2022 July 02 Saturday
നല്ല മനുഷ്യന്‍ സ്‌നേഹം മൂലം അനുസരിക്കുന്നു, അല്ലാത്തവന്‍ ഭയം മൂലവും.       അരിസ്റ്റോട്ടില്‍

ജറൂസലം: ട്രംപിന്റെ പ്രഖ്യാപനത്തെ തള്ളി യു.എന്‍ പൊതുസഭ

  • അമേരിക്കന്‍ തീരുമാനത്തിനെതിരായ പ്രമേയത്തെ അനുകൂലിച്ചത് 128 രാജ്യങ്ങള്‍
  • എതിര്‍ത്തത് വെറും 9 രാജ്യങ്ങള്‍
  • 35 രാജ്യങ്ങള്‍ വിട്ടുനിന്നു

യു.എന്‍: ജറൂസലമിനെ ഇസ്‌റാഈല്‍ തലസ്ഥാനമായി പ്രഖ്യാപിച്ച അമേരിക്കന്‍ തീരുമാനത്തെ തള്ളി യു.എന്‍ പൊതുസഭ. പ്രഖ്യാപനത്തിനെതിരെ പൊതുസഭയില്‍ (ജനറല്‍ അസംബ്ലി) വോട്ടിനു വച്ച പ്രമേയത്തിന് അനുകൂലമായി 128 അംഗരാജ്യങ്ങള്‍ വോട്ടുചെയ്തു. 193 അംഗ സഭയിലെ ഒന്‍പതു പേര്‍ മാത്രമാണ് എതിര്‍ത്ത് വോട്ടുചെയ്തത്. 35 രാജ്യങ്ങള്‍ വോട്ടെടുപ്പില്‍ നിന്ന് വിട്ടുനിന്നു.

 

 

അമേരിക്കയുടെ ഭീഷണികള്‍ മറികടന്നാണ് 128 രാജ്യങ്ങള്‍ പ്രമേയത്തെ അനുകൂലിച്ച് വോട്ടുചെയ്തത്. ട്രംപിന്റെ തീരുമാനത്തിനെതിരെ ശക്തമായ താക്കീത് നല്‍കാന്‍ വോട്ടെടുപ്പിലൂടെ ഫലസ്തീന്‍ അനുകൂല രാജ്യങ്ങള്‍ക്കായി. ഈജിപ്തിന്റെയും തുര്‍ക്കിയുടെയും നേതൃത്വത്തിലാണ് പ്രമേയം കൊണ്ടുവന്നത്.

അമേരിക്കയുടെ ഭീഷണി

”അവര്‍ നൂറുകണക്കിന് മില്യണ്‍ ഡോളറുകള്‍ കൈപ്പറ്റുകയും തങ്ങള്‍ക്കെതിരെ വോട്ടുചെയ്യുകയും ചെയ്യുന്നു. തങ്ങള്‍ക്കെതിരെ വോട്ടു ചെയ്യുന്നവരെ വീക്ഷിക്കുന്നുണ്ട്”- വോട്ടെടുപ്പിനു തൊട്ടുമുന്‍പ് വൈറ്റ്ഹൗസില്‍ മാധ്യമങ്ങളോട് ട്രംപ് പറഞ്ഞു.

നേരത്തെ, പ്രമേയം യു.എന്‍ സുരക്ഷാ സമിതിയില്‍ വോട്ടിനിട്ടപ്പോള്‍ അമേരിക്ക വീറ്റോ ചെയ്തിരുന്നു. 14 രാജ്യങ്ങളും അനുകൂലമായി വോട്ടുചെയ്തപ്പോഴാണ് അമേരിക്ക മാത്രം വീറ്റോ ഉപയോഗിച്ച് എതിര്‍ത്തത്. അതിനു ശേഷം ഭീഷണിയുടെ സ്വരമായിരുന്നു അമേരിക്കയ്ക്ക്. തങ്ങള്‍ക്കെതിരെ വോട്ടു ചെയ്യുന്നവരെ നിരീക്ഷിക്കുന്നുണ്ടെന്ന് യു.എന്നിലെ യു.എസ് അംബാസഡര്‍ നിക്കി ഹാലെയും ഭീഷണിപ്പെടുത്തിയിരുന്നു.

അതേനാണയത്തില്‍ തിരിച്ചടിച്ച ഉര്‍ദുഗാന്‍

എന്നാല്‍ അമേരിക്കയുടെ ഭീഷണിക്ക് പുല്ലുവില കല്‍പ്പിക്കുന്നതായിരുന്നു തുര്‍ക്കി പ്രസിഡന്റ് റജബ് ത്വയ്യിബ് ഉര്‍ദുഗാന്റെ പ്രതികരണം. ഡോളറുകള്‍ കൊണ്ട് തുര്‍ക്കിയുടെ ജനാധിപത്യം വിലയ്ക്ക് വാങ്ങാനാവില്ലെന്നും ലോക രാജ്യങ്ങള്‍ ശക്തമായ പാഠം പഠിപ്പിക്കണമെന്നും ഉര്‍ദുഗാന്‍ ആഹ്വാനം ചെയ്തിരുന്നു.

”മിസ്റ്റര്‍ ട്രംപ്, നിങ്ങളുടെ ഡോളറുകള്‍ കൊണ്ട് തുര്‍ക്കിയുടെ ജനാധിപത്യത്തെ വാങ്ങാനാവില്ല. ഞങ്ങളുടെ തീരുമാനം വ്യക്തമാണ്”- ഉര്‍ദുഗാന്‍ പ്രസ്താവിച്ചു.

ട്രംപിന്റെ പ്രഖ്യാപനം

ഡിസംബര്‍ ആറിനായിരുന്നു ട്രംപിന്റെ വിവാദ പ്രഖ്യാപനം. ജറൂസലമിനെ ഇസ്‌റാഈലിന്റെ തലസ്ഥാനമായി പ്രഖ്യാപിക്കുകയും യു.എസ് എംബസി തെല്‍ അവീവില്‍ നിന്ന് ജറൂസലമിലേക്ക് മാറ്റുകയാണെന്ന് അറിയിക്കുകയുമായിരുന്നു. പിന്നാലെ, ഇന്ത്യയടക്കമുള്ള രാജ്യങ്ങള്‍ തീരുമാനത്തിനെതിരെ വിയോജിപ്പുമായി രംഗത്തെത്തി.


 

 

 


ഏറ്റവും പുതിയ വാർത്തകൾക്കും വീഡിയോകൾക്കും സബ്‌സ്ക്രൈബ് ചെയ്യുക

Advt.


കമന്റ് ബോക്‌സിലെ അഭിപ്രായങ്ങള്‍ സുപ്രഭാതത്തിന്റേതല്ല. വായനക്കാരുടേതു മാത്രമാണ്. അശ്ലീലവും അപകീര്‍ത്തികരവും ജാതി, മത, സമുദായ സ്പര്‍ധവളര്‍ത്തുന്നതുമായ അഭിപ്രായങ്ങള്‍ പോസ്റ്റ് ചെയ്യരുത്. ഇത്തരം അഭിപ്രായങ്ങള്‍ രേഖപ്പെടുത്തുന്നത് കേന്ദ്രസര്‍ക്കാറിന്റെ ഐടി നയപ്രകാരം ശിക്ഷാര്‍ഹമാണ്.