ഉല്‍പ്പന്നങ്ങളുടെ പാക്കറ്റുകളില്‍ 85 ശതമാനം സ്ഥലത്തും നിയമപ്രകാരമുള്ള ചിത്രങ്ങള്‍ ഉള്‍പ്പെടുന്ന മുന്നറിയിപ്പ് ലേബലുകള്‍ ഉണ്ടായിരിക്കേണ്ടതാണ്.
ഇത്തരത്തില്‍ പുതിയ മുന്നറിയിപ്പ് ലേബലുകള്‍ ഇല്ലാത്ത പുകയില ഉല്‍പ്പന്നങ്ങള്‍ ജൂണ്‍ അഞ്ചിന് ശേഷം യാതൊരു കാരണവശാലും സൂക്ഷിക്കുവാനോ വില്‍ക്കുവാനോ പാടുള്ളതല്ല എന്ന കര്‍ശന നിര്‍ദേശം ജില്ലാ മെഡിക്കല്‍ ഓഫിസര്‍ നേരത്തെ നല്‍കിയിരുന്നതാണെന്ന് അധികൃതര്‍ പറഞ്ഞു.