തെലങ്കാന: ഡോ. ബി.ആര്‍ അംബേദ്കറിനെതിരെ പ്രകോപനപരമായ പരാമര്‍ശങ്ങള്‍ നടത്തിയ തെലങ്കാന സ്വദേശി അറസ്റ്റില്‍. ഹമാര പ്രസാദ് എന്നയാളാണ് പിടിയിലായത്. അംബേദ്കറിനെതിരെ അപകീര്‍ത്തികരമായ പരാമര്‍ശങ്ങള്‍ നടത്തുന്ന വീഡിയോ ഇയാള്‍ സോഷ്യല്‍ മീഡിയയില്‍ പ്രചരിപ്പിച്ചിരുന്നു. ഇത് വൈറലായതോടെയാണ് പൊലീസ് നടപടി സ്വീകരിച്ചത്.

‘അംബേദ്കര്‍ ജീവിച്ചിരുന്നെങ്കില്‍ ഗോഡ്‌സെ ഗാന്ധിയെ വെടിവച്ചത് പോലെ ഞാന്‍ അംബേദ്കറെ കൊല്ലുമായിരുന്നു – വീഡിയോയില്‍ ബി.ആര്‍ അംബേദ്കര്‍ എഴുതിയ പുസ്തകം ഉയര്‍ത്തി പിടിച്ച് ഹമാര പ്രസാദ് പറയുന്നു.

പ്രസാദിനെതിരെ നടപടിയെടുക്കണമെന്ന് ആവശ്യപ്പെട്ട് ബഹുജന്‍ സമാജ് പാര്‍ട്ടിയുടെ തെലങ്കാന അധ്യക്ഷന്‍ ആര്‍.എസ് പ്രവീണ്‍ കുമാര്‍ രംഗത്ത് വന്നതോടെയാണ് സംഭവം വിവാദമായത്. ഹമാര പ്രസാദിനെതിരെ ഇന്ത്യന്‍ ശിക്ഷാ നിയമത്തിലെ സെക്ഷന്‍ 153 എ, 505 (2) എന്നിവ പ്രകാരം കേസെടുത്ത ഹൈദരാബാദ് പൊലീസ് അറസ്റ്റ് ചെയ്യുകയായിരുന്നു.