2021 December 01 Wednesday
ചെയ്യേണ്ടത് ചെയ്യാതിരിക്കുന്നതും ചെയ്യരുതാത്തത് ചെയ്യുന്നതും ഒരുപോലെ തെറ്റാണ് -തിരുക്കുറള്‍

സഊദിയില്‍ റമദാന്‍ ഇളവ്; ഷോപ്പിങ് മാളുകളും കടകളും തുറന്നു

  • റമദാൻ ആറ്‌ മുതൽ 20 വരെ രാവിലെ ഒമ്പത് മണി മുതൽ വൈകീട്ട് അഞ്ച് മണി വരെയാണ്‌ ഇളവ്
  • കർശന നിയന്ത്രണങ്ങളും ആരോഗ്യ മന്ത്രാലയത്തിന്റെ മാർഗ നിർദ്ദേശങ്ങളും പാലിച്ചാണ് സ്ഥാപനങ്ങൾ പ്രവർത്തിപ്പിക്കുന്നത്

നിസാ൪ കലയത്ത്

ജിദ്ദ: കൊവിഡ് വ്യാപനത്തെ തടയാൻ ശക്തമായ നിയന്ത്രണങ്ങൾ തുടരുമ്പോഴും സഊദിയിൽ ഷോപ്പിങ് മാളുകളും ചില്ലറ, മൊത്ത വിതരണ സ്ഥാപനങ്ങളും വ്യവസായ, നിർമ്മാണ സ്ഥാപനങ്ങളു മെല്ലാം പ്രവർത്തനം ആരംഭിച്ചു. കഴിഞ്ഞ ദിവസം കർഫ്യൂവിൽ താൽക്കാലിക ഇളവ് നൽകിയതിന്റെ അടിസ്ഥാനത്തിൽ റമദാൻ ആറ്‌ മുതൽ 20 വരെ രാവിലെ ഒമ്പത് മണി മുതൽ വൈകീട്ട് അഞ്ച് മണി വരെയാണ്‌ ഇത്തരം സ്ഥാപനങ്ങൾക്ക് പ്രവർത്തനാനുമതി നൽകിയിരിക്കുന്നത്. അതേസമയം ബാർബർ ഷോപ്പുകൾ, ബൂട്ടി പാർലറുകൾ, ഹെൽത്ത് ക്ളബ്, സിനിമാ തീയേറ്റർ, വിനോദ കേന്ദ്രങ്ങൾ തുടങ്ങിയവയൊന്നും തുറക്കാൻ പാടുള്ളതല്ല.

റെസ്റ്റോറന്റുകൾ, ബുഫിയകൾ, ജ്യൂസ് കടകൾ, കോഫീ ഷോപ്പ്, ഐസ്ക്രീം ഷോപ്പ്, ഹലവിയാത്ത്, ചോക്ളേറ്റ് കടകൾ തുടങ്ങി യവയെല്ലാം പാർസൽ സേവനം നൽകി പ്രവർത്തിപ്പിക്കാൻ അധികൃതർ നേരത്തെ അനുമതി നൽകിയിരുന്നു. കർശന നിയന്ത്രണങ്ങളും ആരോഗ്യ മന്ത്രാലയത്തിന്റെ മാർഗ്ഗ നിർദ്ദേശങ്ങളും പാലിച്ചാണ് സ്ഥാപനങ്ങൾ പ്രവർത്തിപ്പിക്കുന്നത്.

അതേസമയം സുരക്ഷാ മാനദണ്ഡങ്ങൾ പാലിക്കുന്നുണ്ടോയെന്ന് ഉറപ്പ് വരുത്താൻ വിവിധ മന്ത്രാലയങ്ങളുടെ നേതൃത്വത്തിൽ സംയുക്ത പരിശോധന നടക്കുന്നുണ്ട്. നിയമ ലംഘനങ്ങൾ കണ്ടെത്തിയാൽ സ്ഥാപനങ്ങൾക്കെതിരെ ശക്തമായ നടപടി സ്വീകരിക്കും.

സുരക്ഷാ മുൻകരുതലുകളില്ലാതെ ഒരു കാരണവശാലും പുറത്തിറങ്ങരുതെന്ന് പൊതുജനങ്ങളോട് ആരോഗ്യ മന്ത്രാലയം ആവശ്യപ്പെട്ടു. കഴിഞ്ഞ ഞായറാഴ്ചയാണ്‌ തിരുഗേഹങ്ങളുടെ സേവകൻ സൽമാൻ രാജാവ് രാജ്യത്ത് നിലവിലുള്ള കർഫ്യൂവിൽ താൽക്കാലിക ഇളവ് ഏർപ്പെടുത്തി കൊണ്ട് ഉത്തരവിറക്കിയത്. ഇത് പ്രകാരം മക്ക ഒഴികെയുള്ള രാജ്യത്തെ വിവിധ പ്രവിശ്യകളിൽ രാവിലെ ഒമ്പത് മുതൽ വൈകീട്ട് അഞ്ച് മണി വരെ ജനങ്ങൾക്ക് പുറത്തിറങ്ങാൻ അനുമതി നൽകിയിരുന്നു.


ഏറ്റവും പുതിയ വാർത്തകൾക്കും വീഡിയോകൾക്കും സബ്‌സ്ക്രൈബ് ചെയ്യുക

Advt.


കമന്റ് ബോക്‌സിലെ അഭിപ്രായങ്ങള്‍ സുപ്രഭാതത്തിന്റേതല്ല. വായനക്കാരുടേതു മാത്രമാണ്. അശ്ലീലവും അപകീര്‍ത്തികരവും ജാതി, മത, സമുദായ സ്പര്‍ധവളര്‍ത്തുന്നതുമായ അഭിപ്രായങ്ങള്‍ പോസ്റ്റ് ചെയ്യരുത്. ഇത്തരം അഭിപ്രായങ്ങള്‍ രേഖപ്പെടുത്തുന്നത് കേന്ദ്രസര്‍ക്കാറിന്റെ ഐടി നയപ്രകാരം ശിക്ഷാര്‍ഹമാണ്.