തിരുവനന്തപുരം: തിരുവല്ലയില്‍ സി.പി.എം ലോക്കല്‍ സെക്രട്ടറിയെ വെട്ടിക്കൊലപ്പെടുത്തിയ സംഭവം ആസൂത്രിതമായ കൊലപാതകമാണെന്ന് സി.പി.എം ആക്ടിംഗ് സെക്രട്ടറി എ. വിജയരാഘവന്‍. പ്രദേശത്തെ ജനകീയനായ പ്രവര്‍ത്തകനായിരുന്നു സന്ദീപ്. ഇവിടെ സന്ദീപിന്റെ നേതൃത്വത്തിലുള്ള പ്രവര്‍ത്തനങ്ങളുടെ ഫലമായി പല ബി.ജെ.പി പ്രവര്‍ത്തകരും സി.പി.എമ്മില്‍ ചേര്‍ന്നിരുന്നു. ഇതിലുള്ള പ്രകോപനമാണ് കൊലയിലേക്കു നയിച്ചതെന്നും അദ്ദേഹം ആരോപിച്ചു.
നടന്നത് സംഘടിതവും ആസൂത്രിതവുമായ കൊലയാണ്. കൊലക്കുപിന്നിലെ ഗൂഢാലോചന പുറത്തുകൊണ്ടുവരണം. ആര്‍.എസ്.എസിന്റെ കത്തിമുനയില്‍ സി.പി.എം കീഴടങ്ങില്ലെന്നും സംഭവത്തില്‍ ശക്തമായ പ്രതിഷേധം ഉയരണമെന്നും വിജയരാഘവന്‍ പറഞ്ഞു.
ഇന്നുരാത്രി എട്ടുമണിയോടെയാണ് തിരുവല്ല മേപ്രാലില്‍ നാടിനെ നടുക്കിയ കൊലപാതകം അരങ്ങേറിയത്. സന്ദീപിന്റെ നെഞ്ചില്‍ ഒമ്പത് കുത്തുകളാണ് ഏറ്റിട്ടുള്ളത്. മുന്‍ ഗ്രാമപഞ്ചായത്ത് അംഗവും പെരിങ്ങര ലോക്കല്‍ സെക്രട്ടറിയുമാണ് കൊല്ലപ്പെട്ടത്.