നീറ്റ് അത്ര നീറ്റല്ല; പരീക്ഷ സമയത്തിന് തീര്‍ന്നില്ല, പ്രതിഷേധവുമായി രക്ഷിതാക്കള്‍

കോഴിക്കോട്: നീറ്റ് പരീക്ഷ സമയത്തിന് തീര്‍ക്കാന്‍ പറ്റാത്തതിനെത്തുടര്‍ന്ന് പ്രതിഷേധവുമായി രക്ഷിതാക്കള്‍. കോഴിക്കോട് ഈങ്ങാപ്പുഴയിലെ സ്‌കൂളിന് മുന്നിലാണ് രക്ഷിതാക്കളുടെ പ്രതിഷേധം. വിദ്യാര്‍ഥികള്‍ക്ക് ചോദ്യപേപ്പര്‍ നല്‍കിയത് ഒരു മണിക്കൂറിലധികം കഴിഞ്ഞാണെന്നും രക്ഷിതാക്കള്‍ ആരോപിക്കുന്നു, വൈകീട്ട് 5: 20 ന് അവസാനിപ്പിക്കേണ്ട പരീക്ഷ 7 മണിയായിട്ടും കഴിഞ്ഞില്ലെന്ന് രക്ഷിതാക്കള്‍ പറയുന്നു.

ഈങ്ങാപ്പുഴ മാര്‍ബസോലിയസ് സ്‌കൂളില്‍ 450ലധികം കുട്ടികളാണ് പരീക്ഷയെഴുതാന്‍ എത്തിയത്. അതില്‍ ഒരു ഹാളിലെ പരീക്ഷയാണ് നീളുന്നത്. സമയത്ത് ചോദ്യപേപ്പര്‍ എത്താന്‍ വൈകിയതാണ് പരീക്ഷ നീളാന്‍ കാരണമായതെന്നാണ് സ്‌കൂള്‍ അധികൃതരുടെ വിശദീകരണം.

രണ്ടു മണിക്ക് ആരംഭിച്ച് 5:20 ന് അവസാനിപ്പിക്കുന്ന രീതിയിലായിരുന്നു പരീക്ഷയുടെ ഷെഡ്യൂള്‍. പരീക്ഷയെഴുതാനായി പതിനൊന്ന് മണിക്ക് കയറിയതാണ് വിദ്യാര്‍ഥികളെന്നും രക്ഷിതാക്കള്‍ പറയുന്നു. ഗേറ്റ് ഉപരോധിച്ചാണ് രക്ഷിതാക്കളുടെ പ്രതിഷേധം. പ്രതിഷധത്തെ തുടര്‍ന്ന് പൊലീസ് സ്ഥലത്തെത്തി.