വിദ്യാര്‍ഥിയെ പൊള്ളലേല്‍പിച്ചു; സഹപാഠി കസ്റ്റഡിയില്‍

തിരുവനന്തപുരം: വെള്ളായണി കാര്‍ഷിക കോളജ് ഹോസ്റ്റലില്‍ സഹപാഠിയെ പൊള്ളലേല്‍പ്പിച്ച സംഭവത്തില്‍ വിദ്യാര്‍ഥിനി കസ്റ്റഡിയില്‍. നാലാം വര്‍ഷ വിദ്യാര്‍ഥിനി ലോഹിതയെയാണ് പൊലിസ് കസ്റ്റഡിയിലെടുത്തത്. മാരകായുധം കൊണ്ട് ആക്രമിച്ചതിന് ജാമ്യമില്ലാ കുറ്റം ചുമത്തി കേസെടുത്തു.

ദീപികയുടെ അമ്മയെ ലോഹിത അസഭ്യം പറഞ്ഞതാണ് പ്രകോപനത്തിന് കാരണമായതെന്ന് പൊലിസ് പറയുന്നു. ഇന്‍ഡക്ഷന്‍ സ്റ്റൗവില്‍ ഉപയോഗിക്കുന്ന പാത്രം ചൂടാക്കി പൊള്ളിച്ചു. മൊബൈല്‍ ചാര്‍ജര്‍ കൊണ്ട് തലക്കടിച്ചെന്നും പൊലിസ് വ്യക്തമാക്കി.

സംഭവവുമായി ബന്ധപ്പെട്ട് മൂന്നു വിദ്യാര്‍ഥികളെ ഇന്ന് സസ്‌പെന്‍ഡ് ചെയ്തിരുന്നു. പൊള്ളലേല്‍പ്പിച്ച വിദ്യാര്‍ഥിനിയെയും സുഹൃത്തുകളെയുമാണ് അന്വേഷണവിധേയമായി സസ്‌പെന്‍ഡ് ചെയ്തത്. അക്രമവിവരം മറച്ചുവെച്ചതിനാണ് പൊള്ളലേല്‍പ്പിച്ച പെണ്‍കുട്ടിയുടെ സുഹൃത്തുക്കള്‍ക്കെതിരായ കോളജ് അധികൃതരുടെ നടപടി.

സംഭവത്തെ കുറിച്ച് അന്വേഷിക്കാന്‍ നാലംഗ സമിതിയെ കോളജ് അധികൃതര്‍ നിയോഗിച്ചിട്ടുണ്ട്. മുതിര്‍ന്ന വനിത അഭിഭാഷക, മൂന്ന് അധ്യാപകര്‍ എന്നിവരാണ് സമിതിയിലെ അംഗങ്ങള്‍. പൊള്ളലേറ്റ വിദ്യാര്‍ഥിയില്‍ നിന്ന് സമിതി മൊഴി രേഖപ്പെടുത്തും.

കഴിഞ്ഞ വ്യാഴാഴ്ച നടന്ന സംഭവത്തില്‍ ഒരാഴ്ച കഴിഞ്ഞിട്ടും നടപടി സ്വീകരിക്കാത്തതില്‍ വിദ്യാര്‍ഥികള്‍ പ്രതിഷേധത്തിലാണ്. പൊള്ളലേല്‍പ്പിച്ച വിവരം അറിഞ്ഞിട്ടും അസിസ്റ്റന്റ് വാര്‍ഡന്‍ നടപടി സ്വീകരിക്കാന്‍ തയാറായില്ല. ഡിന്‍ ഇന്‍ ചാര്‍ജിനോട് പരാതിപ്പെട്ടപ്പോള്‍ ലാഘവത്തോടെയുള്ള മറുപടിയാണ് ലഭിച്ചതെന്നാണ് വിദ്യാര്‍ഥികള്‍ പറയുന്നത്.