ദുബായ്: യുഎഇയിൽ പെട്രോൾ വില കുറഞ്ഞു. ജൂൺ മാസത്തെ റീട്ടെയിൽ പെട്രോൾ വില ലിറ്ററിന് 21 ഫിൽസ് ആണ് കുറഞ്ഞത്. സൂപ്പർ 98, സ്പെഷ്യൽ 95, ഇ-പ്ലസ് എന്നീ മൂന്ന് വേരിയന്റുകളിലും 21 ഫിൽസ് കുറഞ്ഞു. കഴിഞ്ഞ നാല് മാസത്തിനിടയിൽ ഏറ്റവും കുറഞ്ഞ നിരക്കാണ് രേഖപ്പെടുത്തിയത്.

ഇന്ധനവില ഫോളോ-അപ്പ് കമ്മിറ്റി സൂപ്പർ 98, സ്‌പെഷ്യൽ 95 നിരക്കുകൾ 6.6 ശതമാനവും ഇ-പ്ലസ് 7 ശതമാനവുമാണ് കുറച്ചത്. ഇന്ന് മുതൽ സൂപ്പർ 98 പെട്രോളിന് മെയ് മാസത്തിലെ 3.16 ദിർഹത്തെ അപേക്ഷിച്ച് ജൂണിൽ ലിറ്ററിന് 2.95 ദിർഹത്തിന് ലഭിക്കും. സ്‌പെഷ്യൽ 95 ന്റെ വില ലിറ്ററിന് 3.05 ദിർഹത്തിൽ നിന്ന് 2.84 ദിർഹമായി കുറച്ചു. താരതമ്യ കാലയളവിൽ ഇ-പ്ലസ് ലിറ്ററിന് 2.97 ദിർഹത്തിൽ നിന്ന് 2.76 ദിർഹമായി കുറച്ചു.

ഡീസൽ വിലയിലും കുറവ് രേഖപ്പെടുത്തിയിട്ടുണ്ട്. 23 ഫിൽ‌സ് ആണ് ഡീസലിന് കുറഞ്ഞത്. മെയ് മാസത്തിൽ ലിറ്ററിന് ഉണ്ടായിരുന്ന 2.91 ദിർഹത്തിൽ നിന്ന് 2.68 ദിർഹമായി കുറഞ്ഞു.