2020 September 28 Monday
ചെയ്യേണ്ടത് ചെയ്യാതിരിക്കുന്നതും ചെയ്യരുതാത്തത് ചെയ്യുന്നതും ഒരുപോലെ തെറ്റാണ് -തിരുക്കുറള്‍

യമനില്‍ അമേരിക്കന്‍ വ്യോമാക്രമണത്തില്‍ 41 അല്‍ ഖ്വൈദ തീവ്രവാദികളടക്കം 57 പേര്‍ കൊല്ലപ്പെട്ടു

അബ്ദുസ്സലാം കൂടരഞ്ഞി

റിയാദ്: യമനില്‍ അമേരിക്കന്‍ സൈന്യം നടത്തിയ വ്യോമ ബോംബാക്രമണത്തില്‍ നിരവധി മരണം. 41 അല്‍ ഖ്വൈദ തീവ്രവാദി നേതാക്കളടക്കം 57 പേര്‍ കൊല്ലപ്പെട്ടതായാണ് പ്രാഥമിക വിവരം. തെക്കന്‍ യമനില്‍ ഞായറാഴ്ച നടത്തിയ റെയ്ഡിനിടെയാണ് അമേരിക്കന്‍ സൈന്യം വ്യോമാക്രമണം നടത്തിയത്. ആക്രമണത്തില്‍ 16 സാധാരണക്കാരും കൊല്ലപ്പെട്ടു.

അമേരിക്കന്‍ സൈന്യമാണ് ആക്രമണം നടത്തിയതെന്ന് നിവാസികളും ഉദ്യോഗസ്ഥരുമാണ് വെളിപ്പെടുത്തിയത്. അല്‍ ബയ്ദ പ്രവിശ്യയിലെ യഖ്‌ല ജില്ലയില്‍ നടത്തിയ വെടിവെപ്പില്‍ യമനിലെ മുതിര്‍ന്ന അല്‍ ഖ്വൈദ നേതാവായ അബ്ദുല്‍ റഹൂഫ് അല്‍ ദഹബ് കൊല്ലപ്പെട്ടതായി ദൃക്‌സാക്ഷികളായ നാട്ടുകാര്‍ വെളിപ്പെടുത്തി. ആക്രമണത്തില്‍ മൂന്ന് കുട്ടികളും ആറു സ്ത്രീകളുമടക്കം 57 ഓളം ആളുകള്‍ കൊല്ലപ്പെട്ടതായി മെഡിക്കല്‍ പ്രവര്‍ത്തകര്‍ പറഞ്ഞു.

യമന്‍ യുദ്ധം തുടങ്ങി രണ്ടു വര്‍ഷത്തിനിടെ അമേരിക്ക നടത്തുന്ന ആദ്യ റെയ്ഡ് ആണിത്. ഡൊണാള്‍ഡ് ട്രംപ് ഭരണമേറിയ ശേഷമുള്ള ആദ്യ ഓപ്പറേഷന്‍ കൂടിയാണിത്. വിശുദ്ധ യുദ്ധത്തില്‍ തങ്ങള്‍ക്ക് കടുത്ത ആക്രമണം നേരിട്ടെന്ന് അല്‍ ഖൈ്വദ ടെലഗ്രാമില്‍ കുറിച്ചതായി അന്താരാഷ്ട്ര മാധ്യമങ്ങള്‍ റിപ്പോര്‍ട്ട് ചെയ്തു. എന്നാല്‍ എത്ര അംഗങ്ങള്‍ കൊല്ലപ്പെട്ടെന്ന് അവര്‍ വ്യക്തമാക്കിയിട്ടില്ല.

ഞായറാഴ്ച രാവിലെ അല്‍ ഖ്വൈയ്ദ നേതാവായ അബ്ദുല്‍ റഹൂഫ് അല്‍ ദഹബിന്റെ വീടിന് നേരെ ഡ്രോണ്‍ വിമാനം നടത്തിയ ബോംബാക്രമണത്തിന് ശേഷം ഹെലി കോപ്ടറില്‍ എത്തിയ മറ്റൊരു സേനാ സംഘം പാരച്യൂട്ടില്‍ ഇറങ്ങിയാണ് വെടിവെപ്പ് ആരംഭിച്ചത്. ആക്രമണത്തില്‍ വീട്ടിലെ മുഴുവന്‍ അംഗങ്ങളും കൊല്ലപ്പെട്ടു. പിന്നീടെത്തിയ യുദ്ധ വിമാനങ്ങള്‍ സമീപത്തെ മുഴുവന്‍ വീടുകള്‍ക്കും നേരെ ബോംബ് വര്‍ഷിക്കുകയായിരുന്നു.


 

 

 

Advt.


ഏറ്റവും പുതിയ വാർത്തകൾക്കും വീഡിയോകൾക്കും സബ്‌സ്ക്രൈബ് ചെയ്യുക

കമന്റ് ബോക്‌സിലെ അഭിപ്രായങ്ങള്‍ സുപ്രഭാതത്തിന്റേതല്ല. വായനക്കാരുടേതു മാത്രമാണ്. അശ്ലീലവും അപകീര്‍ത്തികരവും ജാതി, മത, സമുദായ സ്പര്‍ധവളര്‍ത്തുന്നതുമായ അഭിപ്രായങ്ങള്‍ പോസ്റ്റ് ചെയ്യരുത്. ഇത്തരം അഭിപ്രായങ്ങള്‍ രേഖപ്പെടുത്തുന്നത് കേന്ദ്രസര്‍ക്കാറിന്റെ ഐടി നയപ്രകാരം ശിക്ഷാര്‍ഹമാണ്.