ഇന്ത്യയിലെ വാഹന മാര്‍ക്കറ്റില്‍ ഏറ്റവും മത്സരം നടക്കുന്നയിടം എന്ന് ഇലക്ട്രിക്ക് ഇരുചക്ര വാഹന വിപണിയെ വിശേഷിപ്പിക്കാം. വാഹന നിര്‍മ്മാണ രംഗത്തെ മുന്‍പന്മാര്‍ക്കൊപ്പം സ്റ്റാര്‍ട്ടപ്പ് കമ്പനികളും രംഗത്തെത്തിയതോടെയാണ് ഇന്ത്യന്‍ ഇ.വി ഇരുചക്ര വാഹന വിപണിയിലെ മത്സരം കൂടുതല്‍ കരുത്തേറിയതായത്.ഇപ്പോഴിതാ ഇവി ഇന്ത്യ എക്‌സ്‌പോ 2023 എഡിഷനില്‍ പ്രമുഖ ഇലക്ട്രിക്ക് സ്‌കൂട്ടര്‍ നിര്‍മ്മാതാക്കളായ വേഗ് ഓട്ടോമൊബൈല്‍സ് s60 എന്ന തങ്ങളുടെ പുതിയൊരു ഇ.വി രംഗത്തിറക്കിയിരിക്കുകയാണ്. ഒന്നേകാല്‍ ലക്ഷം രൂപ എക്‌സ് ഷോറൂം വിലവരുന്ന പ്രസ്തുത സ്‌കൂട്ടറിന് മാറ്റ് ബ്ലാക്ക്, ലൈറ്റ് ഗ്രേ, വൈറ്റ്, ലൈറ്റ് ഗ്രീന്‍ എന്നിവയുള്‍പ്പെടെ വിവിധ കളര്‍ ഓപ്ഷനുകളിലാണ് പുറത്തിറങ്ങുന്നത്.

തിരക്കേറിയ ട്രാഫിക്കുകളിലെ സഞ്ചാരത്തിന് അനുയോജ്യമായ രീതിയില്‍ തയ്യാറാക്കപ്പെട്ട ഈ വാഹനം നഗര യാത്രകള്‍ക്ക് അനുയോജ്യമായ രീതിയിലാണ് അണിയിച്ചൊരുക്കിയിരിക്കുന്നത്.ഒറ്റത്തവണ ചാര്‍ജ് ചെയ്താല്‍ 120 കിലോമീറ്റര്‍ ദൂരത്തേക്ക് യാത്ര ചെയ്യാന്‍ സാധിക്കും. മണിക്കൂറില്‍ 75 കിലോമീറ്റര്‍ വരെയാണ് വാഹനത്തിന് കൈവരിക്കാന്‍ സാധിക്കുന്ന പരമാവധി വേഗത.ഫാസ്റ്റ് ചാര്‍ജ്ജ് ഉപയോഗിച്ചാല്‍ അഞ്ച് മണിക്കൂറുകള്‍ കൊണ്ട് തന്നെ വാഹനം മുഴുവനായി ചാര്‍ജ് ചെയ്യാന്‍ സാധിക്കും.ഡിജിറ്റല്‍ ഡിസ്‌പ്ലേ, മൂന്ന് റൈഡ് മോഡുകള്‍, കോംബി ബ്രേക്കിംഗ് സിസ്റ്റം എന്നിവയുള്‍പ്പെടെയുള്ള ഒട്ടനവധി സവിശേഷതകളാണ് വാഹനത്തിനുളളത്.

വരും മാസങ്ങളില്‍ S60 യുടെ നവീകരിച്ച വേരിയന്റ് അവതരിപ്പിക്കാനും വേഗ് ഓട്ടോമൊബൈല്‍സ് പദ്ധതിയിടുന്നു. തങ്ങളുടെ ഉല്‍പ്പന്നങ്ങള്‍ കൂടുതല്‍ മെച്ചപ്പെടുത്തി വിപണി വിഹിതം ഉയര്‍ത്താനാണ് കമ്പനിയുടെ പ്ലാന്‍.ഇത്തരത്തിലുളള വാഹനങ്ങളുടെ കടന്നു വരവ് ഒല, ഏഥര്‍ മുതലായ വമ്പന്‍മാര്‍ക്ക് തിരിച്ചടിയായേക്കുമെന്നാണ് വിദഗ്ധര്‍ ചൂണ്ടിക്കാട്ടുന്നത്.

Content Highlights:vegh s60 electric scooter launching details