തൂവല്‍ വെള്ളച്ചാട്ടത്തില്‍ വീണതെന്ന് കരുതുന്ന വിദ്യാര്‍ത്ഥികളുടെ മൃതദേഹം കണ്ടെത്തി

തൊടുപുഴ: ഇടുക്കി നെടുങ്കണ്ടം തൂവല്‍ വെള്ളച്ചാട്ടത്തില്‍ വീണെന്ന് കരുതുന്ന വിദ്യാര്‍ത്ഥികളുടെ മൃതദേഹം കണ്ടെത്തി. നെടുങ്കണ്ടം സ്വദേശി സെബിന്‍ സജി (19), അനില (16) എന്നിവരാണ് മരിച്ചത്. ഇന്നലെയാണ് ഇരുവരേയും വെള്ളച്ചാട്ടത്തില്‍ വീണ് കാണാതായത്.

ശനിയാഴ്ച രാത്രി വെള്ളച്ചാട്ടത്തിന് സമീപത്തു നിന്നും ചെരിപ്പുകള്‍ കണ്ടതോടെയാണ് നാട്ടുകാര്‍ക്ക് സംശയം തോന്നിയത്. സമീപത്തു നിന്നും ഇവര്‍ എത്തിയെന്ന് കരുതുന്ന ബൈക്കും കണ്ടെത്തി. നാട്ടുകാരും പൊലിസും അഗ്‌നിശമന സേനയും മണിക്കൂറുകളോളം നടത്തിയ തെരച്ചിലില്‍ 11.45ഓടെ ആണ്‍കുട്ടിയുടെ മൃതദേഹവും അല്‍പസമയത്തിനകം പെണ്‍കുട്ടിയുടെ മൃതദേഹവും കണ്ടെത്തുകയായിരുന്നു.

ഇരുവരും വെള്ളത്തില്‍ കാല്‍വഴുതി വീണതാകാമെന്നാണ് നിഗമനം. മൃതദേഹങ്ങള്‍ നെടുങ്കണ്ടം താലൂക്ക് ആശുപത്രിയിലേക്ക് മാറ്റി. പോസ്റ്റുമോര്‍ട്ടം നടപടികള്‍ക്ക് ശേഷം ബന്ധുക്കള്‍ക്ക് വിട്ടുകൊടുക്കും.