2024 February 25 Sunday
ബംഗാള്‍ ഉള്‍ക്കടലില്‍ ന്യൂനമര്‍ദ്ദം; സംസ്ഥാനത്ത് അടുത്ത അഞ്ച് ദിവസം മഴയ്ക്ക് സാധ്യത

‘നീറ്റ്’ എഴുതാം നീറ്റായി; അപേക്ഷിക്കുന്നതിന് മുന്‍പ് ഇക്കാര്യങ്ങള്‍ ശ്രദ്ധിക്കൂ; നീറ്റ്- യുജി 2024 അറിയേണ്ടതെല്ലാം

‘നീറ്റ്’ എഴുതാം നീറ്റായി; അപേക്ഷിക്കുന്നതിന് മുന്‍പ് ഇക്കാര്യങ്ങള്‍ ശ്രദ്ധിക്കൂ; നീറ്റ്- യുജി 2024 അറിയേണ്ടതെല്ലാം

എം.ബി.ബി.എസ്, ബി.ഡി.എസ്, ബി.എ.എം.എസ്, ബി.എസ്.എം.എസ്, ബി.യു.എം.എസ്, ബി.എച്ച്.എം.എസ് എന്നീ മെഡിക്കല്‍/ ആയുഷ് ബിരുദ കോഴ്‌സുകളിലേക്കുള്ള നാഷനല്‍ എലിജിബിലിറ്റി- കം- എന്‍ട്രന്‍സ് ടെസ്റ്റ് (നീറ്റ്- യു.ജി 2024) മേയ് 5 നടത്തും. നാഷനല്‍ ടെസ്റ്റിങ് ഏജന്‍സിക്കാണ് പരീക്ഷ ചുമതല. വിദേശ രാജ്യങ്ങളില്‍ മെഡിക്കല്‍/ ഡെന്റല്‍ ബിരുദ പഠനത്തിന് നീറ്റ്- യു.ജി യോഗ്യത നേടണം.

വിജ്ഞാപനവും ബുള്ളറ്റിനും https://exams.nta.ac.in/NEET ല്‍.

അപേക്ഷ ഫീസ്
ജനറല്‍/ എന്‍.ആര്‍.ഐ വിഭാഗത്തിന് 1700 രൂപ. ഇഡബ്ല്യുഎസ്/ ഒബിസി- എന്‍സിഎല്‍ വിഭാഗത്തിന് 1600 രൂപ.

   

എസ്.സി, എസ്.ടി, പിഡബ്ല്യൂബിഡി, തേര്‍ഡ് ജെന്‍ഡര്‍ വിഭാഗത്തിന് 1000.

കൂടാതെ പ്രോസസിങ് ചാര്‍ജും ജി.എസ്.ടിയും കൂടെ നല്‍കേണ്ടതുണ്ട്.

മാര്‍ച്ച് 9ന് വൈകീട്ട് 5 വരെ ഓണ്‍ലൈനായി അപേക്ഷിക്കാം. മാര്‍ച്ച് 9 രാത്രി 11.50 വരെ ഫീസടക്കാം. ഓണ്‍ലൈനായി ഒറ്റ അപേക്ഷ സമര്‍പ്പിച്ചാല്‍ മതി. കണ്‍ഫര്‍മേഷന്‍ പേജിന്റെ പ്രിന്റൗട്ട് എടുത്ത് സൂക്ഷിക്കണം.

യോഗ്യത
2024 ഡിസംബര്‍ 31ന് 17 വയസ് തികഞ്ഞിരിക്കണം. ഉയര്‍ന്ന പ്രായപരിധിയില്ല. പ്രവാസി ഇന്ത്യക്കാര്‍ക്കും വിദേശ വിദ്യാര്‍ഥികള്‍ക്കും അപേക്ഷിക്കാം. ഫിസിക്‌സ്, കെമിസ്ട്രി, ബയോളജി/ ബയോ ടെക്‌നോളജി വിഷയങ്ങള്‍ക്ക് മൊത്തം 50 ശതമാനം മാര്‍ക്കില്‍ കുറയാതെ ഇംഗ്ലീഷ് ഉള്‍പ്പെടെയുള്ള വിഷയങ്ങള്‍ പഠിച്ച് പ്ലസ് ടു/ ഹയര്‍ സെക്കണ്ടറി/ തത്തുല്ല്യ ബോര്‍ഡ് പരീക്ഷ വിജയിച്ചിരിക്കണം. എസ്.സി/ എസ്.ടി/ ഒബിസി- എന്‍.സി.എല്‍/ പിഡബ്ല്യൂബിഡി 40 ശതമാനം മാര്‍ക്ക് മതിയാവും.

പരീക്ഷ കേന്ദ്രങ്ങള്‍
മേയ് 5 ഞായറാഴ്ച്ച ഉച്ചക്ക് ശേഷം 2 മുതല്‍ 5.20 വരെയാണ് പരീക്ഷ. പരീക്ഷ ഘടനയും വിശദമായ സിലബസും ഇന്‍ഫര്‍മേഷന്‍ ബുള്ളറ്റിനിലുണ്ട്.

കേരളത്തില്‍ വയനാട്, പത്തനംതിട്ട, പയ്യന്നൂര്‍, ആലപ്പുഴ/ ചെങ്ങന്നൂര്‍, അങ്കമാലി, എറണാകുളം/ മൂവാറ്റുപുഴ, കണ്ണൂര്‍, കാസര്‍ഗോഡ്, കൊല്ലം, കോട്ടയം, കോഴിക്കോട്, മലപ്പുറം, പാലക്കാട്, തിരുവനന്തപുരം, തൃശൂര്‍, ഇടുക്കി നഗരങ്ങളിലും ലക്ഷദ്വീപില്‍ കവരത്തിയിലും പരീക്ഷാ കേന്ദ്രങ്ങളുണ്ടാവും. മുന്‍ഗണന ക്രമത്തില്‍ നാല് കേന്ദ്രങ്ങള്‍ തെരഞ്ഞെടുക്കാം. പരീക്ഷ ഫലം ജൂണ്‍ 14ന് പ്രസിദ്ധപ്പെടുത്തും.

അഡ്മിഷന്‍
നീറ്റ് യു.ജി 2024 റാങ്കടിസ്ഥാനത്തില്‍ മെഡിക്കല്‍/ ഡെന്റല്‍/ ആയുഷ് ബിരുദ കോഴ്‌സുകളില്‍ കൗണ്‍സിലിങ് വഴിയാണ് അഡ്മിഷന്‍. പ്രവേശന മാനദണ്ഡങ്ങള്‍ അതത് റെഗുലേറ്ററി ബോഡികള്‍ നിഷ്‌കര്‍ഷിച്ച പ്രകാരമാകും. എം.ബി.ബി.എസ് പ്രവേശനം നാഷനല്‍ മെഡിക്കല്‍ കമ്മീഷന്റെയും (www.nmc.org.in) ബി.ഡി.എസ് പ്രവേശനം ഡെന്റല്‍ കൗണ്‍സില്‍ ഓഫ് ഇന്ത്യയും (www.dciindia.gov.in) ചട്ടങ്ങള്‍ക്ക് വിധേയമാണ്. വിവരങ്ങള്‍ യഥാസമയം www.mmc.nic.in ല്‍ ലഭിക്കും.

ആയുഷ് കോഴ്‌സുകളിലേക്ക് (BAMS/BSMS/BUMS) സെന്‍ട്രല്‍ കൗണ്‍സില്‍ ഓഫ് ഇന്ത്യന്‍ മെഡിസിനും (www.ccimindia.rog) BHMS കോഴ്‌സിലേക്ക് സെന്‍ട്രല്‍ കൗണ്‍സില്‍ ഓഫ് ഹോമിയോപ്പതിയും (www.cchindia.com) ആണ് പ്രവേശന നടപടിക്രമങ്ങള്‍ നിയന്ത്രിക്കുന്നത്. ആയുഷ് അഡ്മിഷന്‍സ് സെന്‍ട്രല്‍ കൗണ്‍സിലിങ് കമ്മിറ്റിക്കാണ് (www.aaccc.gov.in) കൗണ്‍സിലിങ് ചുമതല.

സ്‌റ്റേറ്റ് ക്വാട്ട സീറ്റുകളിലേക്ക് സംസ്ഥാന പ്രവേശന കമ്മീഷണര്‍ നീറ്റ്- യു.ജി സ്‌കോര്‍ അടിസ്ഥാനത്തില്‍ അപേക്ഷകള്‍ സ്വീകരിച്ച് പ്രത്യേക മെറിറ്റ് ലിസ്റ്റ് തയ്യാറാക്കി അഡ്മിഷന്‍ നല്‍കും. നീറ്റ് യു.ജി റാങ്ക് നേടുന്നവര്‍ക്ക് മെഡിക്കല്‍/ ഡെന്റല്‍ ബിരുദ കോഴ്‌സുകളില്‍ 15 ശതമാനം ഓള്‍ ഇന്ത്യ ക്വാട്ട സീറ്റുകളിലും വിവിധ സംസ്ഥാനങ്ങളിലെ സ്‌റ്റേറ്റ് ക്വാട്ട സീറ്റുകളിലും രാജ്യത്തെ കേന്ദ്ര സ്ഥാപനങ്ങള്‍/ സര്‍വ്വകലാശാലകള്‍/ കല്‍പിത സര്‍വ്വകലാശാലകള്‍/ സ്വകാര്യ മെഡിക്കല്‍/ ഡെന്റല്‍ കോളജുകള്‍ എന്നിവിടങ്ങളിലും സെന്‍ട്രല്‍ പൂള്‍ ക്വാട്ട സീറ്റുകള്‍, എന്‍.ആര്‍.ഐ/ മാനേജ്‌മെന്റ് ക്വാട്ട സീറ്റുകള്‍, വിവിധ എയിംസുകള്‍, ജിപ്‌മെര്‍ എന്നിവിടങ്ങളിലും പ്രവേശനം തേടം.

ആംഡ് ഫോഴ്‌സസ് മെഡിക്കല്‍ കോളജ് പൂനെ (രജിസ്‌ട്രേഷന്‍ മാത്രം) രാം മനോഹര്‍ ലോഹിയ ഹോസ്പിറ്റല്‍/ വര്‍ധമാന മഹാവീര്‍ മെഡിക്കല്‍ കോളജ് ആന്‍ഡ് സഫ്ദര്‍ജങ് ഹോസ്പിറ്റല്‍, ഇ.എസ്.ഐ.സി മെഡിക്കല്‍ കോളജുകള്‍, ഡല്‍ഹി/ ബനാറസ്/ അലിഗര്‍ മുസ് ലിം സര്‍വകലാശാലകള്‍ അടക്കം നിരവധി സ്ഥാപനങ്ങളിലെ എം.ബി.ബി.എസ്/ ബി.ഡി.എസ് പ്രവേശനവും നീറ്റ് യു.ജി റാങ്കടിസ്ഥാനത്തിലാണ്. എം.സി.സി കൗണ്‍സിലിങ് വഴിയാണ് അഡ്മിഷന്‍.


കമന്റ് ബോക്‌സിലെ അഭിപ്രായങ്ങള്‍ സുപ്രഭാതത്തിന്റേതല്ല. വായനക്കാരുടേതു മാത്രമാണ്. അശ്ലീലവും അപകീര്‍ത്തികരവും ജാതി, മത, സമുദായ സ്പര്‍ധവളര്‍ത്തുന്നതുമായ അഭിപ്രായങ്ങള്‍ പോസ്റ്റ് ചെയ്യരുത്. ഇത്തരം അഭിപ്രായങ്ങള്‍ രേഖപ്പെടുത്തുന്നത് കേന്ദ്രസര്‍ക്കാറിന്റെ ഐടി നയപ്രകാരം ശിക്ഷാര്‍ഹമാണ്.

Comments are closed for this post.