ലഖ്‌നോ: സ്വകാര്യ ഭാഗത്ത് എയര്‍ പമ്പ് തിരുകി കാറ്റടിച്ചു. 19കാരന്‍ ഗുരുതരാവസ്ഥയില്‍. യു.പിയിലെ ഗാസിയാബാദിലാണ് സംഭവം. കാര്‍ വാഷിങ് സ്ഥാപനത്തിലെ ജീവനക്കാരനായ വിജയിനെ ആശുപത്രിയില്‍ പ്രവേശിപ്പിച്ചിരിക്കുകയാണ്. മോഹിത് എന്നയാളാണ് വിജയിനോട് ഈ ക്രൂരത ചെയ്തത്. മോഹിത് ഇപ്പോള്‍ ഒളിവിലാണ്.

രാഘേഷ് മാര്‍ഗിലെ ഒരു പെട്രോള്‍ പമ്പില്‍ കാര്‍ ക്ലീനിങ്ങ് തൊഴിലാളിയായിരുന്നു വിജയ്. കഴിഞ്ഞ ശനിയാഴ്ച ഇവിടെ വെച്ച് വിജയും മോഹിത് എന്നയാളും തമ്മില്‍ വാക്കേറ്റമുണ്ടായി. വിജയിനെ ആക്രമിച്ച് കീഴ്‌പ്പെടുത്തിയ മോഹിത്, ദേഹത്ത് കയറിയിരുന്ന ശേഷം പ്രഷര്‍ പമ്പ് വാല്‍വ് തുറന്ന് സ്വകാര്യ ഭാഗത്ത് തിരുകുകയും കാറ്റ് തുറന്നു വിടുകയുമായിരുന്നു. വിജയിന്റെ വയര്‍ വീര്‍ത്ത നിലയിലായിരുന്നു. ആന്തരികാവയവങ്ങള്‍ക്ക് കേടുപാടുകള്‍ സംഭവിച്ചതായും റിപ്പോര്‍ട്ടുകള്‍ പറയുന്നു.

സ്വകാര്യ ആശുപത്രിയില്‍ ചികിത്സയില്‍ കഴിയുന്ന വിജയിന്റെ നില ഗുരുതരമാണെന്നും ഒളിവില്‍ പോയ പ്രതി മോഹിതിനെ കണ്ടെത്താന്‍ അന്വേഷണം തുടങ്ങിയെന്നും പൊലിസ് അറിയിച്ചു.