രാവിലെയും രാത്രിയും മൂടൽമഞ്ഞ്; പകൽ കൊടും ചൂട്, യുഎഇയിൽ റെഡ് അലർട്ട്

അബുദാബി: യുഎഇയിൽ ഇന്ന് പകൽ സമയം താപനില ഉയർന്ന് നിൽക്കും. 48 ഡിഗ്രി സെൽഷ്യസ് ചൂടാണ് പ്രധാന നഗരങ്ങളിൽ പ്രതീക്ഷിക്കുന്നതെന്ന് ദേശീയ കാലാവസ്ഥാ കേന്ദ്രം (എൻസിഎം) അറിയിച്ചു. അതേസമയം, ഇന്ന് രാവിലെ വിവിധ ഇടങ്ങളിൽ ശക്തമായ മൂടൽമഞ്ഞിന് സാധ്യതയുള്ളതിനാൽ റെഡ് അലർട്ട് പ്രഖ്യാപിച്ചിട്ടുണ്ട്. രാവിലെ 8.30 വരെ കാഴ്ച പരിമിതമായിരിക്കും.

മൂടൽമഞ്ഞ് രൂപപ്പെട്ടതിനെത്തുടർന്ന് അബുദാബിയുടെ ചില ഭാഗങ്ങളിൽ ജാഗ്രതാ നിർദ്ദേശം നൽകിയിട്ടുണ്ട്. ഈ മേഖലകളിൽ റെഡ് അലർട്ട് പ്രഖ്യാപിച്ചിട്ടുണ്ട്. മൂടൽമഞ്ഞുള്ള സാഹചര്യത്തിൽ താമസക്കാർ ജാഗ്രത പാലിക്കണമെന്ന് ദേശീയ കാലാവസ്ഥാ കേന്ദ്രം നിർദ്ദേശിച്ചു.

ബുധനാഴ്ചത്തെ കാലാവസ്ഥ ഭാഗികമായി മേഘാവൃതമായിരിക്കുമെന്ന് കാലാവസ്ഥാ വകുപ്പ് പ്രതീക്ഷിക്കുന്നു. അബുദാബിയിലെ മെസൈറയിലും റസീനിലും താപനില 48 ഡിഗ്രി സെൽഷ്യസും സ്വീഹാനിലും അൽ ഐനിലും 47 ഡിഗ്രി സെൽഷ്യസും ആയിരിക്കും.

ദുബായിൽ 33 ഡിഗ്രി സെൽഷ്യസ് മുതൽ 40 ഡിഗ്രി സെൽഷ്യസ് വരെ താപനില ഉയരും. രാവിലെയോടെ കിഴക്കൻ തീരത്ത് താഴ്ന്ന മേഘങ്ങൾ പ്രത്യക്ഷപ്പെടുമെന്നും ഉച്ചയോടെ കിഴക്കോട്ട് ചില സംവഹന മേഘങ്ങൾ രൂപപ്പെടാൻ സാധ്യതയുണ്ടെന്നും കാലാവസ്ഥ കേന്ദ്രം പ്രവചിക്കുന്നു.

ഇന്ന് രാത്രിയിലും വ്യാഴാഴ്ച രാവിലെയും അന്തരീക്ഷം ഈർപ്പമുള്ളതായിരിക്കുമെന്നും ചില തീരപ്രദേശങ്ങളിലും ഉൾപ്രദേശങ്ങളിലും മൂടൽമഞ്ഞ് രൂപപ്പെടാനുള്ള സാധ്യതയുണ്ടെന്നും കാലാവസ്ഥ കേന്ദ്രം അറിയിച്ചു.