മുംബൈ: കളര്‍ഫുള്‍ ആയി ഒരു പ്രതിഷേധം. അതിന് കിട്ടിയ റസല്‍ട്ടോ അതിലും കളര്‍ഫുള്‍. എന്താണെന്നല്ലേ. റോഡിലെ ഗര്‍ത്തങ്ങളാണ് പ്രശ്‌നം. കാലം കുറേ ആയി നാട്ടുകാര്‍ ഇതെല്ലാമൊന്ന് അടച്ചു കിട്ടാന്‍ പണിപ്പെടുന്നു. പലതരത്തില്‍ പ്രതിഷേധിച്ചു. ഒരു ഫലവുമുണ്ടായില്ല.

ഒടുവില്‍ പ്രതിഷേധത്തിന്റെ വ്യത്യസ്ത രീതി തന്നെ പുറത്തെടുത്തു അവര്‍. നവരാത്രിയോടനുബന്ധിച്ച് റോഡാക്കെ കളറാക്കി. റോഡിലെ കുഴികളിലൊക്കെ നിറംചാലിച്ചു. റോഡാകെ വര്‍ണമയം. കാണാനും ചേല്. അപകടത്തിന് മുന്നറിയിപ്പുമായി. കാരണം ഈ നിറങ്ങള്‍ കാണുമ്പോള്‍ അകലെ നിന്നേ അറിയാലോ കുഴിയാണെന്ന്. അങ്ങിനെ നെയ്യപ്പം തിന്നാല്‍ രണ്ടുണ്ട് കാര്യമെന്ന പോലെ കുഴിയിലെ കളറിനും പലതുണ്ട് കാര്യമെന്ന മട്ട്.

മുംബൈയിലാണ് സംഭവം. ബ്രിഹാന്‍മുംബൈ മുനിസിപ്പല്‍ കോര്‍പറേഷന് കീഴിലുള്ള റോഡുകളിലാണ് നാട്ടുകാര്‍ ചായം പൂശിയത്. വാച്ച് ഡോഗ് ഫൗണ്ടേഷന്റെ നേതൃത്വത്തിലായിരുന്നു പ്രതിഷേധം.

ഏതായാലും പ്രതിഷേധം ഫലം കണ്ടു. കളറിട്ട് നാലു മണിക്കൂറിനകം അധികൃതര്‍ റോഡിലെ പൊത്തടച്ചു. എന്നാല്‍ ഇതു മാത്രം പോരെന്നാണ് നാട്ടുകാര്‍ പറയുന്നത്. കോടിക്കണക്കിന് രൂപ ചെലവിട്ട് പണികഴിച്ച റോഡ് നാശമായതിന് ബന്ധപ്പെട്ടവര്‍ക്കെതിരെ നടപടിയെടുക്കണമെന്നും ഇവര്‍ ആവശ്യപ്പെടുന്നു.