2021 December 01 Wednesday
ചെയ്യേണ്ടത് ചെയ്യാതിരിക്കുന്നതും ചെയ്യരുതാത്തത് ചെയ്യുന്നതും ഒരുപോലെ തെറ്റാണ് -തിരുക്കുറള്‍

‘സംവരണം മൗലികാവകാശമല്ല’: സുപ്രിംകോടതി

 

ന്യൂഡല്‍ഹി: സംവരണം മൗലികാവകാശങ്ങളുടെ കൂട്ടത്തില്‍ പെടുന്നില്ലെന്ന് വീണ്ടും സുപ്രിംകോടതി. നീറ്റ് ആള്‍ ഇന്ത്യാ ക്വാട്ടയില്‍ സറണ്ടര്‍ ചെയ്യുന്ന സീറ്റുകളില്‍ 50 ശതമാനം സംവരണം പാലിക്കാത്തതിനെതിരായ ഹരജിയിലാണ് ജസ്റ്റിസുമാരായ എല്‍ നാഗേശ്വര റാവു, കൃഷ്ണ മുരാരി, രവിന്ദ്രഭട്ട് എന്നിവരടങ്ങിയ ബെഞ്ച് ഈ നിരീക്ഷണം നടത്തിയത്. ഹരജിക്കാരോട് മദ്രാസ് ഹൈക്കോടതിയെ സമീപിക്കാനും സുപ്രിം കോടതി നിര്‍ദേശിച്ചു.

തമിഴ്‌നാട്ടില്‍ നിന്നുള്ള രാഷ്ട്രീയപ്പാര്‍ട്ടികളായ ഡി.എം.കെ, എ.ഐ.എ.ഡി.എം.കെ, സി.പി.എം, സി.പി.ഐ, കോണ്‍ഗ്രസ്, വൈക്കോ തുടങ്ങിയവരാണ് സുപ്രിംകോടതിയെ സമീപിച്ചത്. മെഡിക്കല്‍ ബിരുദ, ബിരുദാനന്തര ബിരുദ, ഡിപ്ലോമ, പി.ജി ഡിപ്ലോമ കോഴ്‌സുകളിലേക്ക് ആള്‍ ഇന്ത്യാ ക്വാട്ട കേന്ദ്ര സര്‍ക്കാര്‍ ഇതര മെഡിക്കല്‍ കോളജുകള്‍ക്ക് നല്‍കുമ്പോള്‍ സംവരണം ഉറപ്പാക്കാന്‍ കേന്ദ്ര സര്‍ക്കാരിന് കഴിയുന്നില്ലെന്നായിരുന്നു ഹരജിക്കാര്‍ ചൂണ്ടിക്കാട്ടിയത്. തമിഴ്‌നാട്ടില്‍ മാത്രമല്ല, രാജ്യവ്യാപകമായി ഇത്തരത്തില്‍ സംവരണം പാലിക്കപ്പെടാത്ത സാഹചര്യമുണ്ടെന്നു ഹരജികള്‍ ചൂണ്ടിക്കാട്ടിയിരുന്നു.

സംവരണം പാലിക്കാത്തത് ഭരണഘടനയുടെ 32ാം വകുപ്പിന്റെ ലംഘനമാണെന്ന് ഡി.എം.കെ ഉള്‍പ്പടെയുള്ളവര്‍ വാദിച്ചു. മെഡിക്കല്‍ കൗണ്‍സില്‍ ഓഫ് ഇന്ത്യയുടെ നിര്‍ദേശം പാലിച്ചാല്‍ തന്നെ സംവരണം നടപ്പാകുമെന്നും കോടതി പുതുതായി സംവരണം ഏര്‍പ്പെടുത്തി ഉത്തരവിടേണ്ട കാര്യമില്ലെന്നും ഡി.എം.കെയുടെ അഭിഭാഷകന്‍ പി. വില്‍സന്‍ വാദിച്ചു. ഈ ഘട്ടത്തില്‍ സംവരണത്തെ എങ്ങനെ മൗലികാവകാശമായി കണക്കാക്കാനാവുമെന്ന് സുപ്രിംകോടതി ചോദിച്ചു.

തമിഴ്‌നാടുമായി ബന്ധപ്പെട്ട വിഷയത്തില്‍ രാഷ്ട്രീയപ്പാര്‍ട്ടികള്‍ ഒറ്റക്കെട്ടായി കോടതിയുടെ മുന്നിലെത്തിയതിനെ തങ്ങള്‍ അഭിനന്ദിക്കുന്നതായും എന്നാല്‍ ഇൗ ഹരജി പരിഗണിക്കാന്‍ കഴിയില്ലെന്നും കോടതി വ്യക്തമാക്കി. ഭരണഘടനയുടെ 226 പ്രകാരം ഹരജിക്കാര്‍ക്ക് ഇതിനായി മദ്രാസ് ഹൈക്കോടതിയെ സമീപിക്കാന്‍ തടസ്സമില്ലെന്നും കോടതി അറിയിച്ചു. ഇതോടെ ഹൈക്കോടതിയെ സമീപിക്കുന്നതിനായി ഹരജി പിന്‍വലിക്കുകയാണെന്ന് ഹരജിക്കാരുടെ അഭിഭാഷകര്‍ കോടതിയെ അറിയിച്ചു.


ഏറ്റവും പുതിയ വാർത്തകൾക്കും വീഡിയോകൾക്കും സബ്‌സ്ക്രൈബ് ചെയ്യുക

Advt.


കമന്റ് ബോക്‌സിലെ അഭിപ്രായങ്ങള്‍ സുപ്രഭാതത്തിന്റേതല്ല. വായനക്കാരുടേതു മാത്രമാണ്. അശ്ലീലവും അപകീര്‍ത്തികരവും ജാതി, മത, സമുദായ സ്പര്‍ധവളര്‍ത്തുന്നതുമായ അഭിപ്രായങ്ങള്‍ പോസ്റ്റ് ചെയ്യരുത്. ഇത്തരം അഭിപ്രായങ്ങള്‍ രേഖപ്പെടുത്തുന്നത് കേന്ദ്രസര്‍ക്കാറിന്റെ ഐടി നയപ്രകാരം ശിക്ഷാര്‍ഹമാണ്.