2020 October 21 Wednesday
ചെയ്യേണ്ടത് ചെയ്യാതിരിക്കുന്നതും ചെയ്യരുതാത്തത് ചെയ്യുന്നതും ഒരുപോലെ തെറ്റാണ് -തിരുക്കുറള്‍

സഊദിയിലേക്ക് നേരിട്ടുള്ള വിമാന സർവ്വീസ് വൈകുന്നു; ദുബൈ വഴി മാർഗ്ഗവുമായി ഏജൻസികൾ രംഗത്ത്

വൻ തുക നൽകുന്നവർക്ക് മുഴുവൻ സൗകര്യങ്ങളുമൊരുക്കി ഏജൻസികൾ രംഗത്ത്

     റിയാദ്: സഊദിയിലേക്കുള്ള യാത്രാ നിരോധനത്തിന് ഭാഗികമായ അനുമതി നൽകിയെങ്കിലും നാട്ടിൽ നിന്നുള്ള വിമാന സർവ്വീസ് വൈകുന്നതിനെ തുടർന്ന് മറു മാർഗ്ഗവുമായി ഏജൻസികൾ രംഗത്ത്. ദുബായ് വഴി സഊദി പ്രവാസികളെ സഊദിയിലെത്തിക്കുന്നതിനുള്ള മാർഗ്ഗങ്ങളുമായാണ് ഏജൻസികൾ രംഗത്തെത്തിയിരിക്കുന്നത്. സഊദിയിൽ അത്യാവശ്യമായി എത്തേണ്ട ഉന്നത ജോലിക്കാരെ ലക്ഷ്യമിട്ടാണ് ഏജൻസികൾ ഇത്തരമൊരു നീക്കവുമായി രംഗത്തെത്തിയിരിക്കുന്നത്.

   ഇത്തരം ആളുകളെ ദുബായ് സന്ദർശക വിസയിൽ എത്തിക്കുകയും പിന്നീട് അവിടെ നിന്നും സഊദിയിലെത്തിക്കുന്നതിനുള്ള നടപടികളുമായാണ് ഏജൻസികൾ വല വിരിച്ചിരിക്കുന്നത്. ഉയർന്ന തുക ഈടാക്കിയുള്ള ഈ നീക്കത്തിൽ നേരത്തെ സഊദിയിൽ നിന്നും നാട്ടിലെത്തി തിരിച്ചു പോകാൻ കുടുങ്ങിയ പ്രവാസികളെയാണ് ഏജൻസികൾ ലക്ഷ്യമിടുന്നത്. യുഎഇയിൽ മറ്റു എമിറേറ്റുകളിൽ പതിനാല് ദിവസം ക്വാറന്റൈൻ വേണമെങ്കിൽ ദുബായിൽ നെഗറ്റിവ് സർട്ടിഫിക്കറ്റ് കൈവശമുള്ളവർക്ക് നേരിട്ട് പുറത്തിറങ്ങാവുന്നതാണ് ദുബായ് വഴി ഇത്തരമൊരു നീക്കത്തിന് ഏജൻസികൾ മുതിരുന്നത്.

   ഇങ്ങനെ ദുബൈയിൽ പുറത്തിറങ്ങുന്നവർക്ക് വീണ്ടും ടെസ്‌റ്റ് നടത്തി നെഗറ്റിവ് സർട്ടിഫിക്കറ്റ് കരസ്ഥമാക്കി സഊദിയിലേക്ക് അനായാസേന കടക്കാനാകും. കാലാവധിയുള്ള വിസ, കൊവിഡ് നെഗറ്റിവ് സർട്ടിഫിക്കറ്റ് തുടങ്ങിയവ ഉള്ളവർക്ക് സഊദിയിലേക്ക് കടക്കാനാകുമെന്നതാണ് നിലവിലെ നിയമം. ഇത്തരത്തിലുള്ളവരെ ദുബൈയിലേക്ക് സന്ദർശക വിസ, ട്രാൻസിറ്റ് വിസ എന്നിവയിൽ ഏതെങ്കിലുമൊന്ന് സംഘടിപ്പിച്ച് നാട്ടിൽ നിന്നുള്ള ചാർട്ടേഡ് വിമാനങ്ങൾ വഴിയോ വന്ദേ ഭാരത് മിഷൻ വിമാനങ്ങൾ വഴിയോ ദുബൈയിലേക്ക് എത്തിക്കുകയാണ് ചെയ്യുന്നത്.

   ഇവിടെ കൊവിഡ് നടപടികൾ പൂർത്തിയാക്കി സഊദിയിലേക്ക് കടത്താനാണ് നീക്കം. യുഎഇയിൽ നിന്നും സഊദിയിലേക്ക് സഊദി എയർ സർവ്വീസുകൾ പുനഃരാരംഭിച്ചതും ഇവർക്ക് ആശ്വാസമാകും. റിയാദ്, ജിദ്ദ എന്നിവിടങ്ങളിൽ നിന്നും രണ്ട് വീതവും ദമാമിൽ നിന്നും ഒരു സർവ്വീസുമാണ് സഊദിയ ആരംഭിച്ചത്.

Advt.


ഏറ്റവും പുതിയ വാർത്തകൾക്കും വീഡിയോകൾക്കും സബ്‌സ്ക്രൈബ് ചെയ്യുക

കമന്റ് ബോക്‌സിലെ അഭിപ്രായങ്ങള്‍ സുപ്രഭാതത്തിന്റേതല്ല. വായനക്കാരുടേതു മാത്രമാണ്. അശ്ലീലവും അപകീര്‍ത്തികരവും ജാതി, മത, സമുദായ സ്പര്‍ധവളര്‍ത്തുന്നതുമായ അഭിപ്രായങ്ങള്‍ പോസ്റ്റ് ചെയ്യരുത്. ഇത്തരം അഭിപ്രായങ്ങള്‍ രേഖപ്പെടുത്തുന്നത് കേന്ദ്രസര്‍ക്കാറിന്റെ ഐടി നയപ്രകാരം ശിക്ഷാര്‍ഹമാണ്.