പാസ്‌പോര്‍ട്ട് നഷ്ടപ്പെട്ടാല്‍ എന്ത് ചെയ്യണം? പോല്‍ ആപ്പ് സഹായത്തിനുണ്ട്; നിര്‍ദേശവുമായി കേരള പൊലിസ്

യാത്രക്കിടയില്‍ പേഴ്‌സില്‍ നിന്ന് പണം നഷ്ടപ്പെടുന്ന വാര്‍ത്ത നമ്മള്‍ സ്ഥിരമായി കേള്‍ക്കുന്നതാണ്. ചെറിയ തുകയാണ് നഷ്ടപ്പെട്ടതെങ്കില്‍ പലരും പൊലിസില്‍ ഒരു പരാതി കൊടുത്ത് അതങ്ങ് പോട്ടെന്ന് വെക്കും. എന്നാല്‍ പണത്തിന് പകരം നമ്മുടെ പാസ്‌പോര്‍ട്ട്, സര്‍ട്ടിഫിക്കറ്റുകള്‍, സിം കാര്‍ഡ് മുതലായ അവശ്യ ഡോക്യുമെന്റുകള്‍ നഷ്ടപ്പെട്ടാല്‍ എന്ത് ചെയ്യും. അതും നിസാരമായി പോട്ടെന്ന് വെക്കാനാവുമോ? ഡ്യൂപ്ലിക്കേറ്റ് എടുക്കാനുള്ള ഓപ്ഷനുണ്ടെങ്കിലും നമ്മുടെ ആധികാരിക രേഖകള്‍ ദുരുപയോഗം ചെയ്യപ്പെടാനുള്ള സാധ്യത വളരെ കൂടുതലാണ്. അതുകൊണ്ട് തന്നെ എത്രയും വേഗം ഡോക്യുമെന്റുകള്‍ നഷ്ടപ്പെട്ട വിവരം പൊലിസില്‍ അറിയിക്കുകയാണ് ആദ്യം ചെയ്യേണ്ടത്. എന്നാല്‍ പലര്‍ക്കും ദൂര യാത്രക്കിടയില്‍ നേരിട്ട് സ്റ്റേഷനില്‍ ചെന്ന് പരാതി പറയാന്‍ സാധിച്ച് കൊള്ളണമെന്നില്ല. എങ്കില്‍ എന്ത് ചെയ്യും?

ഇത്തരം സന്ദര്‍ഭങ്ങളില്‍ കേരള പൊലിസിന്റെ ഔദ്യോഗിക ആപ്പായ പോല്‍ ആപ്പ് വഴി നഷ്ടപ്പെട്ട ഡോക്യുമെന്റുകളുടെ വിവരങ്ങള്‍ റിപ്പോര്‍ട്ട് ചെയ്യാം. ഇതിനായി പോല്‍ ആപ്പിലെ ‘സര്‍വീസ്’ എന്ന വിഭാഗത്തില്‍ ‘lost property’ എന്ന ഓപ്ഷന്‍ തെരഞ്ഞെടുത്ത് വസ്തുക്കളുടെ വിവരങ്ങള്‍ റിപ്പോര്‍ട്ട് ചെയ്യാമെന്നാണ് കേരള പൊലിസ് തങ്ങളുടെ ഫേയ്‌സ്ബുക്ക് പേജിലൂടെ നല്‍കുന്ന നിര്‍ദേശം.

നിര്‍ദേശത്തിന്റെ പൂര്‍ണരൂപം

പാസ്സ്പോര്‍ട്ട്, സര്‍ട്ടിഫിക്കറ്റ്, സിം കാര്‍ഡ് പോലുള്ളവ നഷ്ടമായാല്‍ എന്താണ് ചെയ്യേണ്ടത്?

യാത്രയ്ക്കിടയിലും മറ്റും നമ്മുടെ കയ്യിലുള്ള വിലപിടിച്ച സാധനങ്ങള്‍ നഷ്ടപ്പെടാന്‍ സാധ്യതയുണ്ട്. അവ നഷ്ടപ്പെട്ടു എന്ന് ബോധ്യമായാല്‍ ഉടന്‍തന്നെ പോലീസ് സ്റ്റേഷനില്‍ എത്തി നേരിട്ട് പരാതി നല്‍കാന്‍ പല കാരണങ്ങളാലും നമുക്ക് സാധിക്കണമെന്നുമില്ല. ഇത്തരം സാഹചര്യങ്ങളില്‍ എന്തു ചെയ്യാനാവും?

നിങ്ങളുടെ മൊബൈല്‍ ഫോണില്‍ കേരള പോലീസിന്റെ ഔദ്യോഗിക ആപ്പ് ആയ പോല്‍ – ആപ്പ് ഉണ്ടോ ? എങ്കില്‍ വഴിയുണ്ട്.

ഫോണില്‍ പോല്‍ – ആപ്പ് ഇല്ലെങ്കില്‍ ആന്‍ഡ്രോയിഡ്, ഐ ഒ എസ് പ്ലാറ്റ്ഫോമുകളില്‍ ലഭ്യമായ പോല്‍ ആപ്പ് നിങ്ങളുടെ ഫോണില്‍ ഡൌണ്‍ലോഡ് ചെയ്യുക. തുടര്‍ന്നുള്ള രജിസ്‌ട്രേഷന്‍ നടപടികള്‍ പൂര്‍ത്തിയാക്കി Services എന്ന വിഭാഗത്തിലെ ‘ Lost Property ‘ എന്ന ഓപ്ഷന്‍ തെരഞ്ഞെടുക്കുക. അതില്‍ നിങ്ങള്‍ക്ക് നഷ്ടമായ വസ്തുവകകളുടെ വിവരങ്ങള്‍ റിപ്പോര്‍ട്ട് ചെയ്യാവുന്നതാണ്. പാസ്സ്പോര്‍ട്ട്, സിം കാര്‍ഡ്, ഡോക്യുമെന്റുകള്‍, സര്‍ട്ടിഫിക്കറ്റുകള്‍, മൊബൈല്‍ ഫോണ്‍ മുതലായവ നഷ്ടമായാല്‍ ഇത്തരത്തില്‍ റിപ്പോര്‍ട്ട് ചെയ്യാം.

റിപ്പോര്‍ട്ട് ചെയ്യുമ്പോള്‍ നിങ്ങളുടെ ജില്ല, പോലീസ് സ്റ്റേഷന്‍ എന്നിവ ശരിയായിത്തന്നെ തിരഞ്ഞെടുക്കുവാന്‍ ശ്രദ്ധിക്കണം. ഈ പ്രക്രിയ പൂര്‍ത്തിയാക്കി സബ്മിറ്റ് ചെയ്തു കഴിഞ്ഞാല്‍ നിങ്ങളുടെ നഷ്ടമായ വസ്തു വീണ്ടെടുക്കുന്നതിനുള്ള അന്വേഷണം പോലീസ് ആരംഭിക്കും. സിം കാര്‍ഡ്, സര്‍ട്ടിഫിക്കറ്റുകള്‍, പാസ്സ്പോര്‍ട്ട് മുതലായവ നഷ്ടമായാല്‍ ഡ്യൂപ്ലിക്കേറ്റ് എടുക്കുന്നതിനു പോലീസ് സര്‍ട്ടിഫിക്കറ്റ് / രസീത് ആവശ്യമാണ്. അതിനും വഴിയുണ്ട്. ഇവ നഷ്ടപ്പെട്ട വിവരം മേല്‍പ്പറഞ്ഞ രീതിയില്‍ റിപ്പോര്‍ട്ട് ചെയ്യുമ്പോള്‍ ലഭിക്കുന്ന രസീതോ പോലീസ് അന്വേഷണം പൂര്‍ത്തിയാക്കുമ്പോള്‍ നല്‍കുന്ന സര്‍ട്ടിഫിക്കറ്റോ ഇതിനായി ഉപയോഗിക്കാം.

പോല്‍ – ആപ്പ് ഡൌണ്‍ലോഡ് ചെയ്യുന്നതിനുള്ള ലിങ്ക് https://play.google.com/store/apps/details